ബെംഗളൂരു: ട്രാഫിക് സിഗ്നലുകള് ഒഴിവാക്കി വേഗത്തില് വീട്ടിലെത്താന് ആംബുലന്സില് സൈറണ് മുഴക്കി പാഞ്ഞ ഡ്രൈവര് പിടിയില്. ബനശങ്കരിയില് താമസിക്കുന്ന ആംബുലന്സ് ഡ്രൈവര് മോഹന്കുമാറാണ് പിടിയിലായത്. കഴിഞ്ഞദിവസം രാമയ്യ മെഡിക്കല് കോളേജില്നിന്ന് അതിവേഗത്തിലെത്തിയ ആംബുലന്സ് സംശയംതോന്നി പോലീസ് തടഞ്ഞു നിര്ത്തിയതിനെത്തുടര്ന്നാണ് മെഡിക്കല് ആവശ്യമല്ലായിരുന്നുവെന്ന് വ്യക്തമായത്.
മെഡിക്കല് കോളേജില്നിന്ന് പാഞ്ഞെത്തിയ ആംബുലന്സ് കണ്ട് മറ്റ് വാഹനങ്ങള് മാറ്റി കടത്തുപോകാന് സൗകര്യംഒരുക്കി. എന്നാല് ആംബുലന്സില് രോഗിയില്ലെന്ന് കണ്ട് സംശയം തോന്നിയ ട്രാഫിക് പോലീസ് തടഞ്ഞുനിര്ത്തി കാര്യം തിരക്കി. അടിയന്തര ചികിത്സവേണ്ട രോഗിയെ ആശുപത്രിയിലേക്ക് കൂട്ടിക്കൊണ്ടുവരാന് പോകുകയാണെന്ന് മോഹന്കുമാര് പറഞ്ഞു. ഇയാള് പറഞ്ഞ സ്ഥലത്തുനിന്ന് രോഗിയുമായി ആശുപത്രിയില് എത്താന് ഒരുമണിക്കൂര് വേണ്ടി വരുമായിരുന്നു.
സമയം വൈകുന്നതിനാല് രോഗിയുടെ അടുത്തുള്ള വേറെ ആംബുലന്സ് ക്രമീകരിക്കാമെന്ന് അറിയിച്ച പോലീസ് രോഗിയുടെ കൂടുതല് വിശദാംശങ്ങള് തിരക്കി. ഇതോടെ ഇയാള് സത്യം വെളിപ്പെടുത്തുകയായിരുന്നു. രാമയ്യ മെഡിക്കല് കോളേജ് ആശുപത്രിയില് രോഗിയെ എത്തിച്ചതിനുശേഷം വീട്ടിലേക്ക് പോകുകയായിരുന്നുവെന്നും വേഗത്തിലെത്താന് വേണ്ടിയാണ് സൈറണ് മുഴക്കി പാഞ്ഞതെന്നും സമ്മതിച്ചു.
ഇതിന് മുന്പും മോഹന്കുമാര് ഇത്തരത്തില് യാത്രചെയ്തിട്ടുണ്ടെന്ന് പോലീസ് പറഞ്ഞു. ആംബുലന്സ് പിടിച്ചെടുത്തതിന് ശേഷം ഇയാള്ക്കെതിരേ കേസെടുത്തു.
Related News
