തിരുവനന്തപുരം: പ്രമുഖ മൊബിലിറ്റി പ്ലാറ്റ്ഫോമായ റാപിഡോ, കേരള മോട്ടോര്‍ വാഹന വകുപ്പുമായി സഹകരിച്ച് സംസ്ഥാനത്ത് 'പിങ്ക് മൊബിലിറ്റി' പദ്ധതി ആരംഭിച്ചു. വനിതകളുടെ സുരക്ഷയും സാമ്പത്തിക ശാക്തീകരണവും ലക്ഷ്യമിട്ടുള്ള 'പിങ്ക് മൊബിലിറ്റി' പദ്ധതിക്കും 'റാപിഡോ ശക്തി' എന്ന പ്രത്യേക പരിപാടിക്കുമാണ് തിരുവനന്തപുരത്ത് തുടക്കം കുറിച്ചത്.
സംസ്ഥാനത്തെ എല്ലാ പ്രധാന നഗരങ്ങളിലും ഈ പദ്ധതി നടപ്പിലാക്കും. സ്ത്രീകളെ പ്രൊഫഷണല്‍ റൈഡര്‍മാരാക്കി ഗതാഗത മേഖലയിലേക്ക് എത്തിക്കുക എന്നതാണ് ഇതിന്റെ പ്രധാന ലക്ഷ്യം. കെ.എസ്.ആര്‍.ടി.സി ഡ്രൈവിംഗ് സ്‌കൂളിന്റെ സഹകരണത്തോടെ, തിരഞ്ഞെടുക്കപ്പെട്ട വനിതാ ക്യാപ്റ്റന്‍മാര്‍ക്ക് വിദഗ്ദ്ധ പരിശീലനം നല്‍കിയ ശേഷമായിരിക്കും നിയമനം.
തിരുവനന്തപുരത്തെ കെ.എസ്.ആര്‍.ടി.സി സ്റ്റാഫ് ട്രെയിനിംഗ് സെന്ററില്‍ ബാച്ച് അടിസ്ഥാനത്തിലാണ് പരിശീലനം നടക്കുന്നത്. ഓരോ ബാച്ചിലും 50 വനിതകള്‍ക്ക് വീതം ട്രാഫിക് നിയമങ്ങള്‍, സുരക്ഷിത റൈഡിംഗ്, ഓണ്‍ലൈന്‍ ടാക്‌സി പ്രവര്‍ത്തനങ്ങള്‍, പ്രഥമശുശ്രൂഷാ രീതികള്‍, കസ്റ്റമര്‍ സര്‍വീസ് തുടങ്ങിയ വിഷയങ്ങളില്‍ പരിശീലനം നല്‍കും. പരിശീലനം വിജയകരമായി പൂര്‍ത്തിയാക്കുന്നവര്‍ക്ക് ഔദ്യോഗിക സര്‍ട്ടിഫിക്കറ്റും നല്‍കുന്നതാണ്.
റാപിഡോ പ്ലാറ്റ്ഫോമിലൂടെ വനിതകള്‍ക്ക് മികച്ച വരുമാനം ഉറപ്പാക്കാന്‍ സാധിക്കുമെന്നത് പദ്ധതിയുടെ ആകര്‍ഷണീയത വര്‍ദ്ധിപ്പിക്കുന്നു. തിരുവനന്തപുരത്ത് നടന്ന ഉദ്ഘാടന ചടങ്ങില്‍ ട്രാന്‍സ്പോര്‍ട്ട് കമ്മീഷണര്‍ നാഗരാജു ചകിലം, കെ.എസ്.ആര്‍.ടി.സി സി.എം.ഡി പി.എസ്. പ്രമോജ് ശങ്കര്‍, റാപിഡോ അസ്സോസിയേറ്റ് വൈസ് പ്രസിഡന്റ് ആശിഷ് റെഡ്ഢി എന്നിവര്‍ പങ്കെടുത്തു. 2015-ല്‍ പ്രവര്‍ത്തനം ആരംഭിച്ച റാപിഡോ നിലവില്‍ രാജ്യത്തെ 400-ലധികം നഗരങ്ങളിലായി പ്രതിദിനം അഞ്ച് മില്യണിലധികം യാത്രകളും കൈകാര്യം ചെയ്യുന്നുണ്ട്.
ഫോട്ടോ ക്യാപ്ഷന്‍:
കേരള മോട്ടോര്‍ വാഹന വകുപ്പും രാജ്യത്തെ പ്രമുഖ മൊബിലിറ്റി പ്ലാറ്റ്ഫോമായ റാപിഡോയും ചേര്‍ന്ന് വനിതകള്‍ക്കായി ആരംഭിച്ച പിങ്ക് മൊബിലിറ്റി പദ്ധതിയുടെ ഉദ്ഘാടന വേദിയില്‍ ട്രാന്‍സ്പോര്‍ട്ട് കമ്മീഷണര്‍ നാഗരാജു ചകിലം, കെ.എസ്.ആര്‍.ടി.സി സി.എം.ഡി പി.എസ്. പ്രമോജ് ശങ്കര്‍, റാപിഡോ അസ്സോസിയേറ്റ് വൈസ് പ്രസിഡന്റ് ആശിഷ് റെഡ്ഢി എന്നിവര്‍ വനിതാ ഡ്രൈവര്‍മാര്‍ക്കൊപ്പം.
.jpg)
Related News
