കൊല്ലം: അഞ്ചലില്‍ ശബരിമല തീര്‍ഥാടകര്‍ സഞ്ചരിച്ച ബസും ഓട്ടോറിക്ഷയും കൂട്ടിയിടിച്ചുണ്ടായ അപകടത്തില്‍ മൂന്ന് പേര്‍ മരിച്ചു. ഓട്ടോയില്‍ ഉണ്ടായിരുന്ന അഞ്ചല്‍ തഴമേല്‍ ജയജോതി ഭവനില്‍ രഘു ബിന്ദു ദമ്പതികളുടെ മകള്‍ ജ്യോതി ലക്ഷ്മി (21), കരവാളൂര്‍ നീലാമ്മാള്‍ പള്ളിവടക്കതില്‍ സുനില്‍ ബിനി ദമ്പതികളുടെ മകള്‍ ശ്രുതി ലക്ഷ്മി (16), ഓട്ടോ ഡ്രൈവര്‍ അഞ്ചല്‍ തഴമേല്‍ ചൂരക്കുളം കുരിശടി കവലയില്‍ അക്ഷയ് ഭവനില്‍ അക്ഷയ് (23) എന്നിവരാണ് മരിച്ചത്. ഓട്ടോ ഡ്രൈവര്‍ തല്‍ക്ഷണം മരണപ്പെട്ടു. ശ്രുതി ലക്ഷ്മിയും ജോതി ലക്ഷ്മിയും സഹോദരിമാരുടെ മക്കളാണ്. ജ്യോതി ലക്ഷ്മി ബെംഗളൂരുവില്‍ നഴ്‌സിങ് വിദ്യാര്‍ഥിനിയും ശ്രുതി ലക്ഷ്മി കരവാളൂര്‍ എഎംഎംഎച്ച്എസ് പത്താം ക്ലാസ് വിദ്യാര്‍ഥിനിയുമാണ്.
അഞ്ചല്‍ പുനലൂര്‍ റൂട്ടില്‍ മാവിളയില്‍ വ്യാഴാഴ്ച പുലര്‍ച്ചെയായിരുന്നു അപകടം. ശബരിമല സന്ദര്‍ശനം കഴിഞ്ഞ് ആന്ധ്ര പ്രദേശില്‍ നിന്നുള്ള തീര്‍ഥാടകരുമായി മടങ്ങുകയായിരുന്ന ബസാണ് ഓട്ടോറിക്ഷയുമായി കൂട്ടിയിടിച്ചത്. ജ്യോതി ലക്ഷ്മിയുടെ വീട്ടില്‍ നിന്ന് ശ്രുതി ലക്ഷ്മിയുടെ വീട്ടിലേക്ക് പോവുകയായിരുന്നു വിദ്യാര്‍ഥിനികളെന്നാണ് വിവരം. ശ്രുതി ലക്ഷ്മിയുടെ മാതാവ് ബിനി കുവൈത്തിലാണ്. അഞ്ചല്‍ പൊലീസ് സ്ഥലത്തെത്തി തുടര്‍നടപടികള്‍ സ്വീകരിച്ചു. അഞ്ചല്‍ മിഷന്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം പോസ്റ്റ്‌മോര്‍ട്ടത്തിനു ശേഷം ബന്ധുക്കള്‍ക്കു വിട്ടു നല്‍കും.
Related News
