അരിപ്ര: വിദ്യാഭ്യാസ, സാമൂഹിക, സാംസ്‌കാരിക രംഗങ്ങളില്‍ മികവ് തെളിയിച്ച വ്യക്തികളെയും വിദ്യാര്‍ത്ഥികളെയും ആദരിക്കുന്നതിനായി ബ്രദേഴ്സ് അരിപ്ര സംഘടിപ്പിച്ച 'സമ്മാന സുദിനം' അരിപ്ര സ്‌കൂളില്‍ വിപുലമായ ജനപങ്കാളിത്തത്തോടെ നടന്നു. മുന്‍ ജില്ലാ പഞ്ചായത്ത് സീനിയര്‍ സൂപ്രണ്ട് അബ്ദുല്‍ ഗഫൂര്‍ തോടേങ്ങല്‍ പരിപാടി ഉദ്ഘാടനം ചെയ്തു. ബ്രദേഴ്സ് അരിപ്ര ചീഫ് കോര്‍ഡിനേറ്റര്‍ ഫൈസല്‍ കെ.വി. അധ്യക്ഷത വഹിച്ചു. എഡ്യൂക്കേഷന്‍ കോര്‍ഡിനേറ്റര്‍ പ്രൊഫ. ഹംസ മാസ്റ്റര്‍ സ്വാഗതം ആശംസിച്ചു. ഗ്ലോബല്‍ കോര്‍ഡിനേറ്റര്‍ അബ്ദുല്‍ അസീസ് തങ്കയത്തില്‍ മുഖ്യപ്രഭാഷണം നടത്തി. വിദ്യാര്‍ത്ഥികള്‍ക്കായി അദ്ദേഹം പ്രത്യേക പരിശീലന ക്ലാസും പ്രചോദനാത്മക സന്ദേശവും നല്‍കി.
ചടങ്ങില്‍ വിദ്യാഭ്യാസ രംഗത്ത് മികവ് പുലര്‍ത്തിയ എല്‍.എസ്.എസ്, യു.എസ്.എസ് വിജയികളായ 15 വിദ്യാര്‍ത്ഥികളെയും, എസ്.എസ്.എല്‍.സി , പ്ലസ് ടു പരീക്ഷകളില്‍ ഉന്നത വിജയം നേടിയ 54 വിദ്യാര്‍ത്ഥികളെയും അനുമോദിച്ചു. വിവിധ മേഖലകളില്‍ ശ്രദ്ധേയ നേട്ടങ്ങള്‍ കൈവരിച്ച വ്യക്തികളെയും ചടങ്ങില്‍ ആദരിച്ചു. ഡോ. പി. ഹാനി ഹസ്സന്‍ (നാഷണല്‍ ബോര്‍ഡ് ഓഫ് എക്‌സാമിനേഷന്‍സ് ഇന്‍ മെഡിക്കല്‍ സയന്‍സസ് പുരസ്‌കാരം), ഡോ. ഷമീര്‍ തോടേങ്ങല്‍ (മികച്ച യുവ ഡോക്ടര്‍ക്കുള്ള സംസ്ഥാന പുരസ്‌കാരം), ഡോ. ഷബ്ന നിസാര്‍ (കൊമേഴ്സില്‍ പി.എച്ച്.ഡി), ഗഫൂര്‍ മാമ്പ്ര (മികച്ച കര്‍ഷകന്‍), അമീന്‍ മാമ്പ്ര (മികച്ച ഫുട്‌ബോളര്‍), സമീറ മാമ്പ്ര (സാന്ത്വന രംഗത്തെ മികച്ച സേവനം) എന്നിവര്‍ക്ക് ഉപഹാരങ്ങള്‍ നല്‍കി ആദരിച്ചു.
സാമൂഹിക-സാംസ്‌കാരിക രംഗത്തെ പ്രമുഖര്‍ അവാര്‍ഡുകള്‍ വിതരണം ചെയ്തു. ശിഹാര്‍ മാസ്റ്റര്‍ പരിപാടിയുടെ കോര്‍ഡിനേഷന്‍ നിര്‍വഹിച്ചു. വര്‍ക്കിംഗ് കമ്മിറ്റി കോര്‍ഡിനേറ്റര്‍ ഇബ്രാഹിം മാസ്റ്റര്‍ നന്ദി പറഞ്ഞു. നാടിന്റെ വിദ്യാഭ്യാസ-സാമൂഹിക പുരോഗതിക്കായി ഇത്തരം പ്രവര്‍ത്തനങ്ങള്‍ തുടര്‍ന്നും സംഘടിപ്പിക്കുമെന്ന് സംഘാടകര്‍ അറിയിച്ചു.
