ജിദ്ദ- സദസ്സും പാട്ടുകാരും ഒന്നായി മാറിയ അപൂര്‍വ ആഘോഷനിമിഷങ്ങള്‍ക്ക് സാക്ഷ്യം വഹിച്ച് ജിദ്ദ കേരള കലാസാഹിതിയുടെ ഇരുപത്തൊമ്പതാം വാര്‍ഷികത്തിന് കൊടിയിറങ്ങി. മഹ്ജറിലെ ഖുബ്ബ ഓഡിറ്റോറിയത്തില്‍ അരങ്ങേറിയ 'കളേഴ്‌സ് ഓഫ് ഇന്ത്യ' വൈവിധ്യമാര്‍ന്ന ഇന്ത്യന്‍ സംസ്‌കൃതിയുടെ നേര്‍ക്കാഴ്ചയായി. നൃത്തവും സംഗീതവും ഇതള്‍ വിരിഞ്ഞ കലാരാവ് കോണ്‍സല്‍ മുഹമ്മദ് ഹാഷിം ഉദ്ഘാടനം ചെയ്തു.
ജിദ്ദയിലെ കലാപ്രതിഭകള്‍ക്ക് പുറമെ നാട്ടില്‍നിന്നെത്തിയ പിന്നണി ഗായകരായ രേഷ്മ രാഘവേന്ദ്രയും ലിബിന്‍ സ്‌കറിയയും അണമുറിയാത്ത ആവേശത്തിനാണ് തിരികൊളുത്തിയത്. മൂന്നു മണിക്കൂറോളം വന്‍സദസ്സിനെ അവര്‍ പാട്ടിന്റെ പെരുമഴയില്‍ കുളിപ്പിച്ചു. ഇതാദ്യമായി ജിദ്ദയിലെത്തിയ ഇരുവര്‍ക്കും വലിയ വരവേല്‍പാണ് സദസ്സ് നല്‍കിയത്. നിരവധി സ്റ്റേജ് ഷോകള്‍ അവതരിപ്പിച്ചുള്ള തനിക്ക് ഇത്രയും ഗംഭീര സ്വീകരണം എവിടെയും ലഭിച്ചിട്ടില്ലെന്ന ഗായിക രേഷ്മ രാഘവേന്ദ്രയുടെ വാക്കുകളെ നിറഞ്ഞ കൈയടികളോടെ സദസ്സ് സ്വീകരിച്ചു.
ശ്രീലക്ഷ്മി എസ് നായര്‍ ചിട്ടപ്പെടുത്തിയ സെമിക്ലാസ്സിക്കല്‍ നൃത്തം, ഭരതനാട്യം, കഥക്, സമൂഹനൃത്തം എന്നിവ പരിപാടിയുടെ മുഖ്യ ആകര്‍ഷണമായി. സലീന മുസാഫിര്‍ ആവിഷ്‌കരിച്ച ബോളിവുഡ് ഫ്യൂഷന്‍ ഡാന്‍സും ഷാനി ഷാനവാസ് ചിട്ടപ്പെടുത്തിയ ലേഡീസ് സിനിമാറ്റിക് ഡാന്‍സും ആഘോഷത്തിന് ചാരുതയേകി. മുന്‍ രാഷ്ട്രപതി എ.പി.ജെ അബ്ദുല്‍ കലാമിന്റെ ജീവിതത്തെ ആസ്പദമാക്കി തയാറാക്കിയ വിംഗ്‌സ് ഓഫ് ഫയര്‍ എന്ന സ്‌കിറ്റ് ആയിരുന്നു മറ്റൊരു പ്രധാന ആകര്‍ഷണം.
കോണ്‍സല്‍ മുഹമ്മദ് ഹാഷിം, പത്മശ്രീ നൗഫ് അല്‍ മര്‍വായ് എന്നിവരേയും ഗ്ലോബല്‍ അറബ് ഹ്യൂമാനിറ്റേറിയന്‍ അവാര്‍ഡ് നേടിയ അബ്ദുല്‍ മജീദ് ബദറുദ്ദീനേയും ആദരിച്ചു. കലാസാഹിതി രക്ഷാധികാരി മുസാഫിര്‍ ആശംസ നേര്‍ന്നു. പ്രസിഡന്റ് ഷാനവാസ് കൊല്ലം അധ്യക്ഷനായിരുന്നു. മാത്യു വര്‍ഗീസ് സ്വാഗതവും ഡാര്‍വിന്‍ ആന്റണി നന്ദിയും പറഞ്ഞു.
