റിയാദ്: ഫിജിയില് നിന്നുള്ള സയാമീസ് ഇരട്ടകളായ ജെസിപെലിയും ഡി സെസെയും വിദഗ്ധ പരിശോധനയ്ക്കായി റിയാദിലെത്തി. റിയാദിലെ കിങ് അബ്ദുല്ല സ്പെഷ്യലൈസ്ഡ് ചില്ഡ്രന് ഹോസ്പിറ്റലിലാണ് (KASCH) കുട്ടികള് എത്തിയിട്ടുള്ളത്. ചികിത്സയുടെ ഭാഗമായി ഇവരെ ശസ്ത്രക്രിയയിലൂടെ വേര്പെടുത്താന് സാധിക്കുമോയെന്ന് ആശുപത്രിയിലെ വിദഗ്ധ ഡോക്ടര്മാരുടെ സംഘം പരിശോധിക്കും. തിരുഗേഹങ്ങളുടെ സേവകന് സല്മാന് രാജാവിന്റെയും കിരീടാവകാശി അമീര് മുഹമ്മദ് ബിന് സല്മാന്റെയും പ്രത്യേക നിര്ദ്ദേശപ്രകാരമാണ് കുട്ടികളെ ആശുപത്രിയില് പ്രവേശിപ്പിച്ചിട്ടുള്ളത്. സൗദി സയാമീസ് ഇരട്ടകളുടെ ചികിത്സാ വിഭാഗം മേധാവി, കെ.എസ്.റിലീഫ് സൂപ്പര്വൈസര് ജനറല് ഡോ. അബ്ദുല്ല അല് റബീഅയുടെ നേതൃത്വത്തിലാണ് കുട്ടികളെ ചികിത്സിക്കുക.
'മാനവസ്നേഹത്തിനും ജീവകാരുണ്യ പ്രവര്ത്തനങ്ങള്ക്കും സൗദി അറേബ്യ നല്കുന്ന മുന്ഗണനയുടെ തെളിവാണ് ഈ പദ്ധതി. സങ്കീര്ണ്ണമായ ഇത്തരം കേസുകള് വിജയകരമായി കൈകാര്യം ചെയ്യുന്നതിലൂടെ ലോകമെമ്പാടുമുള്ള കുടുംബങ്ങള്ക്ക് പ്രതീക്ഷ നല്കാന് രാജ്യത്തിന് സാധിക്കുന്നുണ്ട്,' എന്ന് ഡോ. അബ്ദുല്ല അല് റബീഅ വ്യക്തമാക്കി.
തങ്ങള്ക്ക് ലഭിച്ച ഊഷ്മള സ്വീകരണത്തിനും അടിയന്തര വൈദ്യസഹായത്തിനും സൗദി ഭരണകൂടത്തിനും ജനങ്ങള്ക്കും കുട്ടികളുടെ മാതാപിതാക്കള് ഹൃദയം നിറഞ്ഞ നന്ദി അറിയിച്ചു. സയാമീസ് ഇരട്ടകളെ വേര്പെടുത്തുന്ന ശസ്ത്രക്രിയകളില് ലോകത്തുതന്നെ മുന്നിരയിലാണ് സൗദി അറേബ്യയുടെ ഈ പ്രത്യേക പദ്ധതി.
Related News
