കൊച്ചി: ദക്ഷിണേന്ത്യയിലേക്ക് രാഷ്ട്രപതിയുടെ സ്വര്‍ണ്ണമെഡല്‍ ആദ്യമായി കൊണ്ടുവരികയും മലയാള സിനിമയെ ലോകനിലവാരത്തിലേക്ക് ഉയര്‍ത്തുകയും ചെയ്ത പ്രശസ്ത സിനിമാ നിര്‍മ്മാതാവ് ടി.കെ. പരീക്കുട്ടിയുടെ സ്മരണയ്ക്കായി സ്മാരകം നിര്‍മ്മിക്കണമെന്ന് കൊച്ചിയിലെ നാടക പ്രവര്‍ത്തകരുടെ കൂട്ടായ്മയായ 'നാടക്' കൊച്ചി മേഖല സമ്മേളനം ആവശ്യപ്പെട്ടു.

പരീക്കുട്ടി നിര്‍മ്മിച്ച സൈന തിയേറ്റര്‍ അദ്ദേഹത്തിന്റെ പേരില്‍ ചലച്ചിത്ര മ്യൂസിയം അടങ്ങുന്ന ടൂറിസം ഷോപ്പിംഗ് സെന്ററായി മാറ്റാന്‍ കൊച്ചി നഗരസഭ നടപടിയെടുക്കണം. സ്‌കൂള്‍ കുട്ടികള്‍ക്കും സ്ത്രീകള്‍ക്കും വേണ്ടി നാടക പരിശീലന കളരികള്‍ സംഘടിപ്പിക്കാനും സമ്മേളനം തീരുമാനിച്ചു.

പഞ്ചായത്ത് തല സാംസ്‌കാരിക കേന്ദ്രം പദ്ധതിയില്‍ ഉള്‍പ്പെടുത്തി ചെല്ലാനത്ത് ജോണ്‍ സ്മാരക കേന്ദ്രം സ്ഥാപിക്കണമെന്നും സമ്മേളനം ആവശ്യപ്പെട്ടു. കൊച്ചിന്‍ ബാബു പ്രസിഡന്റായി പതിനഞ്ചംഗ മേഖല കമ്മിറ്റിയെ യോഗം തിരഞ്ഞെടുത്തു.

നാടക് മലപ്പുറം ജില്ലാ സെക്രട്ടറി സുധീര്‍ ബാബു സമ്മേളനം ഉദ്ഘാടനം ചെയ്തു. കൊച്ചിന്‍ ബാബു അധ്യക്ഷത വഹിച്ചു. ഷാബു കെ. മാധവന്‍, ഫ്രാന്‍സിസ് ഈരവേലില്‍, എ.എച്ച്. ഷാനവാസ്, ഭാസി പനയ്ക്കന്‍, വി.പി. സ്റ്റാലിന്‍, കെ.ആര്‍. ഷിജു രാജ്, അഡ്വ. കെ.എ. സലിം, അബ്ദുള്ള മട്ടാഞ്ചേരി, മീനരാജ് പള്ളുരുത്തി, ക്ലമന്റ് റോബര്‍ട്ട് ഫെര്‍ണാണ്ടസ്, ചിദംബരം, ഇന്ദു ജ്യോതിഷ്, കലാമണ്ഡലം ജയന്‍, ബ്രിട്ടോ വിന്‍സന്റ്, ആസിഫ് മട്ടാഞ്ചേരി തുടങ്ങിയവര്‍ സംസാരിച്ചു.