മലപ്പുറം: തെരഞ്ഞെടുപ്പ് വിജയാഘോഷ പ്രകടനത്തിനിടെ പടക്കം പൊട്ടിത്തെറിച്ച് മുസ്ലിം ലീഗ് പ്രവര്‍ത്തകന്‍ മരിച്ചു.. മലപ്പുറം കൊണ്ടോട്ടി പെരിയമ്പലം പലേക്കോടന്‍ മൊയ്തീന്‍കുട്ടിയുടെ മകന്‍ ഇര്‍ഷാദ് ആണ് മരിച്ചത്. ചെറുകാവ് പെരിയമ്പലത്ത് വൈകിട്ട് ആറരയോടെയാണ് സംഭവം.

ചെറുകാവ് പഞ്ചായത്തിലെ ഒമ്പതാം വാര്‍ഡിലെ തെരഞ്ഞെടുപ്പ് വിജയാഹ്ലാദത്തിനിടെയാണ് അപകടമുണ്ടായത്. സ്‌കൂട്ടറില്‍ വെച്ച പടക്കം ആഘോഷ റാലിയിലുള്ളവര്‍ക്ക് വിതരണം ചെയ്യുകയായിരുന്നു ഇര്‍ഷാദ്. അതിനിടയില്‍ സമീപത്ത് പൊട്ടിയ പടക്കത്തില്‍നിന്നുള്ള തീപ്പൊരി സ്‌കൂട്ടറിലെ പടക്കങ്ങളിലേക്ക് തെറിച്ചുവീഴുകയായിരുന്നു. ഇതോടെ പടക്കശേഖരം ഒന്നാകെ പൊട്ടിത്തെറിച്ച്് വന്‍ സ്‌ഫോടനം ഉണ്ടാവുകയായിരുന്നു. ഗുരുതര പരുക്കേറ്റ ഇര്‍ഷാദിനെ കോഴിക്കോട് മെഡിക്കല്‍ കോളജ് ആശുപത്രിയിലേക്ക് കൊണ്ടുപോയെങ്കിലും വഴിമധ്യേ മരിച്ചു.