ഈസ്റ്റ് റഥര്‍ഫോഡ്- അമേരിക്കയിലെ ഈസ്റ്റ് റഥര്‍ഫോഡില്‍ സ്പോര്‍ട്സ് പ്രേമികള്‍ കാത്തിരുന്ന ലോകകപ്പിലെ കനത്ത പോരാട്ടം അതിന്റെ എല്ലാ ആവേശവും നിലനിര്‍ത്തി. ഗ്രൂപ്പ് ഘട്ടത്തിലെ ഏറ്റവും ആകര്‍ഷകമായ മത്സരമെന്ന് വിശേഷിപ്പിക്കപ്പെട്ട ബ്രസീല്‍-മൊറോക്കോ പോരാട്ടം കളി മികവുകൊണ്ടും ഗാലറിയിലെ ആരവം കൊണ്ടും ന്യൂയോര്‍ക്ക് ന്യൂജേഴ്‌സി സ്റ്റേഡിയത്തെ അക്ഷരാര്‍ത്ഥത്തില്‍ അഗ്നിപടര്‍ത്തി. 80,000-ത്തിലധികം വരുന്ന കാണികളാല്‍ നിറഞ്ഞുകവിഞ്ഞ സ്റ്റേഡിയത്തില്‍ ആദ്യ പകുതിയിലെ രണ്ട് തകര്‍പ്പന്‍ ഗോളുകളും അവസാന നിമിഷങ്ങളിലെ വന്യമായ പോരാട്ടവീര്യവും ആരാധകരെ ആവേശത്തിന്റെ കൊടുമുടിയിലെത്തിച്ചു.

എന്നാല്‍, ആവേശകരമായ ആ 1-1 സമനില ചരിത്രപ്രസിദ്ധമായ ആ കായികരാത്രിയുടെ പകുതി മാത്രമായിരുന്നു. റഫറിയുടെ ഫൈനല്‍ വിസില്‍ മുഴങ്ങിയതോടെ പ്രാദേശിക ആരാധകര്‍ സ്റ്റേഡിയത്തില്‍ നിന്നും കൂട്ടത്തോടെ ബാസ്‌കറ്റ്ബോള്‍ കോര്‍ട്ടിലേക്ക് പാഞ്ഞു. എന്‍.ബി.എ ഫൈനല്‍സിലെ അഞ്ചാം മത്സരത്തില്‍ സാന്‍ അന്റോണിയോ സ്പര്‍സിനെതിരെ ന്യൂയോര്‍ക്ക് നിക്സ് നാടകീയ വിജയം നേടുന്നത് കാണാനായിരുന്നു അത്. 1973-ന് ശേഷം നിക്സ് സ്വന്തമാക്കുന്ന ആദ്യ ചാമ്പ്യന്‍ഷിപ്പ് കിരീടമായിരുന്നു ഇത്. അങ്ങനെ ഒരേ രാത്രിയില്‍ ഫുട്ബോള്‍ സാംബയും ബാസ്‌കറ്റ്ബോള്‍ പൂരാവേശവും ഒത്തുചേര്‍ന്നപ്പോള്‍ ഇരു സംസ്ഥാനങ്ങളും കായിക ലഹരിയിലമര്‍ന്നു.

മത്സരത്തിന് നാല് മണിക്കൂര്‍ മുമ്പ് തന്നെ ന്യൂജേഴ്‌സിയിലെ സെക്കൗക്കസ് റെയില്‍വേ സ്റ്റേഷനിലേക്ക് ആരാധകരുടെ പ്രവാഹം തുടങ്ങിയിരുന്നു. ന്യൂയോര്‍ക്കില്‍ നിന്നും ന്യൂജേഴ്‌സിയില്‍ നിന്നും സ്റ്റേഡിയത്തിലേക്കുള്ള യാത്രാക്കൂലി 98 ഡോളര്‍ എന്ന വലിയ തുകയായിരുന്നിട്ടും, അതൊന്നും വകവെക്കാതെ ആരാധകര്‍ സ്റ്റേഡിയത്തിലേക്ക് കുതിച്ചു. സ്റ്റേഡിയത്തിന് പുറത്ത് ഡ്രമ്മുകളും സംഗീതോപകരണങ്ങളുമായി തടിച്ചുകൂടിയ ബ്രസീലിയന്‍ ആരാധകര്‍ സാംബ നൃത്തച്ചുവടുകളുമായി ആട്ടവും പാട്ടുമായി കളം നിറഞ്ഞപ്പോള്‍ മൊറോക്കന്‍ ആരാധകരും അവര്‍ക്കൊപ്പം പാട്ടുപാടാന്‍ ഒപ്പം ചേരുകയായിരുന്നു.

