ദുബായ്/റിയാദ്: പശ്ചിമേഷ്യയില്‍ സംഘര്‍ഷം കടുക്കുന്നു. ഇറാന്റെ ഭാഗത്തുനിന്നുള്ള മിസൈല്‍-ഡ്രോണ്‍ ആക്രമണ നീക്കങ്ങളെത്തുടര്‍ന്ന് ഗള്‍ഫ് രാജ്യങ്ങള്‍ കടുത്ത ജാഗ്രതയില്‍. ദുബായ് ക്രീക്ക് ഹാര്‍ബറിന് സമീപം ഡ്രോണ്‍ വീണ് കെട്ടിടത്തിന് തീപിടിച്ചെങ്കിലും സിവില്‍ ഡിഫന്‍സ് ഉദ്യോഗസ്ഥര്‍ ഉടന്‍തന്നെ തീ നിയന്ത്രണവിധേയമാക്കി. സംഭവത്തില്‍ ആര്‍ക്കും പരിക്കേറ്റിട്ടില്ലെന്നും സ്ഥിതിഗതികള്‍ ശാന്തമാണെന്നും ദുബായ് മീഡിയ ഓഫീസ് അറിയിച്ചു.
സൗദി അറേബ്യയുടെ തലസ്ഥാനമായ റിയാദിലെ വിദേശ എംബസികള്‍ സ്ഥിതി ചെയ്യുന്ന മേഖല ലക്ഷ്യമാക്കി വന്ന ഡ്രോണ്‍ സൗദി പ്രതിരോധ സേന വെടിവെച്ചിട്ടു. രാജ്യത്തിന്റെ കിഴക്കന്‍ മേഖലയിലും സമാനമായ രീതിയില്‍ ഡ്രോണ്‍ ആക്രമണ ശ്രമം നടന്നതായി പ്രതിരോധ മന്ത്രാലയം സ്ഥിരീകരിച്ചു. ഇറാന്റെ ഭാഗത്തുനിന്നുള്ള ഡ്രോണ്‍ ആക്രമണങ്ങളെ തങ്ങള്‍ വിജയകരമായി പ്രതിരോധിച്ചതായി കുവൈറ്റ് പ്രതിരോധ മന്ത്രാലയവും വ്യക്തമാക്കി. മേഖലയിലെ ഊര്‍ജ്ജ വിപണികളെ ലക്ഷ്യം വയ്ക്കുമെന്ന് ഇറാന്‍ പ്രഖ്യാപിച്ചതിന് പിന്നാലെയാണിത്.
ലെബനന്റെ തലസ്ഥാനമായ ബെയ്‌റൂട്ടിന് സമീപം ഇസ്രായേല്‍ നടത്തിയ വ്യോമാക്രമണത്തില്‍ ഒരു കുട്ടിയുള്‍പ്പെടെ മൂന്ന് പേര്‍ കൊല്ലപ്പെട്ടു. അഭയാര്‍ത്ഥി കുടുംബങ്ങള്‍ താമസിച്ചിരുന്ന പ്രദേശമാണ് ആക്രമിക്കപ്പെട്ടത്. അതേസമയം, ഇറാന്റെ ഭാഗത്തുനിന്ന് ഇസ്രായേലിലേക്ക് വീണ്ടും മിസൈല്‍ ആക്രമണങ്ങള്‍ ആരംഭിച്ചതായി ഇസ്രായേല്‍ സൈന്യം സ്ഥിരീകരിച്ചു. പ്രതിരോധ സംവിധാനങ്ങള്‍ സജ്ജമാണെന്നും സൈന്യം അറിയിച്ചു.
എണ്ണവില കുതിക്കുന്നു
ആക്രമണ പരമ്പരകളെത്തുടര്‍ന്ന് ആഗോള വിപണിയില്‍ എണ്ണവില കുതിച്ചുയരുകയാണ്. ബ്രെന്റ് ക്രൂഡ് ഓയില്‍ ബാരലിന് 100 ഡോളര്‍ കടന്നു. ഹോര്‍മുസ് കടലിടുക്കിന് സമീപം വാണിജ്യ കപ്പലുകള്‍ക്ക് നേരെയുണ്ടായ ഇറാന്റെ ആക്രമണങ്ങളാണ് വിതരണ തടസ്സ ഭീതി ഉയര്‍ത്തുന്നതും വില വര്‍ദ്ധനവിന് കാരണമാകുന്നതും.
.jpg)
Related News
