റിയാദ്: സൗദി അറേബ്യ ആതിഥേയത്വം വഹിക്കുന്ന 2027-ലെ ഏഷ്യന്‍ കപ്പ് ഫുട്‌ബോള്‍ ടൂര്‍ണമെന്റിനായുള്ള ഒരുക്കങ്ങളുടെ ഭാഗമായി, തലസ്ഥാന നഗരിയായ റിയാദിലെ ഇമാം മുഹമ്മദ് ബിന്‍ സൗദ് ഇസ്ലാമിക് യൂണിവേഴ്‌സിറ്റി സ്റ്റേഡിയത്തിന്റെ നിര്‍മ്മാണ പ്രവര്‍ത്തനങ്ങള്‍ അതിവേഗം പൂര്‍ത്തിയാകുന്നു. സ്റ്റേഡിയം ഗ്രൗണ്ടില്‍ പ്രകൃതിദത്ത പുല്ല് വെച്ചുപിടിപ്പിക്കുന്ന ജോലികള്‍ ആരംഭിച്ചുകഴിഞ്ഞു. വരും ദിവസങ്ങളില്‍ തന്നെ സ്റ്റേഡിയം ഉദ്ഘാടനത്തിന് സജ്ജമാകും.

കൃത്യമായ സമയക്രമം പാലിച്ചാണ് ഈ വന്‍കിട പ്രോജക്റ്റിന്റെ നിര്‍മ്മാണ പ്രവര്‍ത്തനങ്ങള്‍ പുരോഗമിച്ചത്. മൂന്ന് പ്രധാന ഘട്ടങ്ങളിലായാണ് ഇതിന്റെ നിര്‍മാണം ആസൂത്രണം ചെയ്തത്. 2025 നവംബര്‍ 2 നാണ് ഒന്നാം ഘട്ടം ആരംഭിച്ചത്.

ആധുനിക സവിശേഷതകളോടെ നിര്‍മ്മിക്കുന്ന സ്റ്റേഡിയത്തിന് ഒരേസമയം 22,000 കാണികളെ ഉള്‍ക്കൊള്ളാനുള്ള ശേഷിയുണ്ട്. കളി കാണാനെത്തുന്ന വിഐപി അതിഥികള്‍ക്കായി 135 പേര്‍ക്ക് ഇരിക്കാവുന്ന 9 പ്രത്യേക ബോക്‌സുകളും സജ്ജീകരിച്ചിട്ടുണ്ട്. കൂടാതെ, മാധ്യമ കവറേജ് മികച്ച രീതിയില്‍ ഉറപ്പാക്കുന്നതിനായി 500 മാധ്യമപ്രവര്‍ത്തകരെ ഒരേസമയം ഉള്‍ക്കൊള്ളാന്‍ കഴിയുന്ന അത്യാധുനിക സജ്ജീകരണങ്ങളുള്ള മീഡിയ സെന്ററും സ്റ്റേഡിയത്തില്‍ ഒരുക്കിയിട്ടുണ്ട്.

പുറമെ, കളിക്കാര്‍ക്കായുള്ള ആധുനിക ചേഞ്ചിംഗ് റൂമുകള്‍, പ്രത്യേക പ്രസ് കോണ്‍ഫറന്‍സ് ഹാള്‍, ഔട്ട്‌സൈഡ് ബ്രോഡ്കാസ്റ്റിംഗ് കോംപ്ലക്‌സ് എന്നിവയും സജ്ജീകരിച്ചിട്ടുണ്ട്. അത്യാധുനിക സാങ്കേതികവിദ്യയില്‍ പ്രവര്‍ത്തിക്കുന്ന രണ്ട് ഭീമന്‍ സ്‌ക്രീനുകളാണ് മറ്റൊരു ആകര്‍ഷണം.