ജിദ്ദ- കഴിഞ്ഞ ഉംറ സീസണിലെ പ്രവര്‍ത്തന വിലയിരുത്തലുകളുടെയും പരിശോധനകളുടെയും അടിസ്ഥാനത്തില്‍ നിയമലംഘനം നടത്തിയ 21 ഉംറ കമ്പനികളുടെ ലൈസന്‍സ് സൗദി ഹജ്ജ്-ഉംറ മന്ത്രാലയം താല്‍ക്കാലികമായി റദ്ദാക്കി. പുതിയ ഉംറ സീസണിന് മുന്നോടിയായുള്ള ഒരുക്കങ്ങളുടെ ഭാഗമായാണ് നടപടി. അല്ലാഹുവിന്റെ അതിഥികളായെത്തുന്ന തീര്‍ത്ഥാടകര്‍ക്ക് മികച്ചതും കുറ്റമറ്റതുമായ സേവനങ്ങള്‍ ഉറപ്പാക്കുന്നതിനും മന്ത്രാലയത്തിന്റെ നിര്‍ദ്ദേശങ്ങള്‍ കര്‍ശനമായി പാലിക്കുന്നുണ്ടെന്ന് ഉറപ്പുവരുത്തുന്നതിനുമാണ് ഈ കടുത്ത തീരുമാനം കൈക്കൊണ്ടിട്ടുള്ളത്.
അംഗീകൃത സൂചകങ്ങള്‍ അനുസരിച്ച് നടത്തിയ വിലയിരുത്തലില്‍ ഏറ്റവും പിന്നില്‍ പോയ 15 കമ്പനികള്‍ക്കെതിരെയും, ഉംറ സേവനങ്ങളുമായി ബന്ധപ്പെട്ട ചട്ടങ്ങളും നിര്‍ദ്ദേശങ്ങളും ലംഘിച്ച മറ്റ് 6 കമ്പനികള്‍ക്കെതിരെയുമാണ് നടപടിയെന്ന് മന്ത്രാലയം വ്യക്തമാക്കി. തീര്‍ത്ഥാടകര്‍ക്ക് നല്‍കുന്ന സേവനങ്ങളുടെ ഗുണനിലവാരം അളക്കുന്നതിനും കമ്പനികള്‍ എത്രത്തോളം നിയന്ത്രണങ്ങള്‍ പാലിക്കുന്നുണ്ടെന്ന് നിരീക്ഷിക്കുന്നതിനും വിപുലമായ വിലയിരുത്തല്‍ സംവിധാനമാണ് മന്ത്രാലയം ഒരുക്കിയിട്ടുള്ളത്. സേവന ദാതാക്കള്‍ക്കിടയില്‍ ആരോഗ്യകരമായ മത്സരം വളര്‍ത്താനും സൗദി വിഷന്‍ 2030-ന്റെ ലക്ഷ്യങ്ങള്‍ കൈവരിക്കാനും ഇത് സഹായിക്കും.
തീര്‍ത്ഥാടകര്‍ക്ക് സുരക്ഷിതവും സവിശേഷവുമായ അനുഭവം ഉറപ്പാക്കാന്‍ മന്ത്രാലയം വിട്ടുവീഴ്ചയില്ലാത്ത നിലപാടാണ് സ്വീകരിക്കുന്നത്. സേവനങ്ങളിലെ പോരായ്മകളോ തീര്‍ത്ഥാടകരുടെ അവകാശങ്ങളിലുള്ള വിട്ടുവീഴ്ചകളോ ഒരു തരത്തിലും വെച്ചുപൊറുപ്പിക്കില്ലെന്ന് ഹജ്ജ്-ഉംറ മന്ത്രാലയം ആവര്‍ത്തിച്ചു വ്യക്തമാക്കി. ഉംറ കമ്പനികളുടെ തുടര്‍ച്ചയായ മൂല്യനിര്‍ണ്ണയം ഈ മേഖലയുടെ വികസനത്തിനും ഗുണനിലവാരം ഉയര്‍ത്തുന്നതിനുമുള്ള പ്രധാന മാര്‍ഗമായി തുടരുമെന്നും നിയമങ്ങള്‍ ലംഘിക്കുന്നവര്‍ക്കെതിരെ ശക്തമായ നടപടികള്‍ തുടരുമെന്നും മന്ത്രാലയം മുന്നറിയിപ്പ് നല്‍കി.
Related News
