ദമ്മാം: പ്രമുഖ നോവലിസ്റ്റും കാര്ട്ടൂണിസ്റ്റും ചിന്തകനുമായിരുന്ന ഒ.വി. വിജയന്റെ സ്മരണാര്ത്ഥം സൗദി മലയാളി സമാജം ദമ്മാം ചാപ്റ്റര് അനുസ്മരണ യോഗം സംഘടിപ്പിച്ചു.
സമാജം പ്രസിഡന്റ് സാജിദ് ആറാട്ടുപുഴയുടെ അധ്യക്ഷതയില് ചേര്ന്ന യോഗത്തില് മുതിര്ന്ന മാധ്യമപ്രവര്ത്തകനും എഴുത്തുകാരനുമായ പി.എ.എം. ഹാരിസ് അനുസ്മരണ പ്രഭാഷണം നടത്തി. തസ്രാക്കിന്റെ മണ്ണിലൂടെ സഞ്ചരിച്ച് ഒ.വി. വിജയന് എന്ന മഹാപ്രതിഭയുടെ ഓര്മ്മകള് മനോഹരമായ ഒരു ക്യാന്വാസിലെന്നപോലെ അദ്ദേഹം വരച്ചുചേര്ത്തു. തന്റെ ആദ്യ നോവലായ 'ഖസാക്കിന്റെ ഇതിഹാസ'ത്തിലൂടെ 1970-കളില് മലയാള നോവല് സാഹിത്യത്തില് ഒരു വേറിട്ട വഴി തുറക്കുകയായിരുന്നു ഒ.വി. വിജയനെന്ന് അദ്ദേഹം അനുസ്മരിച്ചു.
കാലത്തിന് മായ്ക്കാന് കഴിയാത്ത അനവധി കഥകളും കഥാപാത്രങ്ങളും അദ്ദേഹം മലയാളത്തിന് സമ്മാനിച്ചു. തത്ത്വചിന്തയും സാമൂഹിക വിമര്ശനവും ചേര്ന്ന രചനകളിലൂടെ മലയാള സാഹിത്യത്തെയും ഇന്ത്യന് രാഷ്ട്രീയത്തെയും ദീര്ഘവീക്ഷണത്തോടെ നിരീക്ഷിച്ച അസാമാന്യ പ്രതിഭയായിരുന്നു അദ്ദേഹം. വര്ത്തമാനകാല അധികാര-ഭരണകൂട ചലനങ്ങളെ തീക്ഷ്ണമായ ഭാഷയില് വിചാരണ ചെയ്തപ്പോള് തന്നെ, ശാന്തവും സൗമ്യവുമായ ശൈലിയിലൂടെ അദ്ദേഹം തന്റെ മറ്റു രചനകളെ വേറിട്ടതാക്കി.
മനുഷ്യമനസ്സുകളിലേക്കും സമൂഹത്തിലേക്കും ഒരുപോലെ പിടിച്ച കണ്ണാടിയായിരുന്നു വിജയന്റെ കൃതികള്. ധര്മ്മപുരാണം, ഗുരുസാഗരം, മധുരം ഗായതി, പ്രവാചകന്റെ വഴി, കടല്ത്തീരത്ത്, അശാന്തി തുടങ്ങി ആറ് നോവലുകളും ഒമ്പത് ചെറുകഥാ സമാഹാരങ്ങളും ലേഖനങ്ങളും കാര്ട്ടൂണുകളും ഉള്പ്പെടെ പകരക്കാരനില്ലാത്ത സംഭാവനകളാണ് അദ്ദേഹം സാഹിത്യലോകത്തിന് നല്കിയത്.
എഴുത്തിലും വരയിലും ദര്ശനത്തിലും മലയാളത്തിന് കാലാതിവര്ത്തിയായ സംഭാവനകള് നല്കിയ അതുല്യ സാഹിത്യകാരന്റെ ഓര്മ്മയ്ക്ക് മുന്നില് യോഗം പ്രണാമമര്പ്പിച്ചു. പ്രവിശ്യയിലെ സാമൂഹിക സാംസ്കാരിക രംഗത്തെ പ്രമുഖരായ മാലിക് മഖ്ബൂല്, ഇ.കെ. സലിം, ഡോ. ടെസ്സി റോണി എന്നിവര് സംസാരിച്ചു. സുനില് മുഹമ്മദ്, സോഫിയ ഷാജഹാന്, പി.ടി. അലവി, മാത്തുക്കുട്ടി പള്ളിപ്പാട്, സുബൈര് പുല്ലാളൂര് തുടങ്ങി പ്രമുഖ വ്യക്തിത്വങ്ങള് പങ്കെടുത്തു.
മലയാളി സമാജം ഭാരവാഹികളായ മുരളീധരന്, ആസിഫ് താനൂര്, ഫെബിനാ നജ്മുസമാന്, റഹൂഫ് ചാവക്കാട്, ലീനാ ഉണ്ണിക്കൃഷ്ണന്, ബിനു കുഞ്ഞ് എന്നിവര് പരിപാടിക്ക് നേതൃത്വം നല്കി. ഹുസൈന് ചമ്പോളില് അവതാരകനായിരുന്നു. ഡോ. സിന്ധു ബിനു സ്വാഗതവും ഷനീബ് അബൂബക്കര് നന്ദിയും പറഞ്ഞു.
