പാലക്കാട്: ബലാത്സംഗ കേസില് 15 ദിവസമായി ഒളിവില് കഴിയുകയായിരുന്ന രാഹുല് മാങ്കൂട്ടത്തില് എംഎല്എ പാലക്കാട് എത്തി വോട്ട് ചെയ്തു. വൈകിട്ട് നാലരക്കു ശേഷമാണ് രാഹുല് വോട്ട് ചെയ്യാനെത്തിയത്. കുന്നത്തൂര്മേട് സൗത്തിലെ സെന്റ് സെബാസ്റ്റ്യന്സ് സ്കൂളിലാണ് രാഹുല് വോട്ട് രേഖപ്പെടുത്തിയത്. തിരക്കില്ലാത്ത സമയം നോക്കിയാണ് രാഹുല് വോട്ടു രേഖപ്പെടുത്താനെത്തിയത്.
എംഎല്എയുടെ ഔദ്യോഗിക കാറിലാണ് രാഹുല് വോട്ടു ചെയ്യാനെത്തിയത്. സംഭവമറിഞ്ഞ് സ്ഥലത്തെത്തിയ ഡിവൈഎഫ്ഐ, ബി.ജെ.പി പ്രവര്ത്തകര് രാഹുലിനെതിരെ മുദ്രാവാക്യം മുഴക്കി. പൂവന് കോഴിയുടെയും തൊട്ടിലിന്റെയം ചിത്രങ്ങള് ഉയര്ത്തി കൂകി വിളിയോടെയായിരുന്നു പ്രതിഷേധം. എന്നാല് സത്യം പുറത്തു വരുമെന്നും വിഷയം കോടതിയുടെ പരിധിയിലായതിനാല് കൂടുതല് ഒന്നും പറയാനില്ലെന്നുമായിരുന്നു രാഹുലിന്റെ പ്രതികരണം.
അതിനിടെ രാഹുല് മാങ്കൂട്ടത്തിലിന്റെ ജാമ്യം റദ്ദ് ചെയ്യണമെന്നാവശ്യപ്പെട്ട് സര്ക്കാര് ഹൈക്കോടതിയില് ഹര്ജി നല്കി. രണ്ടാം ബലാത്സംഘ കേസില് സെഷന്സ് കോടതി മുന്കൂര് ജാമ്യം അനുവദിച്ചിരുന്നു. ഇത് റദ്ദ് ചെയ്യണമെന്നാണ് സര്ക്കാര് ആവശ്യം. രാഹുല് സ്ഥിരം കുറ്റവാളിയെന്നും ഹര്ജിയില് പറയുന്നു. രണ്ടാമത്തെ എഫ്.ഐ.ആറിന്റെ മുന്നോട്ടുപോക്കിന് വലിയ പ്രതിസന്ധികള് സൃഷ്ടിക്കാന് കഴിയുന്ന രീതിയിലുള്ള പരാമര്ശങ്ങള് പുറത്തുവന്ന സാഹചര്യത്തിലാണ് ഇതിനെ ഹൈക്കോടതിയില് ചോദ്യം ചെയ്യാന് സര്ക്കാര് തീരുമാനിച്ചത്.
Related News
