റിയാദ്: ഐക്യരാഷ്ട്രസഭയുടെ ടൂറിസം ഓര്‍ഗനൈസേഷന്റെ (യുഎന്‍ ടൂറിസം) ജനറല്‍ അസംബ്ലി, സൗദി ടൂറിസം മന്ത്രി അഹമ്മദ് അല്‍ ഖത്തീബിനെ 26-ാമത് സമ്മേളനത്തിന്റെ പ്രസിഡന്റായി ഏകകണ്ഠമായി തിരഞ്ഞെടുത്തു. 150-ല്‍ അധികം രാജ്യങ്ങളുടെ പ്രതിനിധികള്‍ പങ്കെടുത്ത സമ്മേളനത്തിലാണ് ഈ സുപ്രധാന പ്രഖ്യാപനം നടന്നത്. റിയാദാണ് സമ്മേളനത്തിന് ആതിഥേയത്വം വഹിക്കുന്നത്.
യുഎന്‍ ടൂറിസം ഓര്‍ഗനൈസേഷന്‍ 50 വര്‍ഷം മുമ്പ് (1975) സ്ഥാപിതമായ ശേഷം, ജനറല്‍ അസംബ്ലിയുടെ പ്രസിഡന്റ് സ്ഥാനത്തേക്ക് തിരഞ്ഞെടുക്കപ്പെടുന്ന ആദ്യത്തെ സൗദി പൗരനാണ് ടൂറിസം മന്ത്രിയായ അഹമ്മദ് അല്‍ ഖത്തീബ്.
വിനോദസഞ്ചാര മേഖലയുടെ ആഗോള വളര്‍ച്ചക്ക് സൗദി അറേബ്യ കഴിഞ്ഞ വര്‍ഷങ്ങളില്‍ നല്‍കിയ പങ്കാളിത്തവും അടിസ്ഥാന സൗകര്യ വികസനത്തിലും സേവനങ്ങളിലും കൈവരിച്ച ഗുണപരമായ മുന്നേറ്റങ്ങളും രാജ്യത്ത് നടപ്പാക്കിയ അന്താരാഷ്ട്ര പദ്ധതികളും പരിഗണിച്ചാണ് അല്‍ ഖത്തീബിനെ പ്രസിഡന്റായി തിരഞ്ഞെടുത്തത്. ടൂറിസം രംഗത്തെ നയിക്കുന്നതില്‍ ആഗോള സമൂഹം സൗദിയിലര്‍പ്പിച്ച വിശ്വാസത്തിന്റെ പ്രതിഫലനമാണ് ഏകകണ്ഠമായ തിരഞ്ഞെടുപ്പ്.
സംഘടനയുടെ സുവര്‍ണ്ണ ജൂബിലി ആഘോഷങ്ങളോടനുബന്ധിച്ച് നടക്കുന്ന ഈ സമ്മേളനം, സംഘടനയുടെ ചരിത്രത്തിലെ ഏറ്റവും വലിയ ജനറല്‍ അസംബ്ലിയാണെന്ന പ്രത്യേകതയുമുണ്ട്. വിവിധ രാജ്യങ്ങളിലെ ഭരണാധികാരികളും സ്വകാര്യമേഖലയിലെ പ്രമുഖരും നയരൂപകര്‍ത്താക്കളും പങ്കെടുക്കുന്ന നിരവധി സെഷനുകള്‍ സമ്മേളനത്തിന്റെ ഭാഗമായി നടക്കുന്നുണ്ട്.
Related News
