ഗാസ സിറ്റി: മിഡില്‍ ഈസ്റ്റില്‍ യുദ്ധം രൂക്ഷമായിരിക്കെ, തങ്ങളുടെ പ്രധാന സഖ്യകക്ഷിയായ ഇറാനോട് അസാധാരണമായ അഭ്യര്‍ത്ഥനയുമായി പലസ്തീന്‍ സായുധ സംഘടനയായ ഹമാസ്. ഇസ്രായേലിനും അമേരിക്കയ്ക്കും എതിരെ പ്രതിരോധം തീര്‍ക്കാന്‍ ഇറാനു അവകാശമുണ്ടെങ്കിലും, അയല്‍രാജ്യങ്ങളെ ലക്ഷ്യം വെക്കുന്നതില്‍ നിന്ന് ഇറാന്‍ പിന്തിരിയണമെന്ന് ഹമാസ് പ്രസ്താവനയിലൂടെ ആവശ്യപ്പെട്ടു. ഫെബ്രുവരി 28-ന് ആരംഭിച്ച യുദ്ധം അവസാനിപ്പിക്കാന്‍ അന്താരാഷ്ട്ര സമൂഹം അടിയന്തരമായി ഇടപെടണമെന്നും ഹമാസ് ആവശ്യപ്പെട്ടു. ഇറാനില്‍ നിന്ന് ഹമാസ് നടത്തുന്ന ഇത്തരത്തിലുള്ള ആദ്യത്തെ പരസ്യമായ അഭ്യര്‍ത്ഥനയാണിത്.
യുദ്ധത്തിന്റെ ഒന്നാം ദിവസം ഇറാന്റെ പരമോന്നത നേതാവ് അലി ഖാംനഇ കൊല്ലപ്പെട്ടതിനെ ഹമാസ് കഠിനമായി അപലപിച്ചു. പലസ്തീന്‍ ചെറുത്തുനില്‍പ്പിന് ഖാംനഇ നല്‍കിയ രാഷ്ട്രീയ, നയതന്ത്ര, സൈനിക പിന്തുണയെ ഹമാസ് നന്ദിയോടെ സ്മരിച്ചു. ഖാംനഇയുടെ വധത്തിന് പിന്നാലെയാണ് ഇറാന്‍ പത്തിലധികം രാജ്യങ്ങള്‍ക്ക് നേരെ മിസൈല്‍, ഡ്രോണ്‍ ആക്രമണങ്ങള്‍ നടത്തിയത്. ശനിയാഴ്ച ഖത്തര്‍ തലസ്ഥാനമായ ദോഹയ്ക്ക് നേരെ വന്ന രണ്ട് മിസൈലുകള്‍ തകര്‍ത്തതായി അധികൃതര്‍ അറിയിച്ചു.
ഇറാന്‍ അനുകൂല സംഘടനയായ ഹിസ്ബുള്ളയും ഇസ്രായേലിനെതിരെ ശക്തമായ ആക്രമണം തുടരുകയാണ്. ഖാംനഇയുടെ വധത്തിന് പിന്നാലെയാണ് ഹിസ്ബുള്ള യുദ്ധത്തില്‍ നേരിട്ട് പങ്കുചേര്‍ന്നത്. ഇതിനു മറുപടിയായി ഇസ്രായേല്‍ ലെബനനില്‍ നടത്തിയ ആക്രമണങ്ങളില്‍ ഇതുവരെ 800-ഓളം പേര്‍ കൊല്ലപ്പെട്ടതായാണ് ലെബനന്‍ ആരോഗ്യ മന്ത്രാലയത്തിന്റെ കണക്ക്.
ഹമാസിന്റെ പ്രധാന സാമ്പത്തിക സ്രോതസ്സായ ഖത്തറിനും രാഷ്ട്രീയ പിന്തുണ നല്‍കുന്ന തുര്‍ക്കിക്കും നേരെ ഇറാന്‍ ആക്രമണം നടത്തുന്നത് ഹമാസിനെ ആശങ്കയിലാഴ്ത്തുന്നുണ്ട്. ദോഹയില്‍ ഹമാസ് രാഷ്ട്രീയ നേതൃത്വത്തിന് അഭയം നല്‍കുന്ന ഖത്തര്‍, ഗാസയുടെ പുനര്‍നിര്‍മ്മാണത്തിനും മാനുഷിക സഹായത്തിനുമായി കോടിക്കണക്കിന് ഡോളറാണ് നല്‍കിവരുന്നത്.
അതുപോലെ, പ്രസിഡന്റ് റജബ് തയ്യിബ് എര്‍ദോഗന്റെ നേതൃത്വത്തില്‍ തുര്‍ക്കിയും ഹമാസിന് വലിയ നയതന്ത്ര പിന്തുണ നല്‍കുന്നുണ്ട്. വെള്ളിയാഴ്ച ഇറാനില്‍ നിന്ന് തൊടുത്തുവിട്ട ബാലിസ്റ്റിക് മിസൈല്‍ തുര്‍ക്കിയുടെ ആകാശപരിധിയില്‍ വെച്ച് നാറ്റോ സേന വെടിവെച്ചിട്ടിരുന്നു. ഈ പശ്ചാത്തലത്തിലാണ് സഖ്യകക്ഷികളെ വെറുപ്പിക്കരുതെന്ന സന്ദേശം ഹമാസ് ഇറാന്‍ നേതൃത്വത്തിന് നല്‍കുന്നത്.
.jpg)
Related News
