തിരുവനന്തപുരം: മുഖ്യമന്ത്രിയെ തീരുമാനിക്കാനുള്ള ചുമതല കോണ്ഗ്രസ് ഹൈക്കമാന്ഡിലേക്ക്. കോണ്ഗ്രസിന്റെ നിയമസഭാകക്ഷി നേതാവിനെ തീരുമാനിക്കാന് എ.ഐ.സി.സി അധ്യക്ഷന് മല്ലികാര്ജുന് ഖാര്ഗയെ ചുമതലപ്പെടുത്തി കോണ്ഗ്രസ് നിയമസഭാകക്ഷിയോഗം പ്രമേയം പാസാക്കിയതോടെയാണ് അന്തിമ തീരുമാനം എടുക്കുന്ന ചുമതല ഹൈക്കമാന്ഡിലേക്ക് എത്തിയത്.
കെ.പി.സി.സി അധ്യക്ഷന് സണ്ണി ജോസഫ് അവതരിപ്പിച്ച ഒറ്റവരി പ്രമേയത്തെ പ്രതിപക്ഷ നേതാവ് വി.ഡി. സതീശന് പിന്താങ്ങി. ഹൈക്കമാന്ഡ് നിരീക്ഷകരായ അജയ് മാക്കനും മുകുള് വാസ്നിക്കും യോഗത്തില് സന്നിഹിതരായിരുന്നു.
ഇനി നടക്കാനുള്ളത് നിരീക്ഷകരും ദീപാദാസ് മുന്ഷിയും കോണ്ഗ്രസ് എം.എല്.എമാരുമായുള്ള ഒറ്റയ്ക്കൊറ്റയ്ക്കുള്ള കൂടിക്കാഴ്ചയാണ്. ഈ കൂടിക്കാഴ്ചയില് എം.എല്.എമാര് ആര്ക്കാണ് പിന്തുണയെന്ന് വ്യക്തമാക്കും.
മണ്ഡലത്തിലെ ചില ആവശ്യങ്ങള്ക്ക് മടങ്ങേണ്ടതിനാല് പുതുപ്പള്ളി നിയുക്ത എം.എല്.എ ചാണ്ടി ഉമ്മനാണ് മാക്കനും വാസ്നിക്കും ദീപാ ദാസ് മുന്ഷിയുമായി ആദ്യം കൂടിക്കാഴ്ച നടത്തിയത്. എ.ഐ.സി.സി ഞായറാഴ്ച മുഖ്യമന്ത്രിയെ പ്രഖ്യാപിക്കുമെന്ന് നിരീക്ഷകരുമായുള്ള കൂടിക്കാഴ്ചക്ക് പിന്നാലെ വട്ടിയൂര്ക്കാവില്നിന്നുള്ള നിയുക്ത എം.എല്.എ കെ. മുരളീധരന് പറഞ്ഞു.
നിരീക്ഷകരും എം.എല്.എമാരുമായുള്ള കൂടിക്കാഴ്ചയില്നിന്ന് ദീപാ ദാസ് മുന്ഷിയെ ഒഴിവാക്കണമെന്ന് നേരത്തെ സതീശന് ക്യാമ്പ് ആവശ്യപ്പെട്ടിരുന്നു. എന്നാല്, ഇക്കാര്യം അംഗീകരിക്കപ്പെട്ടില്ല.
Related News
