കൊച്ചി: മലയാറ്റൂരില് രണ്ട് ദിവസം മുമ്പ് കാണാതായ 19 വയസ്സുകാരിയെ ആളൊഴിഞ്ഞ പറമ്പില് കൊല്ലപ്പെട്ട നിലയില് കണ്ടെത്തി. മുണ്ടങ്ങാമറ്റം തുരുത്തിപ്പറമ്പില് ഷൈജു-ഷിനി ദമ്പതികളുടെ മകള് ചിത്രപ്രിയയുടെ മൃതദേഹമാണ് വീടിന് ഒരു കിലോമീറ്റര് അകലെയുള്ള കാടുപിടിച്ച പറമ്പില് കണ്ടെത്തിയത്. മരണത്തില് ദുരൂഹതയുള്ളതായും തലയ്ക്ക് പിന്നിലേറ്റ ആഴത്തിലുള്ള മുറിവ് കൊലപാതകമെന്ന നിഗമനത്തിലേക്ക് വിരല് ചൂണ്ടുന്നതായും പോലീസ് അറിയിച്ചു.
സംഭവത്തെക്കുറിച്ച് പോലീസ് നല്കുന്ന വിവരങ്ങള്: ബെംഗളൂരുവില് ഏവിയേഷന് ബിരുദ വിദ്യാര്ത്ഥിനിയായ ചിത്രപ്രിയയെ കഴിഞ്ഞ ശനിയാഴ്ച മുതലാണ് കാണാതായത്. അടുത്തുള്ള കടയിലേക്ക് പോകുകയാണെന്ന് പറഞ്ഞ് വീട്ടില് നിന്നിറങ്ങിയ പെണ്കുട്ടി പിന്നീട് മടങ്ങിയെത്തിയില്ല. മലയാറ്റൂര് മണപ്പാട്ട് ചിറ സെബിയൂര് റോഡിന് സമീപത്തെ സ്വകാര്യ വ്യക്തിയുടെ പറമ്പില് നിന്നാണ് മൃതദേഹം കണ്ടെത്തിയത്. പ്രദേശത്ത് ദുര്ഗന്ധം വമിച്ചതിനെ തുടര്ന്ന് നാട്ടുകാര് പോലീസില് വിവരം അറിയിക്കുകയായിരുന്നു.
പെണ്കുട്ടി അവസാനമായി ഫോണില് സംസാരിച്ച രണ്ട് യുവാക്കളെ കാലടി പോലീസ് കസ്റ്റഡിയിലെടുത്തിട്ടുണ്ട്. ഇവരെ വിശദമായി ചോദ്യം ചെയ്തു വരികയാണ്. മൃതദേഹത്തിന് രണ്ട് ദിവസത്തെ പഴക്കമുണ്ടെന്നും ജീര്ണ്ണിച്ചു തുടങ്ങിയതായും ഇന്ക്വസ്റ്റ് നടപടികള്ക്കിടെ കണ്ടെത്തി. തലയ്ക്കേറ്റ മാരകമായ പരിക്കാണ് മരണകാരണമെന്ന് സംശയിക്കുന്നുണ്ടെങ്കിലും, പോസ്റ്റ്മോര്ട്ടം റിപ്പോര്ട്ട് ലഭിച്ചാല് മാത്രമേ മരണം എങ്ങനെ സംഭവിച്ചു എന്നതില് ഔദ്യോഗിക സ്ഥിരീകരണം ഉണ്ടാകൂ എന്ന് പോലീസ് വ്യക്തമാക്കി.
കാലടി പോലീസിന്റെ നേതൃത്വത്തിലുള്ള പ്രത്യേക സംഘം സ്ഥലത്തെത്തി ശാസ്ത്രീയ പരിശോധനകള് പൂര്ത്തിയാക്കി. ഉന്നത പോലീസ് ഉദ്യോഗസ്ഥര് സ്ഥലം സന്ദര്ശിച്ചിട്ടുണ്ട്.
Related News
