തിരുവനന്തപുരം: ഗുജറാത്തില്‍ സംഘപരിവാര്‍ നടത്തിയ അതേ അജണ്ടയാണ് കേരളത്തില്‍ സിപിഎം നടത്തിക്കൊണ്ടിരിക്കുന്നതെന്ന് പ്രതിപക്ഷ നേതാവ് വി.ഡി. സതീശന്‍. ഗുജറാത്തിലെ നിയമസഭാ തിരഞ്ഞെടുപ്പ് സമയത്ത് മുസ്ലിം വിരുദ്ധ വികാരം സൃഷ്ടിക്കുന്നതിനായി ബിജെപി നടത്തിയ പ്രചാരണത്തിന് സമാനമാണ് എ.കെ. ബാലന്റെ വാക്കുകളെന്ന് സതീശന്‍ പറഞ്ഞു. ഗുജറാത്തില്‍ കോണ്‍ഗ്രസ് ജയിച്ചാല്‍ അഹമ്മദ് പട്ടേല്‍ മുഖ്യമന്ത്രിയാകുമെന്ന് ബിജെപി പ്രചരിപ്പിച്ചത് പോലെ, കേരളത്തില്‍ ഭൂരിപക്ഷ സമുദായത്തിനിടയില്‍ ഭീതിയും വിദ്വേഷവും ഉണ്ടാക്കാനാണ് സിപിഎം ശ്രമിക്കുന്നതെന്നും അദ്ദേഹം വ്യക്തമാക്കി. യുഡിഎഫ് അധികാരത്തിലെത്തിയാല്‍ ആഭ്യന്തര വകുപ്പ് കൈകാര്യം ചെയ്യുക ജമാഅത്തെ ഇസ്ലാമിയാകുമെന്ന് കഴിഞ്ഞ ദിവസം എ.കെ.ബാലന്‍ പറഞ്ഞിരുന്നു. ഇതിനോട് പ്രതികരിക്കുകയായിരുന്നു പ്രതിപക്ഷ നേതാവ്.
വെള്ളാപ്പള്ളി നടേശന്റെയും എ.കെ. ബാലന്റെയും പ്രസ്താവനകള്‍ ഒരേ ലക്ഷ്യത്തോടെയുള്ളതാണെന്നും, സംഘപരിവാര്‍ അജണ്ട നടപ്പാക്കുന്നതിന്റെ ഭാഗമായാണ് സിപിഎം ഇത്തരം പ്രചാരണങ്ങള്‍ നടത്തുന്നതെന്നും സതീശന്‍ ആരോപിച്ചു. സിപിഎം നേതൃത്വത്തിന്റെ പൂര്‍ണ്ണമായ അറിവോടെയാണ് ഈ നീക്കങ്ങള്‍ നടക്കുന്നതെന്നും അദ്ദേഹം പറഞ്ഞു.
ബി.ജെ.പി ഗുജറാത്തില്‍ നടത്തിയതിനേക്കാള്‍ മോശം പ്രസ്താവനയാണ് ബാലന്‍ നടത്തിയത്. സി.പി.എം നേതൃത്വത്തിന്റെ അറിവോടെയാണ് ബാലന്റെ പ്രസ്താവന. വെള്ളാപ്പള്ളി നടേശനും എ.കെ ബാലനും നടത്തിയ പ്രസ്താവനകള്‍ കൂട്ടിവായിച്ചാല്‍ അത് മനസിലാകും. വെള്ളാപ്പള്ളി നടത്തിയ പ്രസ്താവനയെ എതിര്‍ത്ത സി.പി.ഐ നേതാവ് ബിനോയ് വിശ്വം എ.കെ ബാലന്‍ നടത്തിയ പ്രസ്താവനയെ പിന്തുണയ്ക്കുന്നുണ്ടോ? അതേക്കുറിച്ച് അറിയാന്‍ ആഗ്രഹമുണ്ട്. വെള്ളാപ്പള്ളിയെ എതിര്‍ത്തതിന് ബിനോയ് വിശ്വത്തെ രൂക്ഷമായാണ് സി.പി.എം നേതാക്കള്‍ വിമര്‍ശിച്ചത്. ബിനോയ് വിശ്വം ഉത്തരം താങ്ങുന്ന പല്ലിയാണെന്നാണ് പറഞ്ഞത്. ഇടതു മുന്നണി ശിഥിലീകരിക്കപ്പെടുന്നതിന് ഇടയിലാണ് ബി.ജെ.പിയും സംഘ്പരിവാറും നടത്തുന്നതിന് സമാനമായ വര്‍ഗീയ കാമ്പയിന്‍ സി.പി.എം ഏറ്റെടുത്തിരിക്കുന്നത്. അതിന്റെ ഭാഗമായാണ് ഇവര്‍ എല്ലാവരും സമാനമായ രീതിയില്‍ സംസാരിക്കുന്നത്. പ്രബുദ്ധ കേരളം സി.പി.എം നേതാക്കള്‍ നടത്തുന്ന വിദ്വേഷ കാമ്പയിന്‍ ചെറുത്ത് തോല്‍പ്പിക്കുമെന്നും സതീശന്‍ പറഞ്ഞു.
