ദോഹ: വാഹനാപകടങ്ങളുടെ ഫോട്ടോകളും വീഡിയോകളും സമൂഹമാധ്യമങ്ങളില്‍ പങ്കുവെക്കുന്നത് കുറ്റകരമാണെന്നും, അപകടങ്ങള്‍ മെട്രാഷ് (Metrash2) ആപ്പ് ഉള്‍പ്പെടെയുള്ള ഔദ്യോഗിക ചാനലുകള്‍ വഴി മാത്രം റിപ്പോര്‍ട്ട് ചെയ്യണമെന്നും അധികൃതര്‍ ഓര്‍മിപ്പിച്ചു.
ബന്ധപ്പെട്ട അധികാരികളെ അറിയിക്കുന്നതിനായി മാത്രമാണ് വാഹനമോടിക്കുന്നവര്‍ക്ക് അപകട ദൃശ്യങ്ങള്‍ പകര്‍ത്താന്‍ അനുവാദമുള്ളതെന്ന് കമ്മ്യൂണിറ്റി പോലീസ് ഡിപ്പാര്‍ട്ട്മെന്റിലെ ബോധവല്‍ക്കരണ ഓഫീസര്‍ ക്യാപ്റ്റന്‍ ഖാലിദ് ഹുസൈന്‍ അല്‍ ഷമ്മാരി പറഞ്ഞു. ഒരു ബോധവല്‍ക്കരണ സെമിനാറില്‍ സംസാരിക്കുകയായിരുന്നു അദ്ദേഹം. അപകടങ്ങളുടെ ഫോട്ടോകളോ വീഡിയോകളോ സോഷ്യല്‍ മീഡിയ പ്ലാറ്റ്ഫോമുകളില്‍ പ്രസിദ്ധീകരിക്കുന്നത് കര്‍ശനമായി നിരോധിച്ചിട്ടുണ്ടെന്നും, ഇത്തരം കുറ്റകൃത്യങ്ങള്‍ക്ക് 10,000 ഖത്തര്‍ റിയാല്‍ വരെ പിഴ ചുമത്താമെന്നും ക്യാപ്റ്റന്‍ അല്‍ ഷമ്മാരി മുന്നറിയിപ്പ് നല്‍കി.
അതേസമയം, ഔദ്യോഗിക നടപടിക്രമങ്ങള്‍ക്കായി അപകടസ്ഥലത്തെ ഫോട്ടോകളോ വീഡിയോകളോ എടുക്കുന്നതും മെട്രാഷ് ആപ്പ് വഴി റിപ്പോര്‍ട്ട് ചെയ്യുന്നതും അനുവദനീയമാണ്. മെട്രാഷ് വഴി റിപ്പോര്‍ട്ട് സമര്‍പ്പിക്കുമ്പോള്‍ വാഹനത്തിന്റെ നമ്പര്‍ പ്ലേറ്റും അപകടസ്ഥലത്തിന്റെ നാല് വശങ്ങളില്‍ നിന്നുള്ള ഫോട്ടോകളും ഉള്‍പ്പെടുത്തണമെന്ന് അദ്ദേഹം നിര്‍ദേശിച്ചു.
പൊതുജന സുരക്ഷ ഉറപ്പാക്കുകയും പോലീസും സമൂഹവും തമ്മിലുള്ള സഹകരണം ശക്തിപ്പെടുത്തുകയുമാണ് കമ്മ്യൂണിറ്റി പോലീസിംഗിന്റെ ലക്ഷ്യമെന്ന് അദ്ദേഹം വ്യക്തമാക്കി. പോലീസ് ഉദ്യോഗസ്ഥരുടെ സാന്നിധ്യം ഭയപ്പെടുത്തുന്നതിന് പകരം പൊതുജനങ്ങളില്‍ ആത്മവിശ്വാസം വര്‍ധിപ്പിക്കുന്നതാകണമെന്നും അദ്ദേഹം ചൂണ്ടിക്കാട്ടി.
കമ്മ്യൂണിറ്റി പോലീസ് ഹോട്ട്ലൈന്‍ സേവനങ്ങള്‍ ഒന്നിലധികം ഭാഷകളില്‍ ലഭ്യമാണെന്നും, പരിശീലനം ലഭിച്ച ഉദ്യോഗസ്ഥര്‍ക്ക് വിവിധ രാജ്യങ്ങളില്‍ നിന്നുള്ള പ്രവാസികളെ സഹായിക്കാന്‍ കഴിയുമെന്നും ക്യാപ്റ്റന്‍ അല്‍ ഷമ്മാരി കൂട്ടിച്ചേര്‍ത്തു. സഹായം തേടുന്നവരിലേക്ക് കൃത്യമായി സേവനങ്ങള്‍ എത്തുന്നുണ്ടെന്ന് ഉറപ്പാക്കാന്‍ പ്രത്യേക സംവിധാനങ്ങള്‍ ഒരുക്കിയിട്ടുണ്ടെന്നും അദ്ദേഹം പറഞ്ഞു.
Related News
