ദുബായ്: സിബിഎസ്ഇക്ക് ആഗോളതലത്തില്‍ വര്‍ധിച്ചുവരുന്ന സ്വീകാര്യത കണക്കിലെടുത്ത് രാജ്യാന്തര ബോര്‍ഡ് രൂപീകരിക്കുമെന്ന് കേന്ദ്ര വിദ്യാഭ്യാസ മന്ത്രി ധര്‍മേന്ദ്ര പ്രധാന്‍ പ്രസ്താവിച്ചു. സിബിഎസ്ഇ പാഠ്യപദ്ധതി കൂടുതല്‍ രാജ്യങ്ങളിലേക്ക് വ്യാപിപ്പിക്കുകയും ഇന്ത്യന്‍ വിദ്യാഭ്യാസ സമ്പ്രദായം ആഗോളനിലവാരത്തിലേക്ക് ഉയര്‍ത്തുകയുമാണ് ലക്ഷ്യം. ബോര്‍ഡ് രൂപീകരണത്തില്‍ കേന്ദ്ര സര്‍ക്കാര്‍ തീരുമാനം എടുത്തു കഴിഞ്ഞതായി മന്ത്രി ദുല്‍ബായ് ഇന്ത്യന്‍ കോണ്‍സുലേറ്റില്‍ നടത്തിയ വാര്‍ത്താസമ്മേളനത്തില്‍ പറഞ്ഞു.
ലോകത്തെങ്ങുമുള്ള ഇന്ത്യന്‍ വിദ്യാര്‍ഥികള്‍ക്ക് ഗുണമേന്മയുള്ള വിദ്യാഭ്യാസം ഉറപ്പാക്കുക, ഭാവിയിലെ ആവശ്യങ്ങള്‍ മുന്നില്‍ക്കണ്ട് സിബിഎസ്ഇയെ ആഗോളതലത്തില്‍ ശക്തിപ്പെടുത്തുക എന്നിവയാണ് ബോര്‍ഡ് രൂപീകരണംകൊണ്ട് ഉ്‌ദ്ദേശിക്കുന്നതെന്ന് മന്ത്രി വിശദീകരിച്ചു. യുഎഇയില്‍ കൂടുതല്‍ ഇന്ത്യന്‍ സിലബസ് സ്‌കൂളുകള്‍ തുറക്കാന്‍ യുഎഇ സര്‍ക്കാര്‍ ആവശ്യപ്പെട്ടിട്ടുണ്ടെന്നും ധര്‍മേന്ദ്ര പ്രധാന്‍ പറഞ്ഞു.
യുഎഇയിലെ ഇന്ത്യന്‍ സ്‌കൂളുകളില്‍ പഠിക്കുന്ന എല്ലാ വിദ്യാര്‍ഥികളെയും താമസിയാതെ 'ആപാര്‍' (ഓട്ടോമേറ്റഡ് പെര്‍മനെന്റ് അക്കാദമിക് അക്കൗണ്ട് റജിസ്ട്രി) എന്ന ഒറ്റ അക്കൗണ്ടിന് കീഴില്‍ കൊണ്ടുവരും. വിദ്യാഭ്യാസ മന്ത്രാലയത്തിന്റെ 'ഒരു രാജ്യം, ഒരു വിദ്യാര്‍ഥി തിരിച്ചറിയല്‍ കാര്‍ഡ്' പദ്ധതിയുടെ ഭാഗമാണിത്. ഇതുവഴി വിദ്യാര്‍ഥികളുടെ അക്കാദമിക വിവരങ്ങള്‍ ഡിജിറ്റലായി സൂക്ഷിക്കാന്‍ സാധിക്കുമെന്ന് മന്ത്രി പറഞ്ഞു.
രണ്ടു ദിവസത്തെ സന്ദര്‍ശനത്തിനെത്തിയ മന്ത്രി ദുബായിലെ ഐഐഎം അഹമ്മദാബാദ് ഉദ്ഘാടനച്ചടങ്ങിലും പങ്കെടുത്തു. യുഎഇയിലെ ഇന്ത്യന്‍ സമൂഹവുമായി അദ്ദേഹം കൂടിക്കാഴ്ച നടത്തുകയും വിദ്യാഭ്യാസ മേഖലയിലെ സഹകരണം സംബന്ധിച്ച് യുഎഇ അധികൃതരുമായി ചര്‍ച്ച നടത്തുകയും ചെയ്തു.
കേന്ദ്ര വിദ്യാഭ്യാസ മന്ത്രി ധര്‍മേന്ദ്ര പ്രധാന്‍ യുഎഇ ഉന്നത വിദ്യാഭ്യാസ, ശാസ്ത്ര ഗവേഷണ മന്ത്രി ഡോ. അബ്ദുല്‍റഹ്‌മാന്‍ അല്‍ അവാറുമായി കൂടിക്കാഴ്ച നടത്തി. ഇന്ത്യയും യുഎഇയും തമ്മിലുള്ള വിദ്യാഭ്യാസ സഹകരണം ഇരുരാജ്യങ്ങള്‍ക്കും ഗുണകരമാകും വിധത്തില്‍ പുതിയ തലത്തിലേക്ക് കൊണ്ടു പോകാന്‍ സഹായകരമായ പദ്ധതികളെക്കുറിച്ചാണ് ഇരുവരും ചര്‍ച്ച ചെയ്തത്. വിദ്യാഭ്യാസ, വിജ്ഞാന മേഖലകളിലെ നവീകരണം, സംയുക്ത ഗവേഷണം, വിദ്യാഭ്യാസ സ്ഥാപനങ്ങളുടെ ശേഷി വര്‍ധിപ്പിക്കല്‍, സംയുക്ത സാംസ്‌കാരിക, വിദ്യാഭ്യാസ കേന്ദ്രങ്ങള്‍ എന്നിവയാണ് പുതിയ പദ്ധതികളില്‍ പരിഗണനയിലുള്ളത്.
ഫോട്ടോ: കേന്ദ്ര വിദ്യാഭ്യാസ മന്ത്രി ധര്‍മേന്ദ്ര പ്രധാന്‍ യുഎഇ ഉന്നത വിദ്യാഭ്യാസ, ശാസ്ത്ര ഗവേഷണ മന്ത്രി ഡോ. അബ്ദുല്‍റഹ്‌മാന്‍ അല്‍ അവാറുമായി കൂടിക്കാഴ്ച നടത്തിയപ്പോള്‍.
Related News