സിപിഎം സൈബര്‍ സംഘത്തിന് നേതൃത്വം നല്‍കുന്ന എം.വി. നികേഷ് കുമാറിനെതിരെയും വി.ഡി.സതീശന്‍ പരോക്ഷ വിമര്‍ശനം നടത്തി. എകെജി സെന്ററില്‍ ഇരുന്നുകൊണ്ട് ഒരാള്‍ തനിക്കെതിരെ നിരന്തരം വ്യാജപ്രചാരണം നടത്തുന്നുവെന്നും, ഒരു ദിവസം പത്തോളം കാര്‍ഡുകള്‍ (ഡിജിറ്റല്‍ പോസ്റ്ററുകള്‍) തനിക്കെതിരെ ഇറക്കുന്നുണ്ട്. എനിക്കെതിരെ പത്ത് വ്യാജ കാര്‍ഡുകള്‍ ഇറക്കുമ്പോള്‍, വൈകാതെ തന്നെ അവര്‍ക്കെതിരെ ഒരു 'ഒറിജിനല്‍ കാര്‍ഡ്' വരും' സതീശന്‍ മുന്നറിയിപ്പ് നല്‍കി.
ശബരിമലയിലെ സ്വര്‍ണക്കൊള്ളക്ക് കൂട്ടുനിന്നത് മുന്‍ ദേവസ്വം ബോര്‍ഡ് പ്രസിഡന്റ് പത്മകുമാറാണെന്ന ഗുരുതര ആരോപണം എസ്.ഐ.ടി കോടതിയില്‍ ഉന്നയിച്ചിരിക്കുകയാണ്. എന്നിട്ടും സ്വര്‍ണം കവരാന്‍ കൂട്ടുനില്‍ക്കുകയും ഗൂഢാലോചന നടത്തുകയും ചെയ്ത പത്മകുമാറിനെയും മറ്റു നേതാക്കളെയും സി.പി.എം സംരക്ഷിക്കുകയാണ്. പത്മകുമാര്‍ പറഞ്ഞ ദൈവതുല്യനായ ആളെ സംരക്ഷിക്കാനാണോ ഇതൊക്കെ ചെയ്യുന്നതെന്ന് സി.പി.എം വ്യക്തമാക്കണം. അയ്യപ്പന്റെ സ്വര്‍ണം കവര്‍ന്നവര്‍ക്കെതിരെ രൂക്ഷമായ ഭാഷയില്‍ എസ്.ഐ.ടി കോടതിയില്‍ റിപ്പോര്‍ട്ട് നല്‍കിയിട്ടും അവരെ സംരക്ഷിക്കുന്ന സമീപനമാണ് സി.പി.എം സ്വീകരിക്കുന്നത്. അയ്യപ്പന്റെ സ്വര്‍ണം കവര്‍ന്നവര്‍ക്ക് കുടപിടിക്കുകയും അവരെ സംരക്ഷിക്കുകയുമാണ് സി.പി.എമ്മും സര്‍ക്കാരും ചെയ്യുന്നതെന്നും പ്രതിപക്ഷ നേതാവ് പറഞ്ഞു.
Related News
