കൊച്ചി: നവംബറില്‍ കേരളത്തിലെത്തുന്ന ലയണല്‍ മെസ്സി ഉള്‍പ്പെടെയുള്ള അര്‍ജന്റീന ടീം കൊച്ചിയിലായിരിക്കും കളിക്കുക. സ്റ്റേഡിയം സജ്ജമാക്കാന്‍ ജിസിഡിഎക്ക് കായികവകുപ്പ് നിര്‍ദേശം നല്‍കി. എന്നാല്‍ ഇക്കാര്യത്തില്‍ ഔദ്യോഗിക സ്ഥിരീകരണമായിട്ടില്ല. നേരത്തെ തിരുവനന്തപുരം കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തിലാണ് കളിനടക്കുകയെന്ന് റിപ്പോര്‍ട്ടുണ്ടായിരുന്നു.
അതേസമയം, കളിക്കാര്‍ക്കും വിഐപികള്‍ക്കും ആവശ്യമായ യാത്രാ സൗകര്യമൊരുക്കാന്‍ കൊച്ചിയാണ് മികച്ചതെന്ന് കണ്ടെത്തിയതിനെ തുടര്‍ന്നാണ് വേദി കലൂര്‍ സ്റ്റേഡിയത്തിലേക്ക് മാറ്റാന്‍ സര്‍ക്കാര്‍തലത്തില്‍ തിരുമാനിച്ചിട്ടുള്ളതെന്നാണ് റിപ്പോര്‍ട്ട്. മെസ്സി കേരളത്തിലേക്കെന്നത് സംബന്ധിച്ച് കഴിഞ്ഞ ദിവസം അര്‍ജന്റീനന്‍ ഫുട്ബോള്‍ ഫെഡറേഷന്‍ ഔദ്യോഗിക സ്ഥിരീകരണം നടത്തിയിരുന്നു. സമൂഹ മാധ്യമങ്ങള്‍ വഴിയാണ് അര്‍ജന്റീനന്‍ ടീമിന്റെ ടൂറില്‍ കേരളത്തേയും ഉള്‍പ്പെടുത്തിയത്. സംസ്ഥാനത്തെത്തുന്ന ടീം രണ്ട് സൗഹൃദ മത്സരങ്ങള്‍ കളിക്കുമെന്നാണ് സൂചന.
Related News
