തൃശൂര്‍: കൊടകര ആളൂരിന് സമീപം വെള്ളാഞ്ചിറയില്‍ ലിവിങ് ടുഗതര്‍ പങ്കാളിയായ യുവതിയെ മദ്യം ഒഴിച്ച് തീ കൊളുത്തി കൊലപ്പെടുത്താന്‍ ശ്രമം. കണ്ണൂര്‍ വാവടി സ്വദേശിനി ലീനയ്ക്കാണ് (32) ഗുരുതരമായി പൊള്ളലേറ്റത്. സംഭവവുമായി ബന്ധപ്പെട്ട് ലീനയുടെ പങ്കാളിയും ശാസ്താംകുന്ന് സ്വദേശിയുമായ ശരത്ത് വിഷ്ണുവിനെ (തമ്പുരാന്‍ ശരത്ത്) പൊലീസ് കസ്റ്റഡിയിലെടുത്തു.

ശനിയാഴ്ച പുലര്‍ച്ചെ രണ്ട് മണിയോടെയാണ് സംഭവം. താമസസ്ഥലത്തു വെച്ച് ഇരുവരും തമ്മിലുണ്ടായ തര്‍ക്കമാണ് അക്രമത്തില്‍ കലാശിച്ചത്. തര്‍ക്കത്തിനിടെ യുവതിയുടെ ദേഹത്ത് മദ്യം ഒഴിച്ച ശേഷം തീ കൊളുത്തുകയായിരുന്നുവെന്ന് പൊലീസ് സംശയിക്കുന്നു. പൊള്ളലേറ്റ യുവതിയെ ആദ്യം ചാലക്കുടിയിലെ സ്വകാര്യ ആശുപത്രിയിലും പിന്നീട് നില ഗുരുതരമായതിനെ തുടര്‍ന്ന് മെഡിക്കല്‍ കോളേജ് ആശുപത്രിയിലേക്കും മാറ്റി.

ആളൂര്‍ പൊലീസ് സംഭവസ്ഥലത്തെത്തി അന്വേഷണം ആരംഭിച്ചിട്ടുണ്ട്. പ്രതിയെ ചോദ്യം ചെയ്തു വരികയാണ്. കൃത്യമായ പ്രകോപനമെന്താണെന്ന കാര്യത്തില്‍ കൂടുതല്‍ വ്യക്തത വരേണ്ടതുണ്ട്.