തിരുവനന്തപുരം കോര്‍പ്പറേഷനില്‍ താന്‍ ബിജെപിയുടെ മേയര്‍ സ്ഥാനാര്‍ത്ഥിയാകേണ്ടതായിരുന്നു എന്ന തുറന്നുപറച്ചിലുമായി മുന്‍ ഐപിഎസ് ഉദ്യോഗസ്ഥ ആര്‍. ശ്രീലേഖ. തെരഞ്ഞെടുപ്പ് രാഷ്ട്രീയത്തിലേക്ക് താന്‍ വരാന്‍ മടിച്ചതാണെന്നും എന്നാല്‍ ബിജെപി സംസ്ഥാന നേതൃത്വം നല്‍കിയ ഉറച്ച വാഗ്ദാനത്തിന്മേലാണ് മത്സരിക്കാന്‍ ഇറങ്ങിയതെന്നും ശ്രീലേഖ വെളിപ്പെടുത്തി. ഒരു ഓണ്‍ലൈന്‍ മാധ്യമത്തിന് നല്‍കിയ അഭിമുഖത്തിലാണ് പാര്‍ട്ടിക്കുള്ളിലെ തര്‍ക്കങ്ങളും അതൃപ്തിയും അവര്‍ പങ്കുവെച്ചത്.

മേയര്‍ സ്ഥാനം ഉറപ്പുനല്‍കിയാണ് തന്നെ മത്സര രംഗത്തിറക്കിയത്. എല്ലാം തീരുമാനിച്ചുറപ്പിച്ച ഘട്ടത്തിലാണ് കേന്ദ്രനേതൃത്വം ഇടപെട്ടതും തീരുമാനം മാറ്റിയതും. വി.വി. രാജേഷും ആശാനാഥും കൂടുതല്‍ മികച്ച രീതിയില്‍ പ്രവര്‍ത്തിക്കുമെന്ന് കേന്ദ്രം വിലയിരുത്തിയിട്ടുണ്ടാകാം എന്ന് അവര്‍ പരിഹാസരൂപേണ കൂട്ടിച്ചേര്‍ത്തു.

നേരത്തെയും പാര്‍ട്ടി തീരുമാനങ്ങളില്‍ ശ്രീലേഖ പരസ്യമായി അതൃപ്തി പ്രകടിപ്പിച്ചിരുന്നു. വി.വി. രാജേഷിന്റെയും ആശാനാഥിന്റെയും സത്യപ്രതിജ്ഞാ ചടങ്ങ് അവസാനിക്കുന്നതിന് മുന്‍പേ വേദി വിട്ടിറങ്ങിയ ശ്രീലേഖയുടെ നടപടി അന്ന് രാഷ്ട്രീയ വൃത്തങ്ങളില്‍ വലിയ ചര്‍ച്ചയായിരുന്നു. ആ സംഭവത്തിന് പിന്നിലെ യഥാര്‍ത്ഥ കാരണം ഇപ്പോള്‍ പുറത്തുവന്ന വെളിപ്പെടുത്തലുകളിലൂടെ വ്യക്തമാകുകയാണ്.