റിയാദ്: എണ്ണക്കമ്പനികള്‍ പുതിയ നിക്ഷേപങ്ങള്‍ നടത്തുകയും ഉല്‍പാദനത്തില്‍ ശ്രദ്ധിക്കുകയും ചെയ്തില്ലെങ്കില്‍, എണ്ണയുടെ ആവശ്യം വര്‍ധിക്കുന്ന സാഹചര്യത്തില്‍ ആഗോളതലത്തില്‍ വിതരണ പ്രതിസന്ധി ഉണ്ടാകുമെന്ന് സൗദി അരാംകോ പ്രസിഡന്റും സി.ഇ.ഒയുമായ അമീന്‍ നാസര്‍ മുന്നറിയിപ്പ് നല്‍കി.

ഫൈനാന്‍ഷ്യല്‍ ടൈംസിന് നല്‍കിയ അഭിമുഖത്തിലാണ് നാസറിന്റെ പരാമര്‍ശം. ഒരു പതിറ്റാണ്ടോളം എണ്ണ പര്യവേക്ഷണം നിലച്ച അവസ്ഥയിലാണ് എണ്ണ മേഖലയെന്നും ഇത് ഈ രംഗത്ത് വലിയ പ്രത്യാഘാതങ്ങള്‍ ഉണ്ടാക്കുമെന്നും അദ്ദേഹം കൂട്ടിച്ചേര്‍ത്തു.

കഴിഞ്ഞ 15 വര്‍ഷത്തോളം ലോകത്ത് എണ്ണയുടെ ലഭ്യത ഉറപ്പാക്കിയ യുഎസ് ഷെയ്ല്‍ ഓയില്‍ ഉണര്‍വ് ഇനി ആവര്‍ത്തിക്കില്ലെന്നും നാസര്‍ പ്രവചിച്ചു. 'എണ്ണ ഉല്‍പാദനത്തിന്റെ വളര്‍ച്ചയുടെ 80% മുതല്‍ 90% വരെ ഷെയ്ല്‍ ഓയിലില്‍ നിന്നായിരുന്നു. അടുത്ത 15 വര്‍ഷത്തേക്ക് നോക്കുമ്പോള്‍, ഷെയ്ല്‍ ഓയില്‍ സ്ഥിരത കൈവരിക്കുകയും പിന്നീട് കുറയുകയും ചെയ്യാനാണ് സാധ്യത. അപ്പോള്‍ ആവശ്യകത നിറവേറ്റാനുള്ള അധിക ബാരലുകള്‍ എവിടെ നിന്ന് വരും?' അദ്ദേഹം ചോദിച്ചു.

പുതിയ പദ്ധതികള്‍ യാഥാര്‍ഥ്യമാകാന്‍ സാധാരണയായി അഞ്ചു മുതല്‍ ഏഴ് വര്‍ഷം വരെ എടുക്കുന്നതിനാല്‍, ലോകത്തിന്റെ ഭാവി വിതരണം കമ്പനികള്‍ ഇപ്പോള്‍ എടുക്കുന്ന തീരുമാനങ്ങളെ ആശ്രയിച്ചിരിക്കും എന്നും നാസര്‍ കൂട്ടിച്ചേര്‍ത്തു.

അന്തിമ നിക്ഷേപ തീരുമാനങ്ങള്‍ കമ്പനി നിരീക്ഷിച്ചു വരികയാണെന്നും, വിപണിയില്‍ എത്തുന്ന പദ്ധതികളുടെയും തീരുമാനങ്ങളുടെയും എണ്ണത്തില്‍ കാര്യമായ കുറവുണ്ടായെന്നും അദ്ദേഹം ചൂണ്ടിക്കാട്ടി. എങ്കിലും, അരാംകോ പ്രതിവര്‍ഷം 1 ബില്യണ്‍ മുതല്‍ 2 ബില്യണ്‍ ഡോളര്‍ വരെ പര്യവേക്ഷണത്തിനായി ചെലവഴിക്കുന്നുണ്ടെന്നും, വലിയ അളവില്‍ എണ്ണ ശേഖരം കൂട്ടിച്ചേര്‍ക്കാന്‍ ശ്രമിക്കുന്നുണ്ടെന്നും അദ്ദേഹം വ്യക്തമാക്കി. ഇത് കമ്പനിയെ സംബന്ധിച്ചിടത്തോളം ഒരു തന്ത്രപരമായ വിഷയമായാണ് കാണുന്നതെന്നും നാസര്‍ പറഞ്ഞു.