കൊല്‍ക്കത്ത- പശ്ചിമ ബംഗാള്‍ നിയമസഭാ തിരഞ്ഞെടുപ്പില്‍ ബിജെപിയുടെ വന്‍ മുന്നേറ്റം. ഉച്ച 2 മണിയോടെയുള്ള കണക്കുകള്‍ പ്രകാരം, ഏകദേശം 193 സീറ്റുകളില്‍ ലീഡ് ചെയ്ത് ബിജെപി കരുത്ത് തെളിയിച്ചു. പാര്‍ട്ടിയുടെ ആഭ്യന്തര കണക്കുകൂട്ടലായ 185 സീറ്റുകളെയും മറികടന്നുള്ള ഈ കുതിപ്പിന് പിന്നില്‍ അഞ്ച് പ്രധാന ഘടകങ്ങളാണ് ബിജെപി കേന്ദ്രങ്ങള്‍ ചൂണ്ടിക്കാണിക്കുന്നത്. സുരക്ഷ, വികസനം, സര്‍ക്കാര്‍ ജീവനക്കാരുടെ ക്ഷേമം എന്നിവയിലൂന്നിയുള്ള പ്രവര്‍ത്തനങ്ങളാണ് തങ്ങളെ തുണച്ചതെന്ന് പാര്‍ട്ടി വിലയിരുത്തുന്നു.

സ്ത്രീ വോട്ടര്‍മാരുടെ ശക്തമായ പിന്തുണയാണ് വിജയത്തിന് പിന്നിലെ ആദ്യ ഘടകം. കേന്ദ്ര സര്‍ക്കാര്‍ നടപ്പിലാക്കിയ വനിതാ സംവരണം ബംഗാളിലെ സ്ത്രീ വോട്ടര്‍മാര്‍ക്കിടയില്‍ വലിയ തരംഗമുണ്ടാക്കിയതായി പാര്‍ട്ടി കരുതുന്നു. മുന്‍ തിരഞ്ഞെടുപ്പുകളെ അപേക്ഷിച്ച് സ്ത്രീകളുടെ വോട്ട് അഞ്ച് ശതമാനമെങ്കിലും ബിജെപിക്ക് അനുകൂലമായി വര്‍ദ്ധിച്ചിട്ടുണ്ടാകുമെന്നാണ് കണക്കാക്കുന്നത്. സംസ്ഥാനത്തെ ആകെ വോട്ടര്‍മാരില്‍ പകുതിയോളം വരുന്ന സ്ത്രീകളുടെ പിന്തുണ തൃണമൂലിന്റെ പതനത്തിന് ആക്കം കൂട്ടി.

സര്‍ക്കാര്‍ ജീവനക്കാരുടെ വോട്ടുകള്‍ നേടിയെടുക്കുന്നതില്‍ ബിജെപി വിജയിച്ചു. കേന്ദ്ര സര്‍ക്കാര്‍ ജീവനക്കാര്‍ക്ക് സമാനമായ ആനുകൂല്യങ്ങളും ഏഴാം ശമ്പള കമ്മീഷന്‍ നടപ്പിലാക്കുമെന്ന അമിത് ഷായുടെ വാഗ്ദാനവും ജീവനക്കാര്‍ക്കിടയില്‍ വലിയ സ്വാധീനം ചെലുത്തി. ബംഗാളിലെ 20 ലക്ഷത്തിനും 50 ലക്ഷത്തിനും ഇടയില്‍ വരുന്ന സര്‍ക്കാര്‍ ജീവനക്കാരും തൊഴില്‍ ആഗ്രഹിക്കുന്ന യുവജനങ്ങളും ഇത്തവണ ബിജെപിയെ പിന്തുണച്ചതായാണ് സൂചന. അയല്‍ സംസ്ഥാനങ്ങളെ അപേക്ഷിച്ച് കൂടുതല്‍ സര്‍വീസ് വോട്ടര്‍മാര്‍ ഉള്ള ബംഗാളില്‍ ഇത് നിര്‍ണ്ണായകമായി.

കേന്ദ്ര സര്‍ക്കാര്‍ നടപ്പിലാക്കുന്ന വികസന പദ്ധതികളും അടിസ്ഥാന സൗകര്യ വികസനവുമാണ് മൂന്നാമത്തെ പ്രധാന ഘടകം. നരേന്ദ്ര മോദി വേഴ്‌സസ് മമത ബാനര്‍ജി എന്ന നിലയിലുള്ള പോരാട്ടത്തില്‍ 'മോദിയുടെ ഗ്യാരണ്ടി' ജനങ്ങള്‍ക്കിടയില്‍ ഫലപ്രദമായി എത്തിക്കാന്‍ ബിജെപിക്ക് സാധിച്ചു. പ്രത്യേകിച്ചും ആദ്യമായി വോട്ട് ചെയ്യുന്ന യുവജനങ്ങളെയും മധ്യവര്‍ഗത്തെയും ആകര്‍ഷിക്കുന്നതില്‍ മോദിയുടെ റാലികള്‍ വലിയ പങ്ക് വഹിച്ചു. 1.31 കോടിയോളം വരുന്ന യുവ വോട്ടര്‍മാരെ ലക്ഷ്യമിട്ടുള്ള സോഷ്യല്‍ മീഡിയ പ്രചാരണങ്ങളും വിജയം കണ്ടു.

ക്രമസമാധാന നിലയെക്കുറിച്ചുള്ള ആശങ്കകളും ഭരണവിരുദ്ധ തരംഗവുമാണ് വിജയത്തിലേക്ക് നയിച്ച മറ്റ് ഘടകങ്ങള്‍. തിരഞ്ഞെടുപ്പ് കാലത്തെ അക്രമങ്ങള്‍ തടയുന്നതിനായി കേന്ദ്ര സേനയെ വന്‍തോതില്‍ വിന്യസിച്ചതും വോട്ടര്‍ പട്ടികയിലെ ക്രമക്കേടുകള്‍ പരിഹരിച്ചതും സാധാരണക്കാരായ വോട്ടര്‍മാര്‍ക്ക് ആത്മവിശ്വാസം നല്‍കി. ആര്‍.ജി കര്‍ സംഭവം ഉള്‍പ്പെടെയുള്ള വിഷയങ്ങള്‍ ഉയര്‍ത്തിക്കാട്ടി തൃണമൂല്‍ ഭരണത്തിനെതിരെയുള്ള ജനരോഷം വോട്ടാക്കി മാറ്റുന്നതില്‍ ബിജെപി വിജയിച്ചു.