ജിദ്ദ: ബ്ലൂസ്റ്റാര്‍ ക്ലബ്ബിന്റെ ആഭിമുഖ്യത്തില്‍ ജിദ്ദ ഖാലിദ് ബിന്‍ വലീദ് അല്‍ റുസൂഫ് സ്റ്റേഡിയത്തില്‍ നടന്നു വരുന്ന ആറാമത് അബീര്‍ ബ്ലൂസ്റ്റാര്‍ സോക്കര്‍ ഫെസ്റ്റിന്റെ നാലാം ദിവസമായ ഇന്ന് നാല് മത്സരങ്ങള്‍ ഉണ്ടായിരിക്കും. വൈകുന്നേരം ഏഴു മണിക്ക് പതിനേഴു വയസ്സിനു താഴെ ഉള്ളവരുടെ ജൂനിയര്‍ ഡിവിഷന്‍ ഫൈനലില്‍ ജിദ്ദയിലെ പ്രമുഖ അക്കാഡമി ടീമുകളായ സ്‌പോര്‍ട്ടിങ് യുണൈറ്റഡ് ജിദ്ദയും ടാലെന്റ് ടീന്‍സ് അക്കാഡമിയും തമ്മില്‍ ഏറ്റുമുട്ടും.
ബി ഡിവിഷനിലെ ആദ്യ മത്സരത്തില്‍ ഡക്‌സോ പാക്ക് ന്യൂ കാസില്‍ എഫ് സി അറബ് ഡ്രീംസ് എ സി സി ബി ടീമിനെ നേരിടും . ബി ഡിവിഷന്‍ രണ്ടാം മത്സരത്തില്‍ വിജയ് മസാല ബി എഫ് സി ബ്ലൂസ്റ്റാര്‍ സീനിയേഴ്‌സ് ക്സൈക്ലോണ്‍ മൊബൈല്‍ അക്സെസ്സറിസ് ഐ ടി സോക്കര്‍ എഫ് സിയുമായി ഏറ്റുമുട്ടും.
ടൂര്‍ണമെന്റിന്റെ സെമി ഫൈനലില്‍ പ്രവേശിക്കണമെങ്കില്‍ നാല് ടീമുകള്‍ക്കും ജയം അനിവാര്യമാണ്.
സൂപ്പര്‍ ലീഗിലെ നിര്‍ണായക മത്സരത്തില്‍ സിഫ് ഫുട്‌ബോളിലെ ക്ലാസിക് പോരാട്ടം എന്നറിയപ്പെടുന്ന ചാംസ് സബീന്‍ എഫ് സി - റീം റിയല്‍ കേരള പോരാട്ടവും ഇന്ന് നടക്കും. ആദ്യ മത്സരത്തില്‍ അപ്രതീക്ഷിത തോല്‍വി ഏറ്റുവാങ്ങിയ നിലവിലെ ചാമ്പ്യന്മാരായ സബീന്‍ എഫ് സിക്ക് ഫൈനല്‍ പ്രതീക്ഷ നിലനിര്‍ത്തണമെങ്കില്‍ ജയം അനിവാര്യമാണ്. ജിദ്ദയില്‍ നിന്നുള്ള പ്രമുഖ താരങ്ങള്‍ക്ക് പുറമെ ദമ്മാമ്മില്‍ നിന്നുള്ള താരങ്ങളും നാട്ടില്‍ നിന്നെത്തിയ ഐ എസ് എല്‍, ഐ പി എല്‍ താരങ്ങളായ അബ്ദുല്‍ റഹീം, മുഹമ്മദ് റമീഫ്, മുഹമ്മദ് അര്‍ഷദ് തുടങ്ങിയ പ്രമുഖരും സബീന്‍ എഫ് സി ക്ക് വേണ്ടി ബൂട്ട് കെട്ടും. മറുഭാഗത് ആദ്യ മത്സരത്തിലെ ഉജ്വല വിജയത്തിന്റെ ആത്മവിശ്വാസത്തില്‍ ചെന്നൈ എഫ് സി താരം നൗഫലിന്റെ നേതൃത്വത്തില്‍ ഐ എസ് എല്‍ താരങ്ങളായ അമീന്‍ കോട്ടകുത്തു, മുഹമ്മദ് അജ്സല്‍ എന്നിവര്‍ക്കൊപ്പം ജിദ്ദ, റിയാദ്, ദമ്മാം,യാമ്പു എന്നിവിടങ്ങളില്‍ നിന്നുള്ള പ്രമുഖ താരങ്ങളെ ജേഴ്സി അണിയിച്ചു കൊണ്ട് രണ്ടാം മത്സരവും ജയിച്ചു ഫൈനല്‍ പ്രവേശം ഉറപ്പിക്കാന്‍ റീം റിയല്‍ കേരളയും അണിനിരക്കുമ്പോള്‍ മത്സരം പൊടിപാറുമെന്നുറപ്പാണ്.
