തൃശൂര്‍: തൃശൂര്‍ റെയില്‍വേ സ്റ്റേഷനിലെ ബൈക്ക് പാര്‍ക്കിങ് കേന്ദ്രത്തിലുണ്ടായ വന്‍ തീപിടിത്തത്തില്‍ അഞ്ഞൂറോളം ബൈക്കുകള്‍ കത്തിനശിച്ചു. രണ്ടാമത്തെ പ്ലാറ്റ്ഫോമിന് സമീപമുള്ള പാര്‍ക്കിങ് ഷെഡിനാണ് തീപിടിച്ചത്. അപകടത്തില്‍ ആര്‍ക്കും പരിക്കില്ല. പാര്‍ക്കിങ് ഷെഡിന് മുകളിലെ റെയില്‍വേ ലൈനില്‍ നിന്ന് ബൈക്കുകളിലേക്ക് തീപ്പൊരി വീണതാണ് അപകടകാരണമെന്നാണ് പ്രാഥമിക നിഗമനം. ആദ്യം രണ്ട് ബൈക്കുകള്‍ക്കാണ് തീപിടിച്ചത്. നിമിഷങ്ങള്‍ക്കകം തീ ആളിപ്പടരുകയും ഷെഡിലുണ്ടായിരുന്ന മറ്റു വാഹനങ്ങളിലേക്ക് വ്യാപിക്കുകയുമായിരുന്നു. ബൈക്കുകളുടെ പെട്രോള്‍ ടാങ്കുകള്‍ പൊട്ടിത്തെറിച്ചത് തീയുടെ തീവ്രത വര്‍ധിപ്പിച്ചു. സമീപത്തെ മരങ്ങളിലേക്കും തീ പടര്‍ന്നു പിടിച്ചു.
അഗ്‌നിശമനസേനയുടെ അഞ്ച് യൂണിറ്റുകള്‍ സ്ഥലത്തെത്തി ഏറെ നേരത്തെ പരിശ്രമത്തിനൊടുവിലാണ് തീ നിയന്ത്രണവിധേയമാക്കിയത്. തീ പടരുന്നത് ശ്രദ്ധയില്‍പ്പെട്ടയുടന്‍ പാര്‍ക്കിങ് കേന്ദ്രത്തിലുണ്ടായിരുന്ന രണ്ട് ജീവനക്കാരികളും യാത്രക്കാരും ഓടിമാറിയതിനാല്‍ വലിയൊരു ദുരന്തം ഒഴിവായി.
'റെയില്‍വേ ലൈനിന് മുകളില്‍ നിന്ന് ഷീറ്റിട്ട് മൂടിയ ബൈക്കിന് മുകളിലേക്കാണ് തീ വീണത്. ഉടനെ വെള്ളമൊഴിച്ചെങ്കിലും അണയ്ക്കാനായില്ല. ടാങ്ക് പൊട്ടിത്തെറിച്ചതോടെ പുറത്തേക്ക് ഓടി രക്ഷപ്പെടുകയായിരുന്നു.' - പാര്‍ക്കിങ് കേന്ദ്രം ജീവനക്കാരി മല്ലിക പറഞ്ഞു.
അപകടസമയത്ത് അഞ്ഞൂറോളം ബൈക്കുകള്‍ ഷെഡിലുണ്ടായിരുന്നു. ഇവയെല്ലാം പൂര്‍ണമായും കത്തിയതായാണ് വിവരം. ഞായറാഴ്ചയായതിനാല്‍ വാഹനങ്ങള്‍ കുറവായത് അപകടത്തിന്റെ ആഘാതം കുറച്ചു. പ്രവൃത്തിദിവസങ്ങളില്‍ ആയിരത്തിലധികം വാഹനങ്ങളാണ് ഇവിടെ പാര്‍ക്ക് ചെയ്യാറുള്ളത്.
റെയില്‍വേ അധികൃതരും പൊലീസും സ്ഥലത്തെത്തി സ്ഥിതിഗതികള്‍ വിലയിരുത്തി. തീപിടിത്തത്തിന്റെ കൃത്യമായ കാരണം കണ്ടെത്താന്‍ വിശദമായ അന്വേഷണം ആരംഭിച്ചിട്ടുണ്ട്.
Related News
