മക്ക: വരാനിരിക്കുന്ന ഹജ് സീസണിന് മുന്നോടിയായി മിനായിലെ തീര്ത്ഥാടക ക്യാമ്പുകളുടെ സജ്ജീകരണങ്ങള് ഹജ്-ഉംറ മന്ത്രി ഡോ. തൗഫീഖ് ബിന് ഫൗസാന് അല്-റബീഅ നേരിട്ടെത്തി പരിശോധിച്ചു. വിശുദ്ധ നഗരങ്ങളിലെത്തുന്ന തീര്ത്ഥാടകര്ക്ക് നല്കുന്ന സേവനങ്ങളുടെ ഗുണനിലവാരം ഉറപ്പുവരുത്തുന്നതിനായി മന്ത്രാലയം നടപ്പിലാക്കുന്ന ഫീല്ഡ് മോണിറ്ററിംഗിന്റെ ഭാഗമായായിരുന്നു ഈ സന്ദര്ശനം. പുണ്യസ്ഥലങ്ങളില് തീര്ത്ഥാടകരുടെ താമസം സംബന്ധിച്ച ക്രമീകരണങ്ങള് മാസങ്ങള്ക്ക് മുന്പേ ആരംഭിച്ചതായും മന്ത്രി വ്യക്തമാക്കി.
മിനായിലെ ക്യാമ്പുകള് സജ്ജീകരിച്ചതില് മന്ത്രി സംതൃപ്തി രേഖപ്പെടുത്തി. കൃത്യമായ ആസൂത്രണവും വിവിധ സര്ക്കാര് ഏജന്സികള് തമ്മിലുള്ള ഏകോപനവുമാണ് മികച്ച രീതിയില് പ്രവര്ത്തനങ്ങള് പൂര്ത്തിയാക്കാന് സഹായിച്ചതെന്ന് അദ്ദേഹം പറഞ്ഞു. ക്യാമ്പുകളുടെ നിര്മ്മാണത്തിലും അടിസ്ഥാന സൗകര്യ വികസനത്തിലും പ്രകടമായ ഈ കാര്യക്ഷമത തീര്ത്ഥാടകരുടെ ഹജ് അനുഭവം കൂടുതല് സുഗമമാക്കാന് സഹായിക്കുമെന്നും അദ്ദേഹം കൂട്ടിച്ചേര്ത്തു.ഈ വര്ഷം മുതല് ഹജ് കര്മ്മങ്ങളുടെ സുഗമമായ നടത്തിപ്പിനായി ആദ്യമായി അത്യാധുനിക ഇലക്ട്രോണിക് സംവിധാനങ്ങള് പ്രവര്ത്തനസജ്ജമാക്കിയതായി ഡോ. അല്-റബീഅ അറിയിച്ചു.
തീര്ത്ഥാടകരുടെ നീക്കങ്ങള് നിരീക്ഷിക്കുന്നതിനും ക്യാമ്പുകളിലേക്കുള്ള പ്രവേശനവും പുറത്തുകടക്കലും ക്രമീകരിക്കുന്നതിനും ഡിജിറ്റല് സംവിധാനങ്ങള് ഉപയോഗിക്കും. ഇതിനുപുറമെ, ഓരോ ക്യാമ്പിന്റെയും കവാടങ്ങളില് കൃത്യമായ നിര്ദ്ദേശങ്ങള് അടങ്ങിയ ഇന്ഫര്മേഷന് ബോര്ഡുകളും സ്ഥാപിച്ചിട്ടുണ്ട്. യാത്ര പുറപ്പെടേണ്ട സമയം, തിരിച്ചെത്തേണ്ട സമയം തുടങ്ങിയ പ്രധാന വിവരങ്ങള് ഇതില് ലഭ്യമായിരിക്കും.
സൗദി അറേബ്യയുടെ വിഷന് 2030-ന്റെ ലക്ഷ്യങ്ങള് സാക്ഷാത്കരിക്കുന്നതിനും 'ഗസ്റ്റ് ഓഫ് ഗോഡ്' സേവന പദ്ധതിയുടെ ഭാഗമായും ലോകമെമ്പാടുമുള്ള തീര്ത്ഥാടകര്ക്ക് സുരക്ഷിതവും സമാധാനപരവുമായ അന്തരീക്ഷം ഒരുക്കുകയാണ് മന്ത്രാലയം ഇതിലൂടെ ലക്ഷ്യമിടുന്നത്. ഹജ് കര്മ്മങ്ങള് ഏറ്റവും ലളിതവും ഭക്തിസാന്ദ്രവുമാക്കുന്നതിനായി വരും ദിവസങ്ങളിലും പരിശോധനകളും വിലയിരുത്തലുകളും തുടരുമെന്നും മന്ത്രാലയ വൃത്തങ്ങള് അറിയിച്ചു.
.jpg)
Related News
