ജുബൈല്‍/റിയാദ്: സൗദി അറേബ്യയിലെ ജുബൈലിലും റിയാദിരുമായി രണ്ട് മലയാളികള്‍ മരിച്ചു. പെരുമ്പാവൂര്‍ സ്വദേശി ജുബൈലിലുണ്ടായ അപകടത്തിലും തൃശൂര്‍ സ്വദേശി റിയാദില്‍ രോഗബാധയെത്തുടര്‍ന്നുമാണ് മരണപ്പെട്ടത്.
പെരുമ്പാവൂര്‍ വളയന്‍ചിറങ്ങര കൂറ്റനാട്ടുപറമ്പില്‍ വീട്ടില്‍ മുസ്തഫ (35) ആണ് ജുബൈലില്‍ നിര്യാതനായത്. തിങ്കളാഴ്ച ജുബൈലിലെ റെഡിമിക്‌സ് കമ്പനിയിലുണ്ടായ അപകടത്തെ തുടര്‍ന്നായിരുന്നു മരണം. മയ്യിത്ത് നാട്ടിലെത്തിക്കാനുള്ള നടപടിക്രമങ്ങള്‍ ജുബൈല്‍ കെ.എം.സി.സി. പ്രവര്‍ത്തകര്‍ നടത്തിവരുന്നു. ഖബറടക്കം പിന്നീട് നാട്ടില്‍ നടക്കും.
തൃശൂര്‍ പഴയന്നൂര്‍ പൊറ്റ സ്വദേശി ഇബ്രാഹിം സിദ്ദീഖ് (58) ആണ് റിയാദില്‍ മരിച്ചത്. അര്‍ബുദ രോഗബാധയെ തുടര്‍ന്ന് ശുമൈസി കിങ് സഊദ് ജനറല്‍ ആശുപത്രിയില്‍ ചികിത്സയിലിരിക്കെയായിരുന്നു മരണം. ശാരീരിക ബുദ്ധിമുട്ടുകളെ തുടര്‍ന്ന് ആദ്യം അല്‍ ഇമാന്‍ ജനറല്‍ ആശുപത്രിയില്‍ ചികിത്സ തേടിയപ്പോഴാണ് രോഗം സ്ഥിരീകരിച്ചത്. തുടര്‍ന്ന് വിദഗ്ധ ചികിത്സക്കായി രണ്ടാഴ്ച മുമ്പാണ് ഇദ്ദേഹത്തെ ശുമൈസി ആശുപത്രിയിലേക്ക് മാറ്റിയത്.
കഴിഞ്ഞ 20 വര്‍ഷത്തിലേറെയായി റിയാദില്‍ ഇസ്തിറാഹ (വിശ്രമകേന്ദ്രം) മേല്‍നോട്ടക്കാരനായി ജോലി ചെയ്തു വരികയായിരുന്നു. പരേതനായ ഇബ്രാഹിമിന്റെയും നബീസയുടെയും മകനാണ്. ഭാര്യ: മുബീന. മക്കള്‍: സിയാദ്, സിനാന്‍, ഷയാന്‍, ഷഫ്‌ന. സഹോദരന്‍: അസീസ് (റിയാദ്).
ശുമൈസി മോര്‍ച്ചറിയിലുള്ള മൃതദേഹം നിയമനടപടികള്‍ പൂര്‍ത്തിയാക്കി നാട്ടിലെത്തിച്ച് സംസ്‌കരിക്കുന്നതിനുള്ള ശ്രമങ്ങള്‍ക്ക് കെ.എം.സി.സി നേതാക്കള്‍ നേതൃത്വം വഹിച്ചു വരുന്നു.
Related News
