ജിദ്ദ: ഒഐസിസി വെസ്റ്റേൺ റീജ്യണൽ കമ്മിറ്റി പ്രസിഡണ്ട് ഹക്കീം പാറക്കലിന്റെ നേതൃത്വത്തിൽ മുഖ്യമന്ത്രി ശ്രീ വി.ഡി. സതീശനുമായി കൂടിക്കാഴ്ച നടത്തുകയും പ്രവാസി സമൂഹത്തിന്റെ വിവിധങ്ങളായ ആവശ്യങ്ങളും നിർദ്ദേശങ്ങളുമടങ്ങുന്ന നിവേദനം നൽകുകയും ചെയ്തു. പ്രവാസി കാര്യ വകുപ്പ് ചുമതല കൂടി വഹിക്കുന്ന മുഖ്യമന്ത്രിക്ക് പ്രവാസി സമൂഹം നേരിടുന്ന വിവിധ പ്രശ്നങ്ങളും പരിഹാര നിർദ്ദേശങ്ങളുമടങ്ങുന്ന നിവേദനത്തിൽ പ്രധാനമായും സർക്കാർ സേവനങ്ങളിൽ കാലതാമസമൊഴിവാക്കുന്നതിന് പ്രവാസികൾക്കായി ഒരു ഫാസ്റ്റ് ട്രാക്ക് സംവിധാനം, നോർക്ക കെയർ ഇൻഷുറൻസ് പദ്ധതി കൂടുതൽ പ്രയോജനകരമാക്കൽ, ക്ഷേമനിധി പദ്ധതി കൂടുതൽ പേർക്ക് പ്രയോചനപ്പെടുത്തുവാൻ കഴിയുന്ന ഇളവുകൾ വരുത്തിയുള്ള പരിഷ്കരണം, പെൻഷൻ തുക വർദ്ധിപ്പിക്കൽ, ലോക കേരള സഭയുടെ പ്രവർത്തനങ്ങൾ ഫലപ്രദമാക്കുവാനും സാധാരണക്കാരായ പ്രവാസികൾക്ക് പങ്കാളിത്തം ഉറപ്പ് നൽകുന്ന തരത്തിലുള്ള അഴിച്ചുപണി, വിവിധ തലത്തിൽ പ്രവാസി നിക്ഷേപങ്ങൾ ഉൾപ്പെടുത്തിയുള്ള പുനരധിവാസ പദ്ധതി, പ്രവാസി വിദ്യാർത്ഥികളുടെ ഉന്നത വിദ്യാഭ്യാസവുമായി ബന്ധപ്പെട്ട കാര്യങ്ങൾ, യാത്ര പ്രശ്നങ്ങൾ പരിഹരിക്കുന്നതിനുതകുന്ന നിർദ്ദേശങ്ങൾ, പ്രവാസികൾക്ക് നിയമസഹായത്തിനുള്ള ഫലപ്രദമായ ലീഗൽ സെൽ എന്നിവ നിവേദനത്തിൽ ഉൾപ്പെടുത്തിയിട്ടുള്ളതായി ഒഐസിസി ജിദ്ദ റീജ്യണൽ കമ്മിറ്റി നേതാക്കൾ അറിയിച്ചു. തികച്ചും അനുഭാവപൂർണ്ണമായ സമീപനമാണ് മുഖ്യമന്ത്രിയിൽ നിന്നുമുണ്ടായതെന്നും മുഖ്യമന്ത്രി തന്നെ പ്രവാസികാര്യ വകുപ്പ് കൈകാര്യം ചെയ്യുന്നതു ഏറെ പ്രതീക്ഷാ നിർഭരമാണെന്നും ഒഐസിസി വെസ്റ്റേൺ റീജ്യണൽ കമ്മിറ്റി നേതാക്കൾ പറഞ്ഞു. കൂടിക്കാഴ്ചയിൽ മുഖ്യമന്ത്രിയെ സൗദി സന്ദർശനത്തിനായി ക്ഷണിക്കുകയും ചെയ്തതായി ഒഐസിസി നേതാക്കൾ അറിയിച്ചു. ഒഐസിസി ബാലവേദി ഭാരവാഹിയും ജിദ്ദയിലെ യുവ എഴുത്തുകാരനുമായ മുഹമ്മത് അമാൻ എഴുതിയ ദി ഡ്രീം എന്ന പുസ്തകം മുഖ്യമന്ത്രിക്ക് സമ്മാനിച്ചു. മുഹമ്മത് അമാനെ മുഖ്യമന്ത്രി പ്രത്യകം അഭിനന്ദിച്ചു.
ഒഐസിസി റീജ്യണൽ കമ്മിറ്റി ജന: സെക്രട്ടറി അസ്ഹാബ് വർക്കല, ദേശീയ കമ്മിറ്റി വൈ. പ്രസിഡണ്ട് നിസാമുദ്ധീൻ, ജന. സെക്രട്ടറി അഷ്‌റഫ് അഞ്ചാലൻ, സെക്രട്ടറി മുസ്തഫ ചേളാരി, ജോ. ട്രഷറർ ഷൗക്കത്ത് പരപ്പനങ്ങാടി, ജില്ലാ കമ്മിറ്റി ഭാരവാഹികളായ ഫിറോസ് പോരൂർ, ഷാനു മോൻ കരമന, എം. ടി. ഗഫൂർ, റാഷിദ് വർക്കല, ഉമ്മർ പാറമ്മൽ എന്നിവരാണ് മുഖ്യമന്ത്രിയുമായുള്ള കൂടിക്കാഴ്ചയിൽ പങ്കെടുത്തത്.