റിയാദ്- സൗദി പ്രൊഫഷണല്‍ ലീഗിലെ ആവേശകരമായ മുപ്പതാം റൗണ്ട് പോരാട്ടത്തില്‍ അല്‍-അഹ്്‌ലിയെ എതിരില്ലാത്ത രണ്ട് ഗോളുകള്‍ക്ക് പരാജയപ്പെടുത്തി അല്‍-നസര്‍ കിരീടപോരാട്ടം ശക്തമാക്കി. ബുധനാഴ്ച വൈകുന്നേരം നടന്ന മത്സരത്തില്‍ സൂപ്പര്‍ താരം ക്രിസ്റ്റ്യാനോ റൊണാള്‍ഡോയും കൂമാനുമാണ് അല്‍-നസറിനായി വലകുലുക്കിയത്. കളിയുടെ തുടക്കം മുതല്‍ ഇരു ടീമുകളും അതീവ ജാഗ്രതയോടെയാണ് പന്തുതട്ടിയത്. മത്സരത്തിന്റെ പത്താം മിനിറ്റില്‍ അല്‍-അഹ്്‌ലിയുടെ ബ്രസീലിയന്‍ താരം റോജര്‍ ഇബാനിസ് തൊടുത്ത ലോങ്ങ് ഷോട്ട് നേരിയ വ്യത്യാസത്തില്‍ പുറത്തുപോയത് ആരാധകരെ മുള്‍മുനയില്‍ നിര്‍ത്തി. ആദ്യ പകുതിയില്‍ ഇരു ടീമുകളും ഗോളൊന്നും നേടാനായില്ലെങ്കിലും കടുത്ത പോരാട്ടവും മഞ്ഞക്കാര്‍ഡുകളും കൊണ്ട് കളം ചൂടുപിടിച്ചിരുന്നു.

രണ്ടാം പകുതിയില്‍ അല്‍-നസര്‍ ആക്രമണം ശക്തമാക്കി. 56-ാം മിനിറ്റില്‍ ക്രിസ്റ്റ്യാനോ റൊണാള്‍ഡോ നല്‍കിയ മികച്ച പാസ് ഗോളാക്കി മാറ്റാന്‍ ജോവോ ഫെലിക്‌സിന് സാധിച്ചില്ലെങ്കിലും മത്സരത്തിന്റെ ഗതി അല്‍-നസറിന് അനുകൂലമായിരുന്നു. 77-ാം മിനിറ്റില്‍ സ്റ്റേഡിയത്തെ ഇളക്കിമറിച്ചുകൊണ്ട് ആദ്യ ഗോള്‍ പിറന്നു. ജോവോ ഫെലിക്‌സ് എടുത്ത കോര്‍ണര്‍ കിക്ക് കൃത്യമായ ഹെഡറിലൂടെ റൊണാള്‍ഡോ വലയിലെത്തിച്ചു. കളിയുടെ അവസാന നിമിഷങ്ങളില്‍ അല്‍-അഹ്്‌ലി സമനിലക്കായി പൊരുതിയെങ്കിലും 90-ാം മിനിറ്റില്‍ കൂമാന്‍ തൊടുത്ത തകര്‍പ്പന്‍ ഷോട്ട് അല്‍-അഹ്്‌ലി ഗോള്‍കീപ്പര്‍ എഡ്വാര്‍ഡ് മെന്‍ഡിയെ കീഴടക്കി അല്‍-നസറിന്റെ രണ്ടാം ഗോളും വിജയവും ഉറപ്പിച്ചു.

ഈ വിജയത്തോടെ 30 മത്സരങ്ങളില്‍ നിന്ന് 79 പോയിന്റുമായി അല്‍-നസര്‍ പോയിന്റ് പട്ടികയില്‍ ഒന്നാം സ്ഥാനത്ത് തുടരുകയാണ്. കിരീടത്തിലേക്കുള്ള ദൂരം കുറയ്ക്കാന്‍ ഈ വിജയം അവരെ സഹായിച്ചു. അതേസമയം, തോല്‍വിയോടെ 66 പോയിന്റുള്ള അല്‍-അഹ്്‌ലി പട്ടികയില്‍ മൂന്നാം സ്ഥാനത്ത് തുടരുന്നു. മത്സരത്തിനിടെ അല്‍-അഹ്ലിയുടെ ഗലീന്യോയ്ക്ക് പരിക്കേറ്റത് അവര്‍ക്ക് തിരിച്ചടിയായി. വിജയത്തോടെ കിരീട പ്രതീക്ഷകള്‍ സജീവമാക്കിയ അല്‍-നസര്‍ ആരാധകര്‍ വലിയ ആവേശത്തിലാണ്.