ആലപ്പുഴ: പി.എം ശ്രീ വിവാദത്തില്‍ രൂക്ഷ വിമര്‍ശനം ഉയര്‍ത്തിയ സി.പി.ഐയെ അനുനയിപ്പിക്കാന്‍ സി.പി.എം ശ്രമം. ഇതിന്റെ ഭാഗമായി സംസ്ഥാന സെക്രട്ടറി ബിനോയ് വിശ്വവുമായി മുഖ്യമന്ത്രി പിണറായി വിജയന്‍ കൂടിക്കാഴ്ച നടത്തും. ഉച്ചകഴിഞ്ഞ് 3.30ന് ആലപ്പുഴയിലാണ് ഇരുവരും തമ്മിലുള്ള കൂടിക്കാഴ്ച നടക്കുക. സി.പി.ഐ നേതാക്കളും കൂടിക്കാഴ്ചയില്‍ പങ്കെടുക്കുമെന്നാണ് വിവരം. കൂടാതെ, ഘടകകക്ഷികളുടെ അഭിപ്രായം കൂടി തേടി എല്‍.ഡി.എഫ് യോഗം വൈകാതെ ചേരാനും സി.പി.എം സെക്രട്ടറിയേറ്റ് തീരുമാനിച്ചിട്ടുണ്ട്.

ധാരണാപത്രം ഒപ്പുവെച്ചെങ്കിലും പി.എം ശ്രീയുമായി ബന്ധപ്പെട്ട ഫയലുകള്‍ ഉദ്യോഗസ്ഥ തലത്തില്‍ നീക്കുന്നത് സാവധാനത്തിലാക്കാനാണ് പുതിയ തീരുമാനം. ഇതുപ്രകാരം പി.എം ശ്രീ പദ്ധതി നടപ്പാക്കേണ്ട സ്‌കൂളുകളുടെ പട്ടിക ഉടന്‍ കൈമാറില്ല. ഇത് വിദ്യാഭ്യാസ മന്ത്രിയുടെ നിര്‍ദേശം ലഭിച്ച ശേഷമെ ഉദ്യോഗസ്ഥര്‍ കൈമാറൂ.തീരുമാനിച്ചതായാണ് വിവരം. കൂടാതെ, സംസ്ഥാനത്തിന് പണം നഷ്ടമാകാത്ത രീതിയിലും ഇടത് മുന്നണിയുടെ ആശയം ബലികഴിപ്പിക്കാതെ പി.എം ശ്രീ പദ്ധതി എങ്ങനെ നടപ്പാക്കാമെന്ന സാധ്യത ചര്‍ച്ച ചെയ്യും. ശേഷം പി.എം ശ്രീയെ കുറിച്ച് പഠിക്കുന്നതിന് എല്‍.ഡി.എഫില്‍ സബ്കമ്മിറ്റി രൂപീകരിക്കും. ഈ സബ് കമ്മിറ്റിയായിരിക്കും തുടര്‍നടപടികള്‍ ഏത് വിധത്തില്‍ വേണമെന്ന് നിര്‍ദേശിക്കുക.

അതിനിടെ, പി.എം ശ്രീയിലെ തുടര്‍ നിലപാട് തീരുമാനിക്കാനുള്ള സി.പി.ഐയുടെ നിര്‍ണായക സംസ്ഥാന നിര്‍വാഹക സമിതിയോഗം ആലപ്പുഴയില്‍ നടക്കുകയാണ്. സംസ്ഥാന സെക്രട്ടറിയെ കൂടാതെ പാര്‍ട്ടി മന്ത്രിമാരും നേതാക്കളും യോഗത്തില്‍ പങ്കെടുക്കുന്നുണ്ട്. പി.എം ശ്രീ പദ്ധയില്‍ നിന്ന് കേരള സര്‍ക്കാര്‍ പിന്മാറണമെന്ന നിലപാട് ദേശീയ ജനറല്‍ സെക്രട്ടറി ഡി. രാജ ആവര്‍ത്തിച്ചു. സി.പി.ഐ മന്ത്രിമാരും പാര്‍ട്ടിയുടെ നിലപാടില്‍ ഉറച്ചു നില്‍ക്കുകയാണ്. നിലപാടില്‍ ഒരു മാറ്റവുമില്ലെന്ന് മന്ത്രിമാരും ആവര്‍ത്തിച്ചു.