നെടുമ്പാശ്ശേരി: തായ്ലന്‍ഡില്‍ നിന്നും കടത്തിക്കൊണ്ട് വന്ന പക്ഷികളുമായി ദമ്പതികള്‍ നെടുമ്പാശേരി വിമാനത്താവളത്തില്‍ പിടിയില്‍. കോടികള്‍ വിലമതിക്കുന്ന 11
അപൂര്‍വയിനം പക്ഷികളുമായാണ് ദമ്പതികളെ പിടികൂടിയത്.

തായ്‌ലന്‍ഡില്‍ നിന്ന് ക്വാലാലംപൂര്‍ വഴിയാണ് ഭാര്യയും ഭര്‍ത്താവും ഏഴു വയസ്സുള്ള മകനും ഉള്‍പ്പെടുന്ന കുടുംബം എത്തിയത്. തുടര്‍ന്ന് ഇവരുടെ ചെക്ക് ഇന്‍ ബാഗേജ് പരിശോധിച്ചപ്പോഴാണ് വിമാനത്താവള ഇന്റലിജന്‍സ് യൂണിറ്റ് അപൂര്‍വയിനം പക്ഷികളെ കണ്ടെത്തിയത്.

വംശനാശ ഭീഷണി നേരിടുന്ന അപൂര്‍വ ഇനം സസ്യ, ജന്തുജാലങ്ങളെ സംബന്ധിച്ചുള്ള രാജ്യാന്തര കണ്‍വെന്‍ഷനിലെ ചട്ടം 1, 2 വിഭാഗങ്ങളില്‍പ്പെടുന്ന പക്ഷികളാണ് പിടിച്ചെടുത്തത്. ഇവയെ തായ്‌ലന്‍ഡിലേക്ക് തന്നെ കയറ്റി അയയ്ക്കും. പിടിയിലായവരെ വനംവകുപ്പിനു കൈമാറി. പക്ഷികളെ കടത്തുന്നതു സംബന്ധിച്ച് അന്വേഷണം പുരോഗമിച്ചു വരികയാണെന്ന് അധികൃതര്‍ പറഞ്ഞു.

ആഭ്യന്തര യാത്രക്കാരനില്‍ നിന്ന് ഡയറക്ടറേറ്റ് ഓഫ് റവന്യൂ ഇന്റലിജന്‍സ് കഞ്ചാവ് കണ്ടെത്തി. ഉച്ചക്ക് 1.35 ന് ചെന്നൈയില്‍ നിന്ന് കൊച്ചി അന്താരാഷ്ട്ര വിമാനത്താവളത്തില്‍ എത്തിയ യാത്രക്കാരനില്‍ സംശയം തോന്നി ഡയറക്ടറേറ്റ് ഓഫ് റവന്യു ഇന്റലിജന്‍സ് നടത്തിയ പരിശോധനയിലാണ് കഞ്ചാവ് കണ്ടത്തിയത് . യാത്രക്കാരനായ ബിജു ഫെബിനെ കസ്റ്റഡിലെടുത്തു. പിടികൂടിയ ഹൈബ്രിഡ് കഞ്ചാവ് ആണെന്ന് സംശയിക്കുന്നതായി അധികൃതര്‍ അറിയിച്ചു. 574 ഗ്രാമിന്റെ 4 പാക്കറ്റുകളാണ് കണ്ടെത്തിയത്. മൊത്തം 2296 ഗ്രാം പിടിച്ചെടുത്തു. ഏകദേശം 2 കോടി രൂപ വിലമതിക്കും.