ജിദ്ദ - മദീനക്കടുത്തുണ്ടായ ബസ് അപകടത്തില്‍ മരിച്ച ഹൈദരാബാദ് സ്വദേശികളായ ഉംറ തീര്‍ത്ഥാടകരുടെ 35 ബന്ധുക്കള്‍ ചൊവ്വാഴ്ച രാത്രിയോടെ മദീനയിലെത്തി. തെലങ്കാന സര്‍ക്കാരിന്റെ പ്രതിനിധി സംഘത്തില്‍ ഉള്‍പ്പെട്ട എംഎല്‍എ മാജിദ് ഹുസൈന്‍ ബന്ധുക്കളെ സന്ദര്‍ശിച്ചു. നടപടിക്രമങ്ങള്‍ വേഗത്തിലാക്കുന്നത് സഹായിക്കാന്‍ ബന്ധുക്കളോടൊപ്പം മൂന്ന് സര്‍ക്കാര്‍ ഉദ്യോഗസ്ഥരും മദീനയിലെത്തിയിട്ടുണ്ട്.
മരിച്ചവരുടെ കുടുംബാംഗങ്ങളെ നേരില്‍ കണ്ട എം.എല്‍.എ തെലങ്കാന സര്‍ക്കാരിന്റെ എല്ലാ സഹായങ്ങളും കുടുംബങ്ങള്‍ക്ക് ഉറപ്പുനല്‍കി. മദീനയിലെ കുര്‍ബാന്‍ റോഡിലും മസ്ജിദുല്‍ ഗമാമയ്ക്ക് സമീപവുമാണ് ബന്ധുക്കള്‍ക്ക് താമസസൗകര്യം ഒരുക്കിയിട്ടുള്ളത്. ബന്ധുക്കളെ ആശ്വസിപ്പിക്കുകയും സൗദി അധികൃതരുമായി ചേര്‍ന്ന് സ്ഥിതിഗതികള്‍ വിലയിരുത്തുകയും ചെയ്തു. മരിച്ചവരെ തിരിച്ചറിയുന്നതിനായുള്ള ഡി.എന്‍.എ പരിശോധന ഉള്‍പ്പെടെയുള്ള നടപടികള്‍ പുരോഗമിക്കുകയാണെന്നും നടപടിക്രമങ്ങള്‍ പൂര്‍ത്തിയായ ശേഷം മൃതദേഹങ്ങള്‍ സൗദി അറേബ്യയില്‍ തന്നെ ഖബറടക്കുമെന്നും അധികൃതര്‍ അറിയിച്ചു.
മദീനയ്ക്ക് സമീപം ഉംറ തീര്‍ത്ഥാടകര്‍ സഞ്ചരിച്ച ബസ് ഓയില്‍ ടാങ്കറുമായി കൂട്ടിയിടിച്ചുണ്ടായ ദാരുണമായ അപകടത്തില്‍ 45 പേര്‍ക്ക് ജീവന്‍ നഷ്ടമായിരുന്നു. മരിച്ചവരുടെ കുടുംബാംഗങ്ങള്‍ക്ക് ആവശ്യമായ എല്ലാ പിന്തുണയും നല്‍കുമെന്ന് മാജിദ് ഹുസൈന്‍ എക്‌സ് പ്ലാറ്റ്ഫോമിലൂടെയും അറിയിച്ചു.
Related News
