ടെഹ്റാന്‍: സൗദി അറേബ്യ, ബഹ്റൈന്‍, യുണൈറ്റഡ് അറബ് എമിറേറ്റ്‌സ്, ഖത്തര്‍ എന്നീ അയല്‍രാജ്യങ്ങള്‍ക്ക് നേരെ ഇറാന്‍ നടത്തിയ വ്യോമാക്രമണങ്ങളില്‍ ഖേദം പ്രകടിപ്പിച്ച് ഇറാന്‍ പ്രസിഡന്റ് മസൂദ് പെസെഷ്‌കിയാന്‍. ശനിയാഴ്ച രാവിലെ നടന്ന തുടര്‍ച്ചയായ ആക്രമണങ്ങള്‍ക്ക് പിന്നാലെ ഔദ്യോഗിക ടെലിവിഷനിലൂടെ നടത്തിയ പ്രസംഗത്തിലാണ് അദ്ദേഹം പരസ്യമായി മാപ്പ് ചോദിച്ചത്.
സൈന്യത്തിനുള്ളിലെ ആശയവിനിമയത്തിലുണ്ടായ പിഴവുകളാണ് ആക്രമണങ്ങള്‍ക്ക് കാരണമായതെന്ന് അദ്ദേഹം വിശദീകരിച്ചു. 'ഇറാന്‍ നടത്തിയ ആക്രമണങ്ങളില്‍ അയല്‍രാജ്യങ്ങളോട് ഞാന്‍ ക്ഷമ ചോദിക്കുന്നു. എന്റെ പേരിലും ഇറാന്റെ പേരിലും ഈ ഖേദം രേഖപ്പെടുത്തുന്നു,' പെസെഷ്‌കിയാന്‍ പറഞ്ഞു.
ഇറാനിലെ താല്‍ക്കാലിക നേതൃത്വ കൗണ്‍സില്‍ അയല്‍രാജ്യങ്ങള്‍ക്കെതിരായ ആക്രമണങ്ങള്‍ നിര്‍ത്തിവെക്കാന്‍ തീരുമാനിച്ചതായി പ്രസിഡന്റ് അറിയിച്ചു. ഈ രാജ്യങ്ങളില്‍ നിന്ന് ഇറാനെതിരെ സൈനിക നീക്കമുണ്ടായാല്‍ മാത്രമേ ഇനി മിസൈല്‍ ആക്രമണങ്ങള്‍ നടത്തുകയുള്ളൂ. ശനിയാഴ്ച മുതല്‍ അയല്‍രാജ്യങ്ങള്‍ക്ക് നേരെ പുതിയ ആക്രമണങ്ങള്‍ ഉണ്ടാകില്ലെന്ന് കൗണ്‍സില്‍ ഉറപ്പുനല്‍കിയതായും അദ്ദേഹം വ്യക്തമാക്കി.
അമേരിക്കയ്ക്ക് മുന്നില്‍ കീഴടങ്ങില്ല
അതേസമയം, നിരുപാധികം കീഴടങ്ങണമെന്ന അമേരിക്കയുടെ ആവശ്യം ഇറാന്‍ തള്ളി. 'അമേരിക്കയുടെ ഈ ആവശ്യം അവര്‍ക്ക് ശവക്കുഴിയിലേക്ക് കൊണ്ടുപോകാനുള്ള ഒരു സ്വപ്നം മാത്രമായി അവശേഷിക്കും,' പെസെഷ്‌കിയാന്‍ തുറന്നടിച്ചു. മേഖലയില്‍ സമാധാനം പുനഃസ്ഥാപിക്കാന്‍ തയ്യാറാണെങ്കിലും വിദേശശക്തികളുടെ സമ്മര്‍ദ്ദത്തിന് വഴങ്ങില്ലെന്ന ശക്തമായ മുന്നറിയിപ്പും അദ്ദേഹം നല്‍കി.
.jpg)
Related News
