തിരുവനന്തപുരം: പുത്തരിക്കണ്ടം മൈതാനത്ത് നടന്ന പ്രധാനമന്ത്രിയുടെ പരിപാടിക്കിടെ, അദ്ദേഹത്തെ യാത്രയാക്കാന്‍ വേദിക്ക് അരികിലേക്ക് പോകാതെ മാറിനിന്ന സംഭവത്തില്‍ വിശദീകരണവുമായി ബിജെപി കൗണ്‍സിലര്‍ ആര്‍. ശ്രീലേഖ. പാര്‍ട്ടി നല്‍കിയ ചിട്ടയായ പരിശീലനവും അച്ചടക്കവും കാരണമാണ് താന്‍ സ്വന്തം ഇരിപ്പിടം വിട്ടുമാറാത്തതെന്ന് സോഷ്യല്‍ മീഡിയയില്‍ പങ്കുവെച്ച വീഡിയോയിലൂടെ അവര്‍ വ്യക്തമാക്കി.
പാര്‍ട്ടിയുടെ ഉപാധ്യക്ഷ എന്ന നിലയില്‍ തനിക്ക് നിശ്ചയിച്ചു നല്‍കിയ ഇരിപ്പിടത്തില്‍ തന്നെ തുടരണമെന്നായിരുന്നു ധാരണയെന്ന് ശ്രീലേഖ പറഞ്ഞു. 'ക്ഷണിക്കപ്പെട്ടാലല്ലാതെ വിവിഐപി പരിപാടികളില്‍ പ്രധാനമന്ത്രിയുടെ അരികിലേക്ക് പോകരുതെന്ന തരത്തിലുള്ള പരിശീലനം ലഭിച്ചതിനാലാകാം തന്റെ സ്ഥാനത്തുനിന്ന് മാറാന്‍ തോന്നാതിരുന്നത്. വിവിഐപി എന്‍ട്രന്‍സിലൂടെ വന്ന് പ്രധാനമന്ത്രി അതേ വഴി തിരികെ പോകുമ്പോള്‍, താനും ആ വഴിക്ക് പോകുന്നത് ശരിയല്ലെന്നാണ് കരുതിയത്,' ശ്രീലേഖ വിശദീകരിച്ചു.
സംഭവത്തെ മാധ്യമങ്ങള്‍ മോശമായി ചിത്രീകരിച്ചതായും അവര്‍ ആരോപിച്ചു. മേയര്‍ വി.വി. രാജേഷ്, കെ. സുരേന്ദ്രന്‍ ഉള്‍പ്പെടെയുള്ള മുതിര്‍ന്ന നേതാക്കള്‍ മോദിയെ യാത്രയാക്കുമ്പോള്‍ ശ്രീലേഖ മാറിനിന്നത് വലിയ ചര്‍ച്ചയായിരുന്നു. മേയര്‍ സ്ഥാനമുള്‍പ്പെടെയുള്ള പദവികള്‍ ലഭിക്കാത്തതിലുള്ള അതൃപ്തിയാണോ ഈ മാറിനില്‍ക്കലിന് പിന്നിലെന്ന് സോഷ്യല്‍ മീഡിയയില്‍ ചോദ്യങ്ങള്‍ ഉയര്‍ന്നിരുന്നു. എന്നാല്‍ ഇത്തരം അഭ്യൂഹങ്ങള്‍ അടിസ്ഥാനരഹിതമാണെന്നും താന്‍ എന്നും ബിജെപിക്കൊപ്പമാണെന്നും അവര്‍ വ്യക്തമാക്കി.
'ആരും തെറ്റിദ്ധരിക്കേണ്ടതില്ല, എപ്പോഴും ബിജെപിക്കൊപ്പമായിരിക്കും. ഞാന്‍ നിങ്ങളുടെ സ്വന്തം ശ്രീലേഖ,' എന്ന് പറഞ്ഞുകൊണ്ടാണ് അവര്‍ വീഡിയോ അവസാനിപ്പിച്ചത്. പാര്‍ട്ടി പ്രവര്‍ത്തകര്‍ക്കിടയിലും പൊതുജനങ്ങള്‍ക്കിടയിലും നിലനില്‍ക്കുന്ന ആശയക്കുഴപ്പം നീക്കുക എന്ന ലക്ഷ്യത്തോടെയാണ് ഈ വിശദീകരണമെന്നാണ് വിലയിരുത്തപ്പെടുന്നത്.
Related News
