ന്യൂഡല്‍ഹി: മുസ്‌ലിം ലീഗ് നേതാവ് കെ.എം. ഷാജിക്ക് വരാനിരിക്കുന്ന തിരഞ്ഞെടുപ്പുകളില്‍ മത്സരിക്കുന്നതിന് തടസ്സമില്ലെന്ന് സുപ്രീം കോടതി. 2016-ലെ അഴീക്കോട് നിയമസഭാ തിരഞ്ഞെടുപ്പുമായി ബന്ധപ്പെട്ട് കേരള ഹൈക്കോടതി വിധിച്ച ആറ് വര്‍ഷത്തെ അയോഗ്യത സുപ്രീം കോടതി റദ്ദാക്കി. ഹൈക്കോടതിയുടെ നടപടി അധികാരപരിധി മറികടന്നുള്ളതാണെന്ന് കോടതി നിരീക്ഷിച്ചു.

തിരഞ്ഞെടുപ്പ് പ്രചാരണത്തിനിടെ വര്‍ഗീയ വികാരം ഇളക്കിവിടുന്ന തരത്തിലുള്ള നോട്ടീസുകള്‍ പ്രചരിപ്പിച്ചു എന്ന എതിര്‍ സ്ഥാനാര്‍ത്ഥി എം.വി. നികേഷ് കുമാറിന്റെ പരാതിയിലായിരുന്നു ഹൈക്കോടതി ഷാജിയെ അയോഗ്യനാക്കിയത്. എന്നാല്‍, ഷാജിയുടെ അന്നത്തെ എം.എല്‍.എ കാലാവധി കഴിഞ്ഞതിനാല്‍ തിരഞ്ഞെടുപ്പ് ക്രമക്കേട് സംബന്ധിച്ച ഹൈക്കോടതിയുടെ കണ്ടെത്തലുകളില്‍ ഇടപെടുന്നില്ലെന്ന് സുപ്രീം കോടതി വ്യക്തമാക്കി. അതേസമയം, മത്സരിക്കുന്നതില്‍ നിന്ന് വിലക്കിയ ഉത്തരവ് നിലനില്‍ക്കില്ലെന്ന് കോടതി വിധി പ്രസ്താവിച്ചു.

തിരഞ്ഞെടുപ്പ് കേസ് ഇപ്പോള്‍ അപ്രസക്തമാണെന്നും അതിനാല്‍ ഹൈക്കോടതി ഉത്തരവ് റദ്ദാക്കണമെന്നും ഷാജിക്ക് വേണ്ടി ഹാജരായ സീനിയര്‍ അഭിഭാഷകന്‍ നിഖില്‍ ഗോയല്‍ വാദിച്ചു. തിരഞ്ഞെടുപ്പ് അസാധുവാക്കിയാലും അയോഗ്യത നിലനില്‍ക്കണമെന്ന് നികേഷ് കുമാറിന് വേണ്ടി ഹാജരായ അഡ്വ. പി.വി. ദിനേശ് ആവശ്യപ്പെട്ടു.

നേരത്തെ സുപ്രീം കോടതി ഹൈക്കോടതി വിധി സ്റ്റേ ചെയ്തിരുന്നെങ്കിലും നിയമസഭയില്‍ വോട്ട് ചെയ്യാനോ ശമ്പളവും മറ്റ് ആനുകൂല്യങ്ങളും കൈപ്പറ്റാനോ ഷാജിക്ക് അനുവാദമുണ്ടായിരുന്നില്ല. പുതിയ വിധിയോടെ ഇത്തരം നിയന്ത്രണങ്ങള്‍ നീങ്ങുകയും വരാനിരിക്കുന്ന നിയമസഭാ തിരഞ്ഞെടുപ്പില്‍ മത്സരിക്കാനുള്ള നിയമതടസ്സം ഇല്ലാതാവുകയും ചെയ്തു.