ജിദ്ദ- സൗദി അരാംകോ ഏപ്രില്‍ മാസത്തെ പുതിയ ഇന്ധന നിരക്കുകള്‍ പ്രഖ്യാപിച്ചു. ഇതനുസരിച്ച് ഉയര്‍ന്ന ശേഷിയുള്ള വാഹനങ്ങള്‍ക്കായി ഉപയോഗിക്കുന്ന 98 ഒക്ടേന്‍ പെട്രോളിന്റെ വില ലിറ്ററിന് 2.94 റിയാലില്‍ നിന്ന് 3.83 റിയാലായി വര്‍ദ്ധിപ്പിച്ചു. എന്നാല്‍ മറ്റ് ഇന്ധനങ്ങളുടെ വിലയില്‍ മാറ്റം വരുത്താതെ നിലനിര്‍ത്തിയിട്ടുണ്ട്.

91 ഒക്ടേന്‍ പെട്രോളിന് 2.18 റിയാലും 95 ഒക്ടേന്‍ പെട്രോളിന് 2.33 റിയാലുമാണ് നിലവിലെ നിരക്ക്. ഇവയ്ക്ക് പുറമെ ഡീസലിന് ലിറ്ററിന് 1.79 റിയാലും മണ്ണെണ്ണയ്ക്ക് 1.59 റിയാലും എന്ന പഴയ നിരക്ക് തന്നെ ഏപ്രിലിലും തുടരുമെന്ന് അരാംകോ വ്യക്തമാക്കി.

സാധാരണ വാഹനങ്ങള്‍ക്കും ട്രക്കുകള്‍ക്കും ആവശ്യമായ ഉയര്‍ന്ന ഗുണമേന്മയുള്ള ഇന്ധനങ്ങള്‍ വിപണിയില്‍ ലഭ്യമാണെന്നും കമ്പനി അറിയിച്ചു. ഉപഭോക്താക്കള്‍ക്ക് കൂടുതല്‍ ഇന്ധന ഓപ്ഷനുകള്‍ നല്‍കുന്നതിനും ഉല്‍പ്പന്നങ്ങളില്‍ വൈവിധ്യം കൊണ്ടുവരുന്നതിനുമായാണ് കഴിഞ്ഞ ജനുവരിയില്‍ അരാംകോ 98 ഒക്ടേന്‍ പെട്രോള്‍ വിപണിയിലിറക്കിയത്. വിപണിയിലുള്ള മറ്റ് ഉല്‍പ്പന്നങ്ങളെ ബാധിക്കാത്ത രീതിയില്‍ ഒരു അധിക ഓപ്ഷനായാണ് ഇത് അവതരിപ്പിച്ചിരിക്കുന്നത്.

സ്‌പോര്‍ട്‌സ് കാറുകള്‍ക്കും അത്യാധുനിക എഞ്ചിനുകള്‍ക്കുമാണ് ഈ ഇന്ധനം കൂടുതല്‍ അനുയോജ്യം. ആദ്യ ഘട്ടത്തില്‍ റിയാദ്, ജിദ്ദ, ദമാം തുടങ്ങിയ മെട്രോ നഗരങ്ങളിലും അവയെ ബന്ധിപ്പിക്കുന്ന പ്രധാന പാതകളിലുമാണ് 98 ഒക്ടേന്‍ ലഭ്യമാക്കിയിട്ടുള്ളത്. ഇത്തരം ഇന്ധനം ആവശ്യമുള്ള വാഹനങ്ങള്‍ പ്രധാനമായും ഈ നഗരങ്ങളിലായതിനാലാണ് ഇവിടങ്ങളില്‍ മാത്രം തുടക്കം കുറിച്ചത്. ഭാവിയിലെ ആവശ്യകത വിലയിരുത്തിയ ശേഷം മറ്റ് ഇടങ്ങളിലേക്ക് വിതരണം വ്യാപിപ്പിക്കുന്നത് പരിഗണിക്കുമെന്നും അധികൃതര്‍ അറിയിച്ചു.