റിയാദ്: സാംസ്‌കാരിക വൈവിധ്യത്തിന്റെ ഉത്സവമായി സൗദി തലസ്ഥാന നഗരിയായ റിയാദിലെ സുവൈദി പാര്‍ക്കില്‍ അരങ്ങേറുന്ന റിയാദ് സീസണില്‍ വന്‍ ജനപങ്കാളിത്തം. ലോകത്തിലെ 14 രാജ്യങ്ങള്‍ പങ്കാളികളാകുന്ന ഈ മഹോത്സവം 49 ദിവസം നീളുന്ന സംഗീതം, കല, ഭക്ഷണ വൈവിധ്യം, പാരമ്പര്യങ്ങള്‍ എന്നിവയുടെ സമന്വയപ്രദര്‍ശനമായി മാറിയിരിക്കുന്നു.

റിയാദ് സീസണിന്റെ ഭാഗമായി ആരംഭിച്ച ഇന്ത്യന്‍ സാംസ്‌കാരികോത്സവം അറബ് പൗരന്മാരടക്കമുള്ള ആയിരങ്ങള്‍ക്കു മനോഹരമായ കലാനുഭവമായി. ഇന്ത്യയുടെ സമ്പന്നമായ സാംസ്‌കാരിക പൈതൃകവും വൈവിധ്യവും അടയാളപ്പെടുത്തുന്ന പരിപാടികളാണ് ഓരോ ദിവസവും ഒരുക്കിയിട്ടുള്ളത്.
തെയ്യം, തിറ, കാവടി, കരകാട്ടം, ഗരുഡന്‍ കളി, മയിലാട്ടം, പൊയാല്‍നൃത്തം തുടങ്ങിയ ഇന്ത്യന്‍ കലാരൂപങ്ങള്‍ സുവൈദി പാര്‍ക്കില്‍ ആസ്വാദക ഹൃദയങ്ങളെ കീഴടക്കി. രാജസ്ഥാനി, പഞ്ചാബി നൃത്തങ്ങള്‍ ഉള്‍പ്പെടെയുള്ള വിവിധ സംസ്ഥാനങ്ങളുടെ പ്രകടനങ്ങളും വേദി ഉത്സവാന്തരീക്ഷമാക്കി. ഇന്ത്യന്‍ രുചിവൈവിധ്യങ്ങള്‍ ആസ്വദിക്കാനും സന്ദര്‍ശകര്‍ക്കു പ്രത്യേക സംവിധാനമുണ്ട്.

മീഡിയ മന്ത്രാലയം ജനറല്‍ എന്റര്‍ടെയിന്‍മെന്റ് അതോറിറ്റിയുമായി സഹകരിച്ച് സംഘടിപ്പിച്ച 'ഗ്ലോബല്‍ ഹാര്‍മണി'യുടെ ഭാഗമായാണ് ഈ പരിപാടി. രാജ്യത്ത് താമസിക്കുന്നവരുടെ വൈവിധ്യമാര്‍ന്ന ജീവിതരീതികളെ പ്രദര്‍ശിപ്പിക്കുക, സാംസ്‌കാരിക സഹവര്‍ത്തിത്വവും സൗഹൃദവും വളര്‍ത്തുക എന്നിവയാണ് പദ്ധതിയുടെ പ്രധാന ലക്ഷ്യങ്ങള്‍. ഇതിലൂടെ സൗദി അറേബ്യയെ ആഗോള സാംസ്‌കാരിക ഇടപാടുകളുടെ കേന്ദ്രമായി പ്രതിഷ്ഠിക്കുകയുമാണ് ഉദ്ദേശ്യം.

വൈകുന്നേരം നാല് മുതല്‍ രാത്രി 12 വരെയും വാരാന്ത്യങ്ങളില്‍ രാത്രി ഒരു മണിവരെയും പരിപാടികള്‍ നടക്കും. പ്രവേശനം സൗജന്യമാണ്. വൈകുന്നേരം ഏഴ് മണിക്കും രാത്രി ഒമ്പത് മണിക്കും നടക്കുന്ന കലാപ്രകടനങ്ങള്‍ പാര്‍ക്കിനെ വലയം വെക്കും. നവംബര്‍ 2 ന് ആരംഭിച്ച ഇന്ത്യന്‍ വാരാഘോഷം നവംബര്‍ 10ന് സമാപിക്കും. ഇന്ത്യയ്‌ക്കൊപ്പം ബംഗ്ലാദേശ്, പാക്കിസ്ഥാന്‍, ഫിലിപ്പൈന്‍സ്, ഈസ്റ്റ് ആഫ്രിക്ക ഉള്‍പ്പെടെ 13 രാജ്യങ്ങളില്‍ നിന്നുള്ള കലാകാരന്മാര്‍ ഡിസംബര്‍ 20 വരെ വിവിധ കലാപ്രകടനങ്ങള്‍ അവതരിപ്പിക്കും.