ദുബായ്: പശ്ചിമേഷ്യന്‍ രാജ്യങ്ങളെ മുള്‍മുനയില്‍ നിര്‍ത്തിക്കൊണ്ട് ഇസ്രായേലും അമേരിക്കയും ഇറാനില്‍ സംയുക്ത സൈനികാക്രമണം ആരംഭിച്ചതോടെ ഗള്‍ഫ് മേഖലയില്‍ കനത്ത ജാഗ്രത. 'ഓപ്പറേഷന്‍ എപ്പിക് ഫ്യൂറി' എന്ന് യുഎസ് പേരിട്ടിരിക്കുന്ന ഈ സൈനിക നീക്കം ഇറാന്റെ ആണവ കേന്ദ്രങ്ങളെയും മിസൈല്‍ സംഭരണികളെയും ലക്ഷ്യം വെച്ചുള്ളതാണ്. ആക്രമണത്തിന് മറുപടിയായി ഇറാന്‍ ഇസ്രായേലിന് നേരെ മിസൈലുകള്‍ വര്‍ഷിച്ചതോടെ മേഖല ഒന്നടങ്കം യുദ്ധഭീതിയിലായി.
യുദ്ധം ഇറാനിലും ഇസ്രായേലിലും ഒതുങ്ങില്ലെന്ന സൂചന നല്‍കിക്കൊണ്ട് ഗള്‍ഫിലെ വിവിധ രാജ്യങ്ങളില്‍ സ്‌ഫോടന ശബ്ദങ്ങള്‍ കേട്ടതായി റിപ്പോര്‍ട്ടുകളുണ്ട്.
പശ്ചിമേഷ്യയിലെ ഏറ്റവും വലിയ യുഎസ് സൈനിക താവളമുള്ള ഖത്തറില്‍ ലൗഡ് സ്‌ഫോടനങ്ങള്‍ റിപ്പോര്‍ട്ട് ചെയ്യപ്പെട്ടു. ഖത്തറിലെ യുഎസ് എംബസി തങ്ങളുടെ ഉദ്യോഗസ്ഥര്‍ക്കും പൗരന്മാര്‍ക്കും 'ഷെല്‍ട്ടര്‍ ഇന്‍ പ്ലേസ്' (സുരക്ഷിത സ്ഥാനങ്ങളില്‍ തുടരാന്‍) നിര്‍ദ്ദേശം നല്‍കിയിരിക്കുകയാണ്.
യുഎസ് അഞ്ചാം കപ്പല്‍ പടയുടെ ആസ്ഥാനമായ ബഹ്റൈനിലും മിസൈല്‍ ആക്രമണം ഉണ്ടായതായി റിപ്പോര്‍ട്ടുകളുണ്ട്. ഇവിടെയും യുഎസ് എംബസി ജാഗ്രതാ നിര്‍ദ്ദേശം പുറപ്പെടുവിച്ചു. അബുദാബിയിലും കുവൈറ്റിലും സ്‌ഫോടന ശബ്ദങ്ങള്‍ കേട്ടതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്യുന്നു.
ആകാശപാതകള്‍ അടച്ചു; വിമാന സര്‍വീസുകള്‍ താറുമാറായി
യുദ്ധസാഹചര്യം കണക്കിലെടുത്ത് ഇറാന്‍, ഇസ്രായേല്‍, ഇറാഖ് എന്നീ രാജ്യങ്ങള്‍ തങ്ങളുടെ ആകാശപാതകള്‍ പൂര്‍ണ്ണമായും അടച്ചു. ജോര്‍ദാന്‍, സിറിയ, യുഎഇ എന്നീ രാജ്യങ്ങളും ഭാഗികമായി നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. ഇതോടെ ഇന്ത്യയില്‍ നിന്നുള്ളതടക്കം നൂറുകണക്കിന് വിമാന സര്‍വീസുകള്‍ റദ്ദാക്കുകയോ വഴിതിരിച്ചുവിടുകയോ ചെയ്തു.
ഇസ്രായേലിന്റെ വടക്കന്‍ മേഖലകളിലേക്കും ടെല്‍ അവീവിലേക്കും ഇറാന്‍ ബാലിസ്റ്റിക് മിസൈലുകള്‍ തൊടുത്തുവിട്ടു. ഹൈഫ ഉള്‍പ്പെടെയുള്ള നഗരങ്ങളില്‍ വ്യോമാക്രമണ സൈറണുകള്‍ മുഴങ്ങുകയാണ്. തങ്ങളുടെ പരമാധികാരത്തിന് മേലുള്ള കടന്നുകയറ്റത്തിന് 'കനത്ത പ്രഹരം' നല്‍കുമെന്നാണ് ഇറാന്‍ പ്രഖ്യാപിച്ചിരിക്കുന്നത്.
സാമ്പത്തിക പ്രത്യാഘാതം
ആക്രമണ വാര്‍ത്ത പുറത്തുവന്നതോടെ ആഗോള വിപണിയില്‍ എണ്ണവില കുതിച്ചുയര്‍ന്നു. ഹോര്‍മുസ് കടലിടുക്ക് വഴിയുള്ള ചരക്ക് നീക്കം തടസ്സപ്പെടുമോ എന്ന ആശങ്കയിലാണ് ലോകരാജ്യങ്ങള്‍. ഇറാന്‍ എണ്ണ ഉല്‍പ്പാദന കേന്ദ്രങ്ങളെ ലക്ഷ്യം വെച്ചാല്‍ ബാരലിന് 100 ഡോളറിന് മുകളില്‍ വില എത്താന്‍ സാധ്യതയുണ്ടെന്ന് സാമ്പത്തിക വിദഗ്ധര്‍ വിലയിരുത്തുന്നു.
ഇറാനിലെ ഭരണമാറ്റം ലക്ഷ്യം വെച്ചാണ് ഈ ആക്രമണമെന്ന് സൂചന നല്‍കുന്നതാണ് യുഎസ് പ്രസിഡന്റ് ഡൊണാള്‍ഡ് ട്രംപിന്റെ പ്രസ്താവന. 'നിങ്ങളുടെ ഗവണ്‍മെന്റിനെ ഏറ്റെടുക്കുക' എന്ന് അദ്ദേഹം ഇറാനിലെ ജനങ്ങളോട് ആഹ്വാനം ചെയ്തു.
നിലവില്‍ ഗള്‍ഫ് രാജ്യങ്ങളിലുള്ള ലക്ഷക്കണക്കിന് പ്രവാസികള്‍ വരും മണിക്കൂറുകളിലെ സാഹചര്യങ്ങള്‍ അതീവ ഉത്കണ്ഠയോടെയാണ് നിരീക്ഷിക്കുന്നത്.
.jpg)
Related News
