കൊച്ചി: എറണാകുളം പ്രസ് ക്ലബ് ഏര്‍പ്പെടുത്തിയ എന്‍.വി. പൈലി സ്മാരക മാധ്യമ പുരസ്‌കാരം ജീവന്‍ ടി.വി. ചീഫ് ന്യൂസ് എഡിറ്റര്‍ ബാബു വെളപ്പായയ്ക്ക് റവന്യൂ മന്ത്രി കെ. രാജന്‍ സമ്മാനിച്ചു. 15,000 രൂപയും ഫലകവും അടങ്ങുന്നതാണ് പുരസ്‌കാരം.
മാധ്യമങ്ങള്‍ പ്രതിപക്ഷത്തിന്റെ ചുമതലകള്‍ നിര്‍വ്വഹിക്കേണ്ടവരാണെന്ന് മന്ത്രി പറഞ്ഞു. ഭരണപക്ഷത്തിന്റെ ശരികേടുകള്‍ക്കെതിരെ ആഞ്ഞടിക്കുക തന്നെ വേണം. ഒപ്പം സമൂഹത്തില്‍ കേള്‍ക്കാന്‍ പറ്റാത്തവരുടെ ചെവിയാകാനും പറയാന്‍ പറ്റാത്തവരുടെ നാവാകാനും കാണാന്‍ പറ്റാത്തവരുടെ കണ്ണാകാനും കഴിയണം. ജനാധിപത്യത്തിന്റെ നാലാം തൂണ്‍ എന്ന നിലയില്‍ ജനാധിപത്യത്തെ ശക്തിപ്പെടുത്താന്‍ എല്ലാ അര്‍ത്ഥത്തിലും ശരിയായ വാര്‍ത്തകള്‍ ജനങ്ങളുടെ മുന്നില്‍ എത്തിക്കാന്‍ ശ്രമിക്കുമ്പോള്‍ ഇല്ലാത്ത കാര്യങ്ങള്‍ തെറ്റിദ്ധാരണ പരത്തുന്ന തരത്തില്‍ വാര്‍ത്തകള്‍ നല്‍കുമ്പോള്‍ യഥാര്‍ത്ഥ പത്രധര്‍മ്മത്തിന്റെ നിര്‍വ്വചനം എന്താണെന്ന് മറക്കരുതെന്ന് അദ്ദേഹം ഓര്‍മിപ്പിച്ചു.
പ്രസ് ക്ലബ് പ്രസിഡന്റ് ആര്‍. ഗോപകുമാര്‍ അധ്യക്ഷനായി. മുതിര്‍ന്ന മാധ്യമപ്രവര്‍ത്തകന്‍ ഡോ. സെബാസ്റ്റ്യന്‍ പോള്‍ മുഖ്യപ്രഭാഷണം നടത്തി. സി.ഐ.സി.സി ജയചന്ദ്രന്‍, സെക്രട്ടറി എം. ഷജില്‍കുമാര്‍, ട്രഷറര്‍ അഷ്റഫ് തൈവളപ്പ്, ബാബു വെളപ്പായ എന്നിവര്‍ സംസാരിച്ചു.
ചിത്രം: എറണാകുളം പ്രസ് ക്ലബ് ഏര്‍പ്പെടുത്തിയ എന്‍.വി. പൈലി സ്മാരക മാധ്യമ പുരസ്‌കാരം ജീവന്‍ ടി.വി ചീഫ് ന്യൂസ് എഡിറ്റര്‍ ബാബു വെളപ്പായയ്ക്ക് റവന്യൂ മന്ത്രി കെ. രാജന്‍ സമ്മാനിക്കുന്നു.
Related News