അഞ്ച് വട്ട ലോകചാമ്പ്യന്മാരായ ബ്രസീല്‍ തങ്ങളുടെ ആദ്യ മത്സരത്തില്‍ തകര്‍പ്പന്‍ വിജയം നേടുമെന്ന ഉറച്ച വിശ്വാസത്തിലായിരുന്നു കാനറി ആരാധകര്‍. തങ്ങളുടെ ടീമിന്റെ വിജയസാധ്യതകളില്‍ ആശങ്കയില്ലെന്ന് റിക്കാര്‍ഡോ എന്ന ആരാധകന്‍ വ്യക്തമാക്കിയപ്പോള്‍, മൊറോക്കന്‍ ആരാധകര്‍ നേരിയ ഭയത്തോടെയാണ് മത്സരത്തെ സമീപിച്ചത്. 2022-ലെ ഖത്തര്‍ ലോകകപ്പില്‍ സെമിഫൈനലില്‍ എത്തിയ ആദ്യ ആഫ്രിക്കന്‍-അറബ് രാജ്യമെന്ന ഖ്യാതിയോടെയാണ് മൊറോക്കോ എത്തിയതെങ്കിലും, അന്നത്തെ അത്ര കരുത്തര്‍ ഇപ്പോഴത്തെ ടീമിലില്ലെന്ന ആശങ്ക ചില ആരാധകര്‍ പങ്കുവെച്ചിരുന്നു.

കിക്ക്-ഓഫിന് തൊട്ടുമുമ്പ് സ്റ്റേഡിയം കാര്‍ലോ ആന്‍സലോട്ടിയുടെ ബ്രസീലിനെ പിന്തുണയ്ക്കുന്ന മഞ്ഞക്കടലായി മാറി. പോര്‍ച്ചുഗീസ് ഭാഷയിലുള്ള പാട്ടുകളും ഡ്രമ്മിന്റെ ശബ്ദവും സ്റ്റേഡിയത്തെ പ്രകമ്പനം കൊള്ളിച്ചു. എന്നാല്‍ കളിക്കളത്തില്‍ പന്ത് തട്ടിയത് മൊറോക്കോ ആയിരുന്നു. അതിന്റെ ഫലമായി 21-ാം മിനിറ്റില്‍ ഇസ്മായില്‍ സൈബാരിയുടെ സുന്ദരമായൊരു ചിപ്പ് ഷോട്ടിലൂടെ മൊറോക്കോ ലീഡെടുത്തു. ഈ ഗോളോടെ സ്റ്റേഡിയത്തിലെ ചുവപ്പണിഞ്ഞ മൊറോക്കന്‍ ക്യാമ്പ് 'വിവ മാഗ്രിബ്' വിളികളാല്‍ മുഖരിതമായി.

തിരിച്ചടിക്കാന്‍ ഉറച്ച ബ്രസീലിയന്‍ ആരാധകര്‍ ഗാലറിയില്‍ തങ്ങളുടെ പാട്ടിന്റെ ശബ്ദം കൂട്ടി കളിക്കാരെ ആവേശഭരിതരാക്കി. കൃത്യം 11 മിനിറ്റുകള്‍ക്കകം സൂപ്പര്‍ ഫോര്‍വേഡ് വിനീഷ്യസ് ജൂനിയര്‍ ബോക്സിനുള്ളില്‍ കണ്ടെത്തിയ ചെറിയൊരു സ്പേസില്‍ നിന്നും തൊടുത്ത പന്ത് പോസ്റ്റിന്റെ ടോപ്പ് റൈറ്റ് കോര്‍ണറിലേക്ക് തുളച്ചുകയറി (1-1). രണ്ടാം പകുതിയുടെ അധിക സമയത്ത് മൊറോക്കോക്ക് ജയം ഉറപ്പിക്കാനുള്ള സുവര്‍ണ്ണാവസരം ലഭിച്ചെങ്കിലും അത് നഷ്ടപ്പെടുത്തി. മത്സരം സമനിലയില്‍ കലാശിച്ചപ്പോള്‍ ബ്രസീല്‍ ആരാധകര്‍ നിരാശരായെങ്കിലും മൊറോക്കന്‍ ആരാധകര്‍ തങ്ങള്‍ ഇത്തവണ ഫൈനലില്‍ എത്തുമെന്ന ആത്മവിശ്വാസം പ്രകടിപ്പിച്ചു.

മത്സരശേഷം ഇരുവിഭാഗം ആരാധകരും പുഞ്ചിരിയോടെയാണ് കളം വിട്ടത്. ഹഡ്സണ്‍ നദി കടന്ന് കളികാണാന്‍ എത്തിയ പലരും പിന്നീട് ബാസ്‌കറ്റ്ബോള്‍ ഫൈനലിന്റെ ആവേശത്തിലേക്ക് വഴിമാറി. 'ലെറ്റ്സ് ഗോ നിക്സ്' എന്ന വിളികളുമായി ആരാധകര്‍ ബാറുകളിലേക്കും ടിവി സ്‌ക്രീനുകളിലേക്കും പാഞ്ഞു. മൂന്ന് മണിക്കൂറിന് ശേഷം സാന്‍ അന്റോണിയോക്കെതിരെ 94-90 എന്ന സ്‌കോറിന് ന്യൂയോര്‍ക്ക് നിക്സ് ചരിത്രവിജയം കുറിച്ചപ്പോള്‍ ഇരു സംസ്ഥാനങ്ങളിലും വന്‍ ആഹ്ലാദപ്രകടനങ്ങളും കരിമരുന്ന് പ്രയോഗങ്ങളുമാണ് അരങ്ങേറിയത്.