ദോഹ: നവംബര്‍ 20 മുതല്‍ 28 വരെ ദോഹ സാംസ്‌കാരിക ആഘോഷങ്ങളാല്‍ തെളിയും. സിനിമ പ്രേമികള്‍ കാത്തിരുന്ന മഹോത്സവം എത്തി. ഈ വര്‍ഷം 62 രാജ്യങ്ങളില്‍ നിന്നുള്ള 97 ആകര്‍ഷക സിനിമകളുമായി ദോഹയെ സിനിമയുടെ നഗരമാക്കാന്‍ ഡിഎഫ്എഫ് ഒരുങ്ങുന്നു. ഫെസ്റ്റിവലിന്റെ ഭാഗമായി നടക്കുന്ന മത്സരങ്ങള്‍ക്കും സംഗീത നിശകള്‍ക്കും മൊത്തം 300,000 ഡോളര്‍ സമ്മാനത്തുകയുണ്ട്.

അറബ് ലോകത്ത് നിന്ന് ലോകമെമ്പാടുമുള്ള പുതു സ്വരങ്ങളും ആവേശം നിറഞ്ഞ കഥകളും പ്രേക്ഷകരെ വിസ്മയിപ്പിക്കാനൊരുങ്ങുന്നു. ഫെസ്റ്റിവലിന്റെ തീം സോങ്ങ് ഖത്തറിന്റെ പ്രശസ്ത സംഗീതജ്ഞ ദാന അല്‍ ഫര്‍ദാന്‍ ആണ് രചിച്ചിരിക്കുന്നത്.

ദോഹയുടെ ആത്മാവിനും താളത്തിനും ജീവന്‍ പകരുന്ന ഗാനമെന്ന നിലയിലാണ് ഇത് വിലയിരുത്തപ്പെടുന്നത്. ഫെസ്റ്റിവലിന്റെ തുടക്കം കൗഥര്‍ ബെന്‍ ഹാനിയയുടെ 'ദ വോയ്‌സ് ഓഫ് ഹിന്ദ് റജാബ്' എന്ന ചിത്രത്തോടെയായിരിക്കും. സത്യത്തിനും പ്രതിരോധത്തിനും ശബ്ദമാകുന്ന സിനിമയായാണ് ചിത്രം പരിഗണിക്കപ്പെടുന്നത്.