കുര്ണൂല്: ആന്ധ്രപ്രദേശിലെ കുര്ണൂലില് ഇരുചക്രവാഹനവുമായി കൂട്ടിയിടിച്ചതിനെ തുടര്ന്ന് വോള്വോ ബസിന് തീപിടിച്ച് വന് ദുരന്തം. അപകടത്തില് 20 പേര്ക്ക് ജീവന് നഷ്ടപ്പെട്ടതായി സംശയിക്കുന്നു. മരണസംഖ്യ ഇനിയും ഉയരാന് സാധ്യതയുണ്ട്.
ഹൈദരാബാദില്നിന്ന് ബംഗളൂരുവിലേക്ക് പോവുകയായിരുന്ന ബസില് 40 യാത്രക്കാരാണ് ഉണ്ടായിരുന്നത്. വെള്ളിയാഴ്ച പുലര്ച്ചെ ഏകദേശം മൂന്ന് മണിയോടെയാണ് സംഭവം.
അപകടത്തില്പ്പെട്ട ഇരുചക്രവാഹനം ബസിനടിയില് കുടുങ്ങിയതാണ് വലിയ തീപിടിത്തത്തിന് കാരണമായതെന്നാണ് പ്രാഥമിക നിഗമനം. ഈ കൂട്ടിയിടിയില്നിന്ന് ഉയര്ന്ന തീപ്പൊരി അതിവേഗം ബസിലേക്ക് പടര്ന്നു.
എ.സി. ബസായതിനാല് ചില്ലുകള് തകര്ത്ത് പുറത്തുകടക്കാനുള്ള ശ്രമത്തിനിടെയാണ് മിക്കവര്ക്കും ജീവന് നഷ്ടപ്പെട്ടത്. ശക്തമായ തീപ്പിടിത്തത്തില് ബസ് പൂര്ണമായും കത്തിനശിച്ചു. രക്ഷപ്പെട്ട 15 പേരെ പരിക്കുകളോടെ ആശുപത്രിയില് പ്രവേശിപ്പിച്ചിട്ടുണ്ട്.
സംഭവത്തില് ആന്ധ്രപ്രദേശ് മുഖ്യമന്ത്രി എന്. ചന്ദ്രബാബു നായിഡു ഞെട്ടല് രേഖപ്പെടുത്തി. മരിച്ചവരുടെ കുടുംബാംഗങ്ങളെ അനുശോചനം അറിയിച്ച മുഖ്യമന്ത്രി, പരിക്കേറ്റവര്ക്ക് ആവശ്യമായ എല്ലാ സഹായങ്ങളും ഉറപ്പാക്കുമെന്നും അറിയിച്ചു.
Related News
