റിയാദ്: പ്രവാസ മണ്ണില് നിന്ന് അറിവിന്റെയും സര്ഗ്ഗാത്മകതയുടെയും പുതിയ ചരിത്രം രചിച്ച് മലയാളി എം.ബി.ബി.എസ് വിദ്യാര്ത്ഥിനി ഫാത്തിമ സെഹ്റ സമീര്. ലോകത്തിലെ ഏറ്റവും വലിയ 'മള്ട്ടിനാഷണല് സ്റ്റുഡന്റ് ആന്തോളജി' (Multinational Student Anthology) എന്ന വേള്ഡ് റെക്കോര്ഡ് നേട്ടത്തില് പങ്കാളിയായാണ് ഈ ആലപ്പുഴ കായംകുളം സ്വദേശിനി ആഗോള ശ്രദ്ധ നേടിയത്. സൗദി അറേബ്യയെ പ്രതിനിധീകരിച്ച് ഈ സംരംഭത്തില് പങ്കാളിയായ ഫാത്തിമയെ യുനെസ്കോയും യുഎഇ വിദ്യാഭ്യാസ മന്ത്രാലയവും അനുമോദിച്ചു.
'വിസ്പേഴ്സ് ഓഫ് വാന്ഡര്ലസ്റ്റ്' എന്ന ലോകപ്രശസ്ത സാഹിത്യ സമാഹാരത്തില് ഉള്പ്പെടുത്തിയ 'സേഫ് പ്ലേസ്' എന്ന ചെറുകഥയാണ് ഫാത്തിമയെ ഈ നേട്ടത്തിന് അര്ഹയാക്കിയത്. ജീവിതത്തിലെ ഇരുട്ടിനെ ഭയന്നോടുകയല്ല, മറിച്ച് പ്രതിസന്ധികള്ക്കിടയിലും വെളിച്ചം കണ്ടെത്താന് ശീലിക്കണമെന്ന ഉദാത്തമായ സന്ദേശമാണ് ഈ കഥ പങ്കുവെക്കുന്നത്. ദുഃഖങ്ങളെയും വെല്ലുവിളികളെയും ജീവിതത്തിന്റെ ഭാഗമായി അംഗീകരിച്ച്, അവയ്ക്കിടയില് തളരാതെ മുന്നേറുമ്പോഴാണ് യഥാര്ത്ഥ സമാധാനവും സന്തോഷവും കൈവരുന്നതെന്ന് ഫാത്തിമ തന്റെ രചനയിലൂടെ അടിവരയിടുന്നു.
60 രാജ്യങ്ങളില് നിന്നുള്ള 66 യുവ എഴുത്തുകാര് അണിനിരന്ന ഈ അപൂര്വ്വ പുസ്തകം കഴിഞ്ഞ നവംബറില് ഷാര്ജ എക്സ്പോ സെന്ററിലാണ് പ്രകാശനം ചെയ്തത്. വിവിധ രാജ്യങ്ങളിലെ ആചാരങ്ങള്, സംസ്കാരം, പൈതൃകം എന്നിവ കോര്ത്തിണക്കിയ ഈ കൃതി കണ്ണൂര് സ്വദേശി എം.ഒ. രഘുനാഥാണ് ഒരു വര്ഷമെടുത്തു തയ്യാറാക്കിയത്. യുവതലമുറയുടെ സര്ഗ്ഗവൈഭവത്തിന്റെ ഉജ്ജ്വല പ്രതീകമായി ഈ സമാഹാരം വിലയിരുത്തപ്പെടുന്നു.
റിയാദിലെ റൊയ്ബെക് ട്രാവല്സ് മാനേജര് സമീര് കാസിം കോയയുടെയും അധ്യാപികയും എഴുത്തുകാരിയുമായ നിഖില സമീറിന്റെയും മകളാണ് ഫാത്തിമ സെഹ്റ. റിയാദില് പ്ലസ് ടു വരെ വിദ്യാഭ്യാസം പൂര്ത്തിയാക്കിയ ഫാത്തിമ ഖുര്ആന് മുഴുവന് മനഃപാഠമാക്കിയ ഹാഫിള കൂടിയാണ്. നിലവില് ഉസ്ബെക്കിസ്ഥാനിലെ ബുഖാറ സ്റ്റേറ്റ് മെഡിക്കല് ഇന്സ്റ്റിറ്റ്യൂട്ടില് എം.ബി.ബി.എസ് വിദ്യാര്ത്ഥിനിയായ ഇവര് ചിത്രകലയിലും അറബിക് കാലിഗ്രഫിയിലും പ്രാവീണ്യം തെളിയിച്ചിട്ടുണ്ട്. സഹല സമീര്, സിമാം ബിന് സമീര് എന്നിവര് സഹോദരങ്ങളാണ്.
Related News
