ലണ്ടന്‍: യുകെ വിസ നിയമങ്ങളില്‍ വന്ന കര്‍ശനമായ മാറ്റങ്ങള്‍ കാരണം കഴിഞ്ഞ രണ്ടു വര്‍ഷത്തിനിടെ രാജ്യം വിട്ടത് റെക്കോര്‍ഡ് എണ്ണം ഇന്ത്യക്കാര്‍. ഓഫീസ് ഫോര്‍ നാഷണല്‍ സ്റ്റാറ്റിസ്റ്റിക്സിന്റെ (ONS) ഏറ്റവും പുതിയ റിപ്പോര്‍ട്ട് പ്രകാരം, 2025 ജൂണില്‍ അവസാനിച്ച വര്‍ഷത്തില്‍ 74,000 ഇന്ത്യക്കാരാണ് യുകെ വിട്ടുപോയത്.

മടങ്ങിപ്പോക്കില്‍ ഏറ്റവും കൂടുതലുള്ളത് വിദ്യാര്‍ത്ഥികളാണ്. റിപ്പോര്‍ട്ട് പ്രകാരം ഇക്കാലയളവില്‍ 45,000 വിദ്യാര്‍ഥികളും 22,000 തൊഴില്‍ വിസക്കാരും 7,000 മറ്റ് വിസകക്കാരും യുകെ വിട്ടു. ആശ്രിതരെ കൊണ്ടുവരുന്നതിനുള്ള നിയന്ത്രണങ്ങള്‍ ഉള്‍പ്പെടെയുള്ള പുതിയ കുടിയേറ്റ നയങ്ങള്‍ ഇന്ത്യന്‍ വിദ്യാര്‍ത്ഥികളുടെ യുകെ പഠന തീരുമാനങ്ങളെ കടുത്ത രീതിയില്‍ സ്വാധീനിച്ചു എന്നാണ് വിദഗ്ധര്‍ വിലയിരുത്തുന്നത്.

2024 ജനുവരിയില്‍ പ്രാബല്യത്തില്‍ വന്ന നിയമമനുസരിച്ച്, ബിരുദാനന്തര ബിരുദ വിദ്യാര്‍ത്ഥികള്‍ക്ക് ആശ്രിതരെ കൊണ്ടുവരുന്നത് വിലക്കിയിരുന്നു. ഇതിന്റെ ഫലമായി ആശ്രിത വിസ അപേക്ഷകളില്‍ 86% കുറവാണ് സംഭവിച്ചത്. പുതിയ ഇന്ത്യന്‍ വിദ്യാര്‍ത്ഥി വിസ അപേക്ഷകളിലും 11% ഇടിവുണ്ടായി.

കുടുംബപരമായ തടസ്സങ്ങളും നയപരമായ അനിശ്ചിതത്വവും യുകെയില്‍ പഠിക്കാനുള്ള താത്പര്യത്തെ ദുര്‍ബലപ്പെടുത്തിയിട്ടുണ്ട്. ഇന്ത്യയില്‍ നിന്നുള്ള വിദ്യാര്‍ത്ഥികളുടെ എണ്ണത്തിലുണ്ടാകുന്ന ഈ കുറവ് യുകെയിലെ സര്‍വകലാശാലാ മേഖലയില്‍ ഗുരുതരമായ പ്രത്യാഘാതങ്ങള്‍ സൃഷ്ടിക്കുമെന്നാണ് മുന്നറിയിപ്പ്. ബജറ്റ് കമ്മി, ജീവനക്കാരുടെ എണ്ണം കുറയ്ക്കല്‍, ചില കോഴ്സുകള്‍ അടച്ചുപൂട്ടല്‍ എന്നിവയിലേക്ക് ഇത് നയിച്ചേക്കാം.

പുറത്തേക്കുള്ള ഒഴുക്ക് (ഔട്ട്ഫ്‌ലോ) കൂടുകയും അകത്തേക്കുള്ള ഒഴുക്ക് (ഇന്‍ഫ്‌ലോ) കുറയുകയും ചെയ്തതോടെ യുകെയിലെ മൊത്തം അന്താരാഷ്ട്ര കുടിയേറ്റം മൂന്നില്‍ രണ്ട് ഭാഗത്തിലധികം കുറഞ്ഞു. 2025 ജൂണില്‍ അവസാനിച്ച വര്‍ഷത്തിലെ നെറ്റ് മൈഗ്രേഷന്‍ 204,000 (മുന്‍ വര്‍ഷം ഇത് 649,000 ആയിരുന്നു) ആണ്.
ഇതേ കാലയളവില്‍ യുകെ വിട്ടവരുടെ എണ്ണം: 693,000 ആയി വര്‍ധിച്ചു.

