ജിദ്ദ- രാജ്യത്ത് നടപ്പാക്കുന്ന സമഗ്ര വോട്ടര്‍ പട്ടിക പരിഷ്‌കരണത്തില്‍ പ്രവാസികള്‍ക്കുള്ള ആകുലത പരിഹരിക്കുന്നതിനും ആശങ്ക ഒഴിവാക്കുന്നതിനുമുള്ള മാര്‍ഗങ്ങള്‍ പ്രതിപാദിച്ച് ജിദ്ദ കെ.എം.സി.സി ശില്‍പശാല സംഘടിപ്പിച്ചു. കേരളത്തില്‍ രാഷ്ട്രീയ പാര്‍ട്ടി പ്രവര്‍ത്തകര്‍ തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് പ്രവര്‍ത്തനത്തില്‍ മുഴുകിയ അവസരത്തില്‍ പ്രവാസികള്‍ ശ്രദ്ധിക്കേണ്ട വിഷയങ്ങളെ കുറിച്ചും പ്രവാസികള്‍ക്ക് ഉണ്ടാവുന്ന സംശയങ്ങള്‍ ദുരീകരിക്കുന്നതിന് വേണ്ടിയുമാണ് ശില്‍പശാല സംഘടിപ്പിച്ചത്. ആശങ്ക വെടിയാം ജാഗ്രതരാവാം എന്ന ശീര്‍ഷകത്തിലാണ് ശില്‍പശാല സംഘടിപ്പിച്ചത്. പ്രമുഖ വിദ്യാഭ്യാസ പ്രവര്‍ത്തകന്‍ മുഹമ്മദ് മുസ്തഫ മാസ്റ്ററും എം എ റഫീക്ക് മാസ്റ്ററും പ്രവര്‍ത്തകരുമായി സംവദിച്ചു.
പ്രവാസികളുടെ വോട്ടുചേര്‍ക്കല്‍ സംബന്ധിച്ച് ചില കാര്യങ്ങളില്‍ അവ്യക്തത നിലനില്‍ക്കുന്നുണ്ടെന്നും അത് പരിഹരിക്കാന്‍ പ്രവാസി സംഘടനകളുടെ കൂട്ടായ പരിശ്രമത്തിലൂടെ ചീഫ് ഇലക്ഷന്‍ കമ്മീഷണറുടെ ശ്രദ്ധയില്‍ പ്രവാസി വിഷയങ്ങള്‍ കൊണ്ട് വരുന്നതിന് വേണ്ടിയുള്ള അടിയന്തിര ഇടപെടലുകള്‍ ആവശ്യമാണെന്നും യോഗം അഭിപ്രായപ്പെട്ടു. ആക്ടിംഗ് പ്രസിഡന്റ് സി.കെ.എ റസാക്ക് മാസ്റ്റര്‍ അധ്യക്ഷത വഹിച്ചു. വി.പി മുസ്തഫ സ്വാഗതവും അബ്ദുറഹ്‌മാന്‍ വെള്ളിമാടുകുന്ന് നന്ദിയും പറഞ്ഞു. നാസര്‍ മച്ചിങ്ങല്‍, ഷക്കീര്‍ മണ്ണാര്‍ക്കാട് തുടങ്ങിയവര്‍ നേതൃത്വം നല്‍കി.
Related News
