അഹമ്മദാബാദ്: നരേന്ദ്ര മോദി സ്റ്റേഡിയത്തില്‍ ഒഴുകിയെത്തിയ ലക്ഷക്കണക്കിന് ആരാധകരെ സാക്ഷിയാക്കി ഇന്ത്യയ്ക്ക് തുടര്‍ച്ചയായ രണ്ടാം ടി20 ലോകകിരീടം. ആവേശകരമായ ഫൈനലില്‍ ന്യൂസിലന്‍ഡിനെ 96 റണ്‍സിന് തകര്‍ത്താണ് ഇന്ത്യ തങ്ങളുടെ മൂന്നാം ലോകകിരീടം ഉയര്‍ത്തിയത്. മലയാളി താരം സഞ്ജു സാംസണിന്റെ വെടിക്കെട്ട് ബാറ്റിംഗും ജസ്പ്രിത് ബുംറയുടെ മാരക ബൗളിംഗുമാണ് ഇന്ത്യന്‍ വിജയത്തിന് അടിത്തറ പാകിയത്.

ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യ നിശ്ചിത ഓവറില്‍ ഉയര്‍ത്തിയത് 256 റണ്‍സെന്ന കൂറ്റന്‍ വിജയലക്ഷ്യമായിരുന്നു. തകര്‍ത്തടിച്ച സഞ്ജു സാംസണ്‍ 46 പന്തില്‍ നിന്ന് 89 റണ്‍സ് അടിച്ചുകൂട്ടി. സഞ്ജുവിന് മികച്ച പിന്തുണ നല്‍കിയ ഓപ്പണര്‍മാരായ ഇഷാന്‍ കിഷന്‍ (25 പന്തില്‍ 54), അഭിഷേക് ശര്‍മ (21 പന്തില്‍ 52) എന്നിവരുടെ അര്‍ധസെഞ്ച്വറികളാണ് ഇന്ത്യന്‍ സ്‌കോര്‍ 250 കടത്തിയത്.

മറുപടി ബാറ്റിംഗിനിറങ്ങിയ ന്യൂസിലന്‍ഡിന് ഇന്ത്യന്‍ ബൗളിംഗ് നിരയ്ക്ക് മുന്നില്‍ പിടിച്ചുനില്‍ക്കാനായില്ല. 19 ഓവറില്‍ 159 റണ്‍സിന് എല്ലാവരും പുറത്തായി. നാല് വിക്കറ്റ് വീഴ്ത്തിയ ജസ്പ്രിത് ബുംറയാണ് കിവീസിന്റെ നട്ടെല്ലൊടിച്ചത്. 26 പന്തില്‍ 52 റണ്‍സ് നേടിയ ടിം സീഫെര്‍ട്ട് മാത്രമാണ് ന്യൂസിലന്‍ഡ് നിരയില്‍ അല്‍പ്പമെങ്കിലും ചെറുത്തുനിന്നത്. കിരീടനേട്ടത്തോടെ ടി20 ക്രിക്കറ്റിലെ തങ്ങളുടെ ആധിപത്യം ഇന്ത്യ ഒരിക്കല്‍ കൂടി അരക്കിട്ടുറപ്പിച്ചു.