ഗവേഷകര്‍, വിദഗ്ധ തൊഴിലാളികള്‍ എന്നിവരെ ലക്ഷ്യമിടുന്ന 'ഗ്രാജുവേറ്റ് റൂട്ട്' വിസയുടെ ദൈര്‍ഘ്യം കുറയ്ക്കുമെന്ന ഊഹാപോഹങ്ങളും, സ്‌കില്‍ഡ് വര്‍ക്കര്‍ ശമ്പള പരിധി ഉയര്‍ത്താനുള്ള നിര്‍ദ്ദേശങ്ങളും വിദ്യാര്‍ത്ഥികളില്‍ കൂടുതല്‍ ഉത്കണ്ഠ സൃഷ്ടിച്ചിട്ടുണ്ട്. ട്യൂഷന്‍ വരുമാനം, കാമ്പസ് വൈവിധ്യം, തൊഴില്‍ ശക്തി എന്നിവയില്‍ നിര്‍ണായക സംഭാവന നല്‍കുന്ന ഇന്ത്യന്‍ വിദ്യാര്‍ത്ഥികളെ പിന്തിരിപ്പിക്കുന്നത്, യുകെ അതിന്റെ സര്‍വകലാശാലാ മേഖലയെയും ആഗോള മത്സരശേഷിയെയും ദുര്‍ബലപ്പെടുത്തുന്നതിന് തുല്യമാണെന്ന് വ്യവസായ വിദഗ്ധര്‍ അഭിപ്രായപ്പെടുന്നു.

യുകെയിലെ കുടിയേറ്റ നിയമങ്ങളിലുണ്ടായ മാറ്റങ്ങള്‍ ഇന്ത്യയില്‍ നിന്നുള്ള വിദ്യാര്‍ത്ഥികളുടെ ഒഴുക്കിന് കടിഞ്ഞാണിട്ടതോടെ, യൂണിവേഴ്‌സിറ്റി മേഖല കടുത്ത സാമ്പത്തിക വെല്ലുവിളി നേരിടാന്‍ സാധ്യതയുണ്ടെന്ന് വിദഗ്ധര്‍ മുന്നറിയിപ്പ് നല്‍കി. സര്‍വകലാശാലകളുടെ പ്രധാന വരുമാന മാര്‍ഗ്ഗമായ ട്യൂഷന്‍ വരുമാനത്തില്‍ ഗണ്യമായ കുറവ് ഇതുണ്ടാക്കും. ഇത് ബജറ്റ് കമ്മിയിലേക്ക് നയിക്കാം. സാമ്പത്തിക ആഘാതവും എന്റോള്‍മെന്റ് കുറയുന്നതും കോഴ്സുകള്‍ നിര്‍ത്തലാക്കുന്നതിനും ജീവനക്കാരെ കുറയ്ക്കുന്നതിനും കാരണമായേക്കാം. ചില സര്‍വകലാശാലകള്‍ അടച്ചുപൂട്ടല്‍ ഭീഷണി നേരിടാന്‍ സാധ്യതയുണ്ട്.

ഗ്രാജുവേറ്റ് റൂട്ടിനെക്കുറിച്ചുള്ള ആശങ്ക പഠനം പൂര്‍ത്തിയാക്കിയ ശേഷം യുകെയില്‍ തങ്ങാനും ജോലി ചെയ്യാനുമുള്ള 'ഗ്രാജുവേറ്റ് റൂട്ട്' വിസയുടെ ദൈര്‍ഘ്യം കുറയ്ക്കുമെന്ന അഭ്യൂഹങ്ങള്‍ക്കിടയാക്കിയിട്ടുണ്ട്. ഇത് യുകെയെ ഒരു തൊഴില്‍ അവസര കേന്ദ്രം എന്ന നിലയില്‍ ആകര്‍ഷകമല്ലാതാക്കുന്നു. ഇത് പ്രൊഫഷണല്‍ ജീവനക്കാരുടെ ക്ഷാമം രൂക്ഷമാക്കാം. ഇന്ത്യന്‍ വിദ്യാര്‍ത്ഥികളുടെ ഒഴുക്ക് കുറയുന്നത് കാമ്പസുകളിലെ സാംസ്‌കാരിക വൈവിധ്യത്തെയും അന്താരാഷ്ട്ര അക്കാദമിക് അന്തരീക്ഷത്തെയും ബാധിക്കും. സര്‍വകലാശാലാ പഠനമേഖലയുടെ സമഗ്രതയും വൈവിധ്യവും ഇല്ലാതാകാനും ഇതിടയാക്കും.