കോഴിക്കോട്: സമൂഹമാധ്യമങ്ങളിലൂടെ അപകീര്ത്തികരമായ വീഡിയോ പ്രചരിപ്പിച്ചതിനെത്തുടര്ന്ന് ഗോവിന്ദപുരം സ്വദേശി യു. ദീപക് (41) ആത്മഹത്യ ചെയ്ത കേസില് അറസ്റ്റിലായ ഷിംജിത മുസ്തഫയ്ക്ക് ജാമ്യം ലഭിച്ചു. കോഴിക്കോട് പ്രിന്സിപ്പല് സെഷന്സ് കോടതിയാണ് കര്ശന ഉപാധികളോടെ ജാമ്യം അനുവദിച്ചത്. നേരത്തെ കുന്നമംഗലം മജിസ്ട്രേറ്റ് കോടതി ജാമ്യാപേക്ഷ തള്ളിയതിനെത്തുടര്ന്നാണ് പ്രതി സെഷന്സ് കോടതിയെ സമീപിച്ചത്.
മാസത്തില് രണ്ടുതവണ അന്വേഷണ ഉദ്യോഗസ്ഥന് മുന്നില് ഹാജരാകണമെന്ന വ്യവസ്ഥയിലാണ് ജാമ്യം. 21 ദിവസമായി മഞ്ചേരി വനിതാ സബ് ജയിലില് റിമാന്ഡിലായിരുന്നു ഷിംജിത. ദീപക്കിന്റെ വീട്ടില് നിന്ന് കസ്റ്റഡിയിലെടുത്ത ലാപ്ടോപ്പ്, മൊബൈല് ഫോണ് എന്നിവയുടെ ഫൊറന്സിക് ഫലം വരുന്നത് വരെ ജാമ്യം നല്കരുതെന്ന് പ്രോസിക്യൂഷന് വാദിച്ചു. ഭീഷണിപ്പെടുത്തല് അടക്കമുള്ള കാര്യങ്ങളില് വ്യക്തത വരാന് ഇത് അത്യാവശ്യമാണെന്ന് ഗവ. പ്ലീഡര് അഡ്വ. ശ്രീജ കോടതിയെ അറിയിച്ചു. എ്ന്നാല് അന്വേഷണവുമായി സഹകരിക്കുന്നുണ്ടെന്നും ഫൊറന്സിക് ഫലം വരുന്നത് വരെ ജയിലില് തുടരേണ്ട സാഹചര്യമില്ലെന്നും പ്രതിഭാഗം അഭിഭാഷക അഡ്വ. എം. സുഷമ വാദിച്ചു.
ബസില് വെച്ച് ദീപക് തനിക്ക് നേരെ ലൈംഗികാതിക്രമം നടത്തിയെന്ന് ആരോപിച്ച് ഷിംജിത ഇന്സ്റ്റഗ്രാമില് വീഡിയോ പങ്കുവെച്ചിരുന്നു. എന്നാല് ഇതേക്കുറിച്ച് പോലീസില് പരാതി നല്കാന് ഷിംജിത തയ്യാറായിരുന്നില്ല. വീഡിയോ വ്യാപകമായി പ്രചരിച്ചതിന് പിന്നാലെ മാനസികമായി തകര്ന്ന ദീപക്കിനെ വീടിനുള്ളില് മരിച്ച നിലയില് കണ്ടെത്തുകയായിരുന്നു.
ദീപക്കിന്റെ മാതാവ് നല്കിയ പരാതിയിലാണ് ആത്മഹത്യാ പ്രേരണാ കുറ്റം ചുമത്തി ഷിംജിതയെ അറസ്റ്റ് ചെയ്തത്. പത്തുവര്ഷം വരെ തടവ് ലഭിക്കാവുന്ന കുറ്റമാണിത്. ജനുവരി 19-ന് കേസെടുത്തതിന് പിന്നാലെ ഒളിവില് പോയ ഷിംജിതയെ ജനുവരി 21-നാണ് വടകരയില് നിന്ന് മെഡിക്കല് കോളേജ് പോലീസ് പിടികൂടിയത്.
തനിക്ക് നേരെ അതിക്രമം ഉണ്ടായെന്ന ആരോപണത്തില് ഷിംജിത ഇപ്പോഴും ഉറച്ചുനില്ക്കുകയാണ്. സംഭവമുണ്ടായ ബസില് എത്തിച്ച് തെളിവെടുപ്പ് നടത്താനുള്ള നീക്കത്തിലാണ് പോലീസ്.
Related News
