ജിദ്ദ: എഫ്.ഐ.എ ഫോര്‍മുല- ഇ ലോക ചാമ്പ്യന്‍ഷിപ്പിന്റെ ആവേശകരമായ നാല്, അഞ്ച് റൗണ്ടുകള്‍ക്ക് ഈ വാരം ജിദ്ദ കോര്‍ണിഷ് സര്‍ക്യൂട്ട് വേദിയാകും. 2025-26 സീസണിലെ ആദ്യ 'ഡബിള്‍ ഹെഡര്‍' (തുടര്‍ച്ചയായ രണ്ട് മത്സരങ്ങള്‍) ഫെബ്രുവരി 13, 14 തീയതികളിലാണ് നടക്കുന്നത്. ആദ്യ മൂന്ന് റൗണ്ടുകള്‍ പിന്നിടുമ്പോള്‍ ആദ്യ അഞ്ച് സ്ഥാനക്കാര്‍ തമ്മില്‍ കേവലം ഏഴ് പോയിന്റുകളുടെ മാത്രം വ്യത്യാസമാണുള്ളത്. ഇത് ജിദ്ദയിലെ രാത്രികാല മത്സരങ്ങളെ കൂടുതല്‍ വാശിയേറിയതാക്കും.

ഈ സീസണിലെ പ്രധാന ആകര്‍ഷണമായ 'പിറ്റ് ബൂസ്റ്റ്' സൗകര്യം ഈ ആഴ്ച തിരിച്ചെത്തുന്നു എന്ന പ്രത്യേകതയുമുണ്ട്. റേസിനിടയില്‍ നിര്‍ബന്ധമായും നടത്തേണ്ട ഈ പിറ്റ് സ്റ്റോപ്പിലൂടെ വാഹനങ്ങള്‍ക്ക് 10 ശതമാനം അധിക ഊര്‍ജ്ജം ലഭ്യമാകും. ഇത് ടീമുകളുടെ തന്ത്രങ്ങളില്‍ വലിയ മാറ്റങ്ങള്‍ കൊണ്ടുവരും. മിയാമിയിലെ വിജയത്തിന്റെ ആത്മവിശ്വാസത്തില്‍ എത്തുന്ന ജാഗ്വാര്‍ ടി.സി.എസ് റേസിംഗിന്റെ മിച്ച് ഇവാന്‍സ്, ജിദ്ദയിലും മികച്ച പ്രകടനം ആവര്‍ത്തിക്കാനാകുമെന്ന പ്രതീക്ഷ പങ്കുവെച്ചു.

ജിദ്ദയിലെ ട്രാക്ക് തങ്ങള്‍ക്ക് അനുകൂലമാണെന്നും എന്നാല്‍ പിറ്റ് ബൂസ്റ്റ് ഉള്‍പ്പെടെയുള്ള മാറ്റങ്ങള്‍ വെല്ലുവിളിയാണെന്നും പോര്‍ഷെ ടീമിന്റെ നിക്കോ മുള്ളര്‍ പറഞ്ഞു. രാത്രിയില്‍ നടക്കുന്ന റേസ് ആയതിനാല്‍ ട്രാക്കിലെ താപനിലയിലുണ്ടാകുന്ന മാറ്റങ്ങള്‍ ടയറുകളുടെ പ്രകടനത്തെയും ഊര്‍ജ്ജക്ഷമതയെയും ബാധിക്കാന്‍ സാധ്യതയുണ്ട്